- 1
- I tu ake ano ahau i te tau tuatahi o Tariuha Meri, ahau nei ano ki te whakau, ki te whakakaha i a ia.
- 2
- Me whakaatu atu ano e ahau te pono ki a koe, Nana, tera atu ano hoki etahi kingi e toru e ara ake mo Pahia, ka nui noa atu ano hoki nga taonga o te tuawha i o te katoa; a i a ia ka kaha nei i ona taonga, ka whakaohokia e ia te katoa ki te whawhai ki te kingitanga o Kariki.
- 3
- Ka tu ake ano hoki tetahi kingi marohirohi, he nui ano tona kingitanga e kingi ai ia, ka mahia ano hoki e ia tana e pai ai.
- 4
- A, tona turanga ki runga, ka pakaru tona kingitanga, ka wehewehea atu ano hoki ki nga hau e wha o te rangi; kahore ano hoki mo o muri i a ia, e kore ano e rite ki tona kingitanga i kingi ai ia; no te mea ka hutia atu tona kingitanga, mo etahi atu ano ia ehara nei i enei.
- 5
- Na, ka kaha te kingi o te tonga, me tetahi ano o ana rangatira; ka neke ake ano tona kaha ki runga ake i to tera, ka kingi ano hoki; he kingitanga nui tona kingitanga.
- 6
- Na, i te mutunga o nga tau ka honoa raua, ka haere mai hoki te tamahine a te kingi o te tonga ki te kingi o te nota ki te whakarite tikanga: otiia e kore e mau i taua wahine te kaha o te ringa; e kore ano te tane e tu, tona ringaringa ano hoki: heoi ka tukua atu te wahine, me te hunga ano nana ia i kawe mai, me te matua tane nana nei ia, me tona kai whakakaha i aua wa.
- 7
- Otiia tera e tu ake tetahi i tona wahi, he manga no nga pakiaka o te wahine, a ka haere mai, me te taua ano, ka tomo ano ki roto ki te pa o te kingi o te nota, ka mahi ano hoki i roto i a ratou, a ka kaha tana:
- 8
- Ka whakaraua ano hoki e ia o ratou atua, o ratou rangatira, a ratou oko ano hoki e matenuitia ana, nga mea hiriwa, nga mea koura, ka kawea atu ki Ihipa; nga tau ano hoki e tu ai ia maha ake i o te kingi o te nota.
- 9
- Ka haere mai ano te kingi o te tonga ki tona kingitanga, ka hoki mai ki tona whenua.
- 10
- Heoi ka oho ana tamariki, ka huihuia he ope, he nui nga taua: na, ko te tino haerenga mai o tetahi, kei te waipuke te rite, puta rawa atu: te hokinga atu ka oho ano ia, a tae tonu atu ki to tera pa.
- 11
- Na, ka whakatakariri te kingi o te tonga, a ka puta mai, ka whawhai ki a ia, ki te kingi o te nota, he nui ano hoki te ope e tu i tera; otiia ka hoatu te ope ki roto ki tona ringaringa.
- 12
- A ka riro te ope i a ia, ka kake tona ngakau; he tini ano hoki nga mano e whakatakā e ia: otiia e kore ia e whai kaha.
- 13
- No te mea ka hoki mai te kingi o te nota, maha atu ano hoki i o mua te ope e tu i a ia, ina, ka tae mai ia i te mutunga o etahi tau, he nui tana ope, he nui nga taonga.
- 14
- I aua wa ano hoki he tokomaha e whakatika ake ki te kingi o te tonga: ka whakakake ano hoki nga tamariki tutu o to iwi, he mea e pumau ai te mea i puta mai; otiia ka taka ratou.
- 15
- Na, ka haere mai te kingi o te nota; ka haupuria ake ano he pukepuke e ia, a ka riro i a ia nga pa he nui rawa nei te taiepa: e kore ano nga ringaringa o te tonga e u, e kore ano tana iwi i whiriwhiri ai, kahore ano hoki he kaha e u ai.
- 16
- Heoi ka mahia e tenei ka haere mai nei ki a ia tana e pai ai, e kore ano tetahi e tu ki tona aroaro: na, ka tu ia ki te whenua ataahua, a moti ake tera i tona ringaringa.
- 17
- Ka anga ano hoki tona mata, ka mea kia haere mai ia i runga i te kaha o tona kingitanga katoa, me te hunga tika ano hei hoa mona; ko tana tenei e mea ai: ka homai ano e ia ki a ia te tamahine a nga wahine, he mea whakangau ke nana: otiia e kore tera e tu hei hoa mona, e kore ano e mahi i tana.
- 18
- Na, ka tahuri atu tona mata ki nga motu, a he maha e riro i a ia: otiia ma tetahi kingi e mea tana ingoa kino kia mutu, he mea nana ake; te ingoa kino mona kore rawa, engari ka meinga e ia kia tahuri atu ki a ia.
- 19
- Na, ka tahuri atu tona mata ki te pa o tona whenua; otiia ka tūtuki ona waewae, a ka hinga ia, kore ake e kitea.
- 20
- Katahi ka whakatika ki runga ki tona wahi he kai tohe takoha i runga i te kororia ano o te kingitanga: kia torutoru ia nga ra ka wahia ia, kahore ano hoki he riri, kahore he whawhai.
- 21
- Ka whakatika ake ano tetahi tangata e whakahaweatia ana ki runga ki tona wahi, ehara ano hoki te kororia o te rangatiratanga i te mea hoatu ki a ia: ka ata haere mai ano ia, ma te patipati ano hoki e riro ai i a ia te kingitanga.
- 22
- A ka taupokina ratou e nga ringaringa o te waipuke i tona aroaro, mongamonga noa ratou; me te rangatira ano hoki o te kawenata.
- 23
- I muri ano i tana whakaaetanga korero ka mahi tinihanga ia: ka haere mai hoki ia, a ka kaha, he torutoru ano hoki ona tangata.
- 24
- Ka tae atu ia ki nga wahi e ata noho ana, ki nga wahi momona rawa o te kawanatanga, ka mahia ano hoki e ia nga mea kihai i mahia e ona mātua, a nga mātua ano hoki o ona mātua; ka titaritaria ano e ia nga mea parakete, nga mea pahua, nga taonga, ki roto ki a ratou: ka whakaaroa ano hoki e ia ana whakaaro mo nga pa, a kia taka ra ano tetahi taima.
- 25
- Ka whakaohokia ano e ia tona kaha me tona maia ki te whawhai ki te kingi o te tonga, he nui te ope; ka oho ano hoki te kingi o te tonga, ka whawhai, he nui, he kaha wkakaharahara te ope; otiia e kore ia e tu: no te mea ka whakaaroa e ratou he whakaaro mona.
- 26
- Ina, ka pakaru ia i te hunga i kai i tana wahi kai, te taua hoki a tera kei te waipuke te rite: he tokomaha ano e hinga, mate rawa.
- 27
- Na, enei kingi tokorua, mo te kino o raua ngakau; i te tepu kotahi ano hoki ka korero teka rawa; otiia ekore e taea; no te mea mo a mua te mutunga, mo a te wa i whakaritea.
- 28
- Katahi ia ka hoki ki tona whenua, he nui ano nga taonga; tona ngakau ano hoki mo te takahi i te kawenata tapu, ka mahi ano hoki ia, a ka hoki atu ki tona whenua.
- 29
- I te wa i whakaritea ka hoki ia, a ka haere mai ki te tonga; otiia e kore e rite ki to mua, ki to muri ranei.
- 30
- No te mea ka rere mai nga kaipuke o Kitimi ki te whawhai ki a ia. Na, ka pouri ia, a ka hoki, ka whakatakariri ano hoki ki te kawenata tapu; na ka mahi ia, a ka hoki, ka whai whakaaro ki te hunga i whakarerea ai te kawenata tapu.
- 31
- Ka whakatika ano hoki etahi ringaringa hei whakauru mona, a ka whakapokea ano hoki te wahi tapu, te wahi kaha, ka whakakahoretia ano hoki e ratou te patunga tapu, te mea tuturu, ka tu ano hoki i a ratou te mea whakarihariha, te mea whakangaro.
- 32
- Na, te hunga e mahi kino ana ki te kawenata ka meinga e ia kia tinihanga, he mea whakapati nana: te hunga ia e mohio ana ki to ratou Atua, ka kaha ratou, ka mahi.
- 33
- Na, te hunga e mātau ana i roto i te iwi, he tokomaha e whakaakona e ratou: he maha ano ia nga ra e hinga ai ratou i te hoari, i te mura, i te whakaraunga, i te pahua.
- 34
- A ka hinga ratou, ka awhinatia mai ratou, he iti ia te awhina: he tokomaha ia e piri ki a ratou, he mea whakapati.
- 35
- Ka hinga ano etahi o te hunga mātau, he mea e tahia ai to ratou para, e poke-kore ai, e ma ai ratou, a taea noatia te wa o te whakamutunga: mo a mua hoki taua mea, mo a te wa i whakaritea.
- 36
- Ka mahia ano hoki e te kingi tana e pai ai, ka whakaneke ake ano hoki i a ia, ka whakanui i a ia ki runga ake i nga atua katoa, he kupu whakamiharo ano hoki āna mo te Atua o nga atua, ka kake ano ia, taea noatia te whakapotonga o te whakatakariri: ka mahia hoki te mea i whakaritea.
- 37
- E kore ano ia e whai whakaaro ki te Atua o ona mātua, ki te matenuitanga wahine; e kore ano e whai whakaaro ki tetahi atua: no te mea ka whakanui ia i a ia ki runga ake i te katoa.
- 38
- Otiia i tona wahi ano ka whakahonoretia e ia te Atua o nga wahi kaha, ae ra, ka whakahonoretia e ia te atua kihai i mohiotia e ona mātua ki te koura, ki te hiriwa, ki te kohatu utu nui, ki nga mea e matenuitia ana.
- 39
- Ko tana tenei e mea ai i nga wahi kaha whakaharahara, tona hoa ko tetahi atua ke, he mea e whakaaetia e ia, whakanuia ake e ia ki te kororia: ka meinga ano ratou e ia hei kawana mo nga tangata tokomaha, ka wehewehea ano hoki e ia te whenua hei mea taonga.
- 40
- I nga wa ano hoki o te mutunga ka kokiri mai te kingi o te tonga ki a ia: kei te paroro te rite o te kokiritanga mai o te kingi o te nota ki a ia, o ana hariata, o ana kai eke hoiho, o ana kaipuke maha; ka tae atu ano ia ki nga whenua, me te mea he waipuke, a tika tonu atu.
- 41
- Ka tae ano ia ki te whenua ataahua, a he maha nga whenua e hinga: ko enei ia e mawhiti mai i roto i tona ringaringa, ko Eroma, ko Moapa, ko nga upoko o nga tamariki a Amona.
- 42
- Ka totoro atu ano hoki tona ringaringa ki nga whenua: e kore ano te whenua o Ihipa e mawhiti.
- 43
- Ko ia ano hei rangatira mo nga taonga, ara, mo te koura, mo te hiriwa, mo nga mea katoa o Ihipa e matenuitia ana, ka whai ano hoki nga Rupimi ratou ko nga Etiopiana i ona takahanga.
- 44
- Otiia, ka raruraru ia i nga korero o te taha ki te ita, ki te nota, na, he nui te riri e puta mai ai ia, he tokomaha ano hoki āna e whakangaro ai, e huna ai.
- 45
- Ka whakaturia ano hoki e ia nga tapenakara, ara, tona whare kingi, ki te takiwa o nga moana, ki te maunga tapu, ki te wahi ataahua; otiia ka tae ia ki tona mutunga, kahore hoki he awhina mona.
Address: 
Phone: 
Email: