- 1
- I taua wa ano ka whakatika a Mikaera, te rangatira nui e tu nei hei hoa mo nga tamariki a to iwi; na, ko te wa o te raruraru, kahore ona rite o te timatanga ra ano o te whaiiwitanga, a taea noatia taua wa nei: i taua wa ano ka mawhiti to iwi, te hunga katoa e kitea kua oti te tuhituhi ki te pukapuka.
- 2
- He tokomaha ano hoki o te hunga e moe ana i te puehu o te oneone e ara ake, etahi ki te oranga tonutanga, etahi ki te whakama, ki te whakarihariha mutunga-kore.
- 3
- Na, te hunga e whai whakaaro ana, to ratou kanapatanga koia ano kei te kanapatanga o te kikorangi, te hunga ano hoki i anga ai nga tangata tokomaha ki te tika, ka rite ratou ki nga whetu, a ake ake ake.
- 4
- Na, kopia atu nga kupu e koe, e Raniera, hiritia ano hoki te pukapuka, a taea noatia te mutunga: he tokomaha e kopikopiko, ka nui haere ano te mātauranga.
- 5
- Katahi ahau a Raniera ka titiro atu, na, ko etahi atu, tokorua, e tu ana tetahi i tenei taha o te parenga o te awa, tetahi i tera taha o te parenga o te awa.
- 6
- Na, ko te meatanga atu ki te tangata i te kakahu rinena, ki tera i runga i nga wai o te awa, Ko ahea ra ano te mutunga o enei mea whakamiharo?
- 7
- I rongo ano ahau i ta te tangata i te kakahu rinena, i ta tera i runga i nga wai o te awa, i te aranga o tona ringa matau, o tona ringa maui whaka-te-rangi, a oatitia ana e ia Te Mea e ora tonu ana, ara, mo te wa kotahi, mo nga wa, mo te hawhe ano hoki: a ka oti tana titaritari i te kaha o te iwi tapu, ka oti enei katoa.
- 8
- Na, taku rongonga ai, kihai ahau i mātau; na, ko taku meatanga ake, E toku Ariki, he aha ra te mutunga o enei mea?
- 9
- Katahi tera ka ki mai, Haere, e Raniera, kua oti hoki nga kupu te kokopi atu, hiri rawa, a taea noatia te mutunga.
- 10
- He tokomaha e whakakorea to ratou paru, e meinga kia ma, to ratou para tahi rawa; ka mahi kino ia te hunga kino, e kore ano tetahi o te hunga kino e mātau; engari te hunga whai whakaaro ka mātau ratou.
- 11
- Na, te takiwa i te whakakahoretanga o te patunga tapu tūturu, o te whakaturanga ano hoki o te mea whakarihariha, o te mea whakangaro, kotahi mano e rua rau e iwa tekau nga ra.
- 12
- Ka hari te tangata e tatari ana, a ka tutuki atu ki nga ra kotahi mano e toru rau e toru tekau ma rima.
- 13
- Na, haere koe, kia taea ra ano te mutunga; ka okioki hoki koe, ka tu ano hoki ki runga ki to wahi i te mutunga o nga ra.
Address: 
Phone: 
Email: