- 1
- Ko ta te ariki, ko ta Ihowa, tenei i whakaatu mai ai ki a au, nana, i hangā e ia he mawhitiwhiti i te timatanga o te pihinga ake o to muri tupu, nana, ko to muri tupu ia i muri iho i ā te kingi tapahanga.
- 2
- Na, i te mutunga o ta ratou kainga i te tarutaru o te whenua, ka mea atu ahau, E te Ariki, e Ihowa, tena ra, murua te he: ma wai hoki a Hakopa ka ara ai? he iti nei hoki ia.
- 3
- I ripeneta a Ihowa i tenei; E kore e meatia, e ai ki tana, ki ta Ihowa.
- 4
- Ko ta te Ariki, ko ta Ihowa tenei i whakarite mai ai ki a au: Na, kua karangatia e te Ariki e Ihowa he whawhai, he mea ahi, a pau ake te rire nui, pau ake ano hoki tetahi wahi.
- 5
- Na, ko taku meatanga atu, Kati ra, e te Ariki, e Ihowa, ma wai hoki a Hakopa ka ara ai? he iti nei hoki ia.
- 6
- I ripeneta a Ihowa i tenei, E kore ano tenei e meatia, e ai ki tana, ki ta te Ariki, ki ta Ihowa.
- 7
- I whakakitea mai tenei e ia ki a au, Na, ko te Ariki e tu ana i runga i te taiepa, he mea paramu ki te aho, me te aho paramu ano i tona ringaringa.
- 8
- Na, ko te meatanga mai a Ihowa ki a au, Ko te aha e kitea ana e koe, e Amoho? Ano ra ko au. He aho paramu. Katahi te Ariki ka ki mai, Nana, ka iri i a au he aho paramu i waenganui i toku iwi i a Iharaira: e kore e whakarerea noatia iho ta ratou e ahau a muri ake nei.
- 9
- Ka ururuatia ano hoki nga wahi tiketike o Ihaka, ka tuheatia ano nga wahi tapu o Iharaira, ka whakatika atu ano ahau, me te hoari ano ki te whare o Ieropoama.
- 10
- Na, ka unga tangata atu a Amatia tohunga o Pete-ere ki a Ieropoama kingi o Iharaira hei ki atu, Kua whakatakotoria e Amoho he hē mou i roto i te whare o Iharaira, kahore he wahi o tenei whenua mo ana kupu.
- 11
- Ko te kupu hoki tenei a Amoho, Ka mate a Ieropoama i te hoari, ka whakaraua rawatia atu ano hoki a Iharaira i to ratou whenua.
- 12
- I mea mai ano a Amatia ki a Amoho, E te matakite, haere, e rere ki te whenua o Hura, ki reira kai ai i te taro māu, ki reira ano hoki poropiti ai.
- 13
- Kati ano hoki to poropiti ki Pete-ere: ko to te kingi wahi tapu hoki ia, ko te whare ano hoki ia o te kingitanga.
- 14
- Na, ka whakahokia atu e Amoho, i mea ia ki a Amatia, Ehara ahau i te poropiti, ehara ano hoki i te tama a te poropiti; engari he kai tiaki kau ahau, he kai kohikohi hikamora:
- 15
- I tikina ake hoki ahau e Ihowa i te mea e whai ana i nga hipi, i ki mai ano hoki a Ihowa ki a au, Haere, poropiti atu ki toku iwi, ki a Iharaira.
- 16
- Na, whakarongo mai ki te kupu a Ihowa, E mea na koe, Kaua e poropiti ki a Iharaira, kei maturuturu iho ano tetahi kupu āu hei whakahe mo te whare o Ihaka.
- 17
- No reira ko te kupu tenei a Ihowa, tera to wahine e puremu i roto i te pa, ka hinga ano hoki o tamariki ratou ko o tamahine i te hoari, ka wehewehea ano hoki to oneone, mea rawa ki te aho; ka mate ano hoki koe i runga i te oneone poke, ka whakaraua rawatia atu ano hoki a Iharaira i tona oneone.
Address: 
Phone: 
Email: