- 1
- I whakakitea mai ano hoki tenei e te Ariki e Ihowa ki a au; na, ko tetahi kete he hua raumati ona.
- 2
- Na, ko tana meatanga mai, Ko te aha te kitea ana e koe, e Amoho? Ano ra atu ko au, He kete, he hua raumati ona. Ano ra ko Ihowa ki a au, Kua tae mai te mutunga ki toku iwi, ki a Iharaira: e kore ta ratou e whakarerea kautia e ahau a muri ake nei.
- 3
- He aue ano hoki nga waiata o te temepara i taua rangi, e ai ta te Ariki ta Ihowa, ka maha nga tinana mate i nga wahi katoa, ka akiritia pukutia atu.
- 4
- Whakarongo ki tenei, e te hunga i horomia ai te rawa-kore, he mea kia whakakahoretia ai te hunga iti o te whenua.
- 5
- A, e ki ana, Ahea pahemo ai te kowhititanga marama, kia hoko witi ai tatou? te hapati ano hoki, kia whakaputaina atu ai te witi e tatou? te epa whakaiti rawa, te hekere whakanui rawa, te pauna whakangaua ketia ake, he mea tinihanga.
- 6
- Kia hokona ai e tatou nga ware ki te hiriwa, te rawa-kore ki nga hu e rua; na, te witi rukenga hokona ake e tatou.
- 7
- Kua oatitia e Ihowa te nui o Hakopa, E kore ahau e wareware ki tetahi o a ratou mahi, a ake ake ake.
- 8
- E kore ianei te whenua e wiri ki tenei? e kore ianei te hunga katoa e noho ana i reira e tangi? ka pari katoa ake nei hoki, ano he waipuke; ka makā atu, ka paremo, me te mea na te waipuke o Ihipa.
- 9
- Na, i taua rangi ano, e ai ta te Ariki, ta Ihowa, ka meinga e ahau te ra kia toene i te awatea, ka whakapouritia ano hoki e ahau te whenua i te mea e mārama ana ano te ra:
- 10
- Ka puta ke ano hoki i a au a koutou hakari hei tangihanga, a koutou waiata katoa ano hoki hei whakaoriori; ka meatia ano e ahau te kakahu taratara ki nga hope katoa, te pakira ano hoki ki nga māhunga katoa; ka meinga ano e ahau kia rite ki te tangihanga ki te huatahi, tona mutunga ano hoki hei ra mamae.
- 11
- Nana, kei te haere mai nga ra, e ai ta te Ariki ta Ihowa, e ungā atu ai e ahau te hemo-kai ki te whenua, ehara i te hemo-kai taro, ehara ano i te mate-wai; engari he hiahia kia rongo i nga kupu a Ihowa.
- 12
- A ka atiutiu atu ratou i tetahi moana ki tetahi moana, i te nota ki te rawhiti, ka kopikopiko ratou, he rapu i te kupu a Ihowa; heoi e kore e kitea.
- 13
- I taua rangi ka hemo nga wahina ataahua, ratou ko nga taitamariki, i te mate-wai.
- 14
- Na, te hunga e oatitia ana e ratou te he o Hamaria, a e ki ana, Kei te ora to Atua, e Rana; me tenei, Kei te ora te tikanga o Peere-hepa; ka taka ratou, e kore ano ratou e ara a muri ake nei.
Address: 
Phone: 
Email: