- 1
- Na, i te rua o nga tau o te kingitanga o Nepukaneha ka moea etahi moe e Nepukaneha, raruraru tonu iho tona wairua, kore ake tona moe.
- 2
- Katahi te kingi ka ki atu kia karangatia atu nga tohunga maori, nga kai titiro whetu, nga tohunga makutu, nga Karari, hei whakaatu i ana moe ki te kingi. Na, haere mai ana ratou tu ana i te aroaro o te kingi.
- 3
- Na, ko te meatanga atu a te kingi ki a ratou, Kua moea e ahau he moe, a raruraru ana toku wairua, e mea ana kia mohio i taua moe.
- 4
- Na, ka korero Hiriana mai nga Karari ki te kingi, E te kingi, kia ora tonu koe: korerotia mai te moe ki o pononga, a ma matou e whakaatu tona tikanga.
- 5
- Ka whakahokia mai e te kingi, a ka mea ki nga Karari, Kua ngaro taua mea i a au: ki te kore e whakakitea mai e koutou te moe me tona tikanga ano, ka haehaea koutou, a ka meinga o koutou whare hei puranga paru.
- 6
- Na, ki te whakaaturia mai e koutou te moe, me tona tikanga ano, katahi ka riro aku hakari ma koutou, nga utu, me te honore nui; na, whakaaturia mai te moe ki a au me tona tikanga ano.
- 7
- I whakahokia mai ano e ratou i mea, Ma te kingi e korero mai te moe ki ana pononga, a ma matou e whakaatu tona tikanga.
- 8
- I whakahokia atu e te kingi; i mea ia, E mohio rawa ana ahau e whai ana koutou kia roa, no te mea ka kite koutou kua ngaro atu taua mea i a au.
- 9
- Na, ki te kore e whakaaturia mai e koutou te moe ki a au, kotahi tonu te ture mo koutou; no te mea he teka, he tinihanga nga kupu kua rite mai na i a koutou hei korerotanga ki toku aroaro, a kia puta ke ra ano te wa: na, korerotia mai ra te moe ki a au, a ka mohio ahau e taea ana ano e koutou te whakaatu tona tikanga ki a au.
- 10
- I whakahokia mai e nga Karari ki te aroaro o te kingi, i mea ratou, Kahore he tangata i runga i te whenua hei whakaatu i te mea a te kingi: kahore ano hoki he kingi, kahore he rangatira, kahore he ariki, i ui i nga mea penei ki tetahi tohunga maori, ki tetahi kai titiro whetu, ki tetahi Karari ranei.
- 11
- He mea nui rawa hoki tenei e uia nei e te kingi, kahore atu hoki he kai whakaatu ki te kingi, ko nga atua anake ehara nei i te kikokiko to ratou nohoanga.
- 12
- Na, ka riri te kingi, nui atu te whakatakariri, kīa iho e ia nga tangata whakaaro nui katoa o Papurona kia whakangaromia.
- 13
- Na, kua puta te ture kia patua nga tangata whakaaro nui; a ka rapua a Raniera ratou ko ona hoa kia patua.
- 14
- Na, he mohio, he nui te whakaaro, i oho mai ai a Raniera ki a Arioko, ki te rangatira o nga kai tiaki o te kingi, i puta mai nei ki te patu i nga tangata whakaaro nui o Papurona.
- 15
- I oho mai ia, i mea ki a Arioko, ki ta te kingi rangatira, He aha i hohoro mai ai te ture i te kingi? Katahi taua mea ka whakaaturia mai e Arioko ki a Raniera.
- 16
- Na, ko te haerenga atu o Raniera ki roto, mea atu ana ia ki te kingi kia whakaritea mai e ia tetahi wa ki a ia, a ka whakaaturia atu e ia te tikanga ki te kingi.
- 17
- Te tino haerenga o Raniera ki tona whare, whakakitea atu ana e ia taua mea ki ona hoa ki a Hanania, ratou ko Mihaera, ko Ataria:
- 18
- Kia inoia ai e ratou etahi mahi tohu i te Atua o te rangi, he mea mo tenei mea ngaro; kei mate a Raniera, ratou ko ona hoa, me era atu tangata whakaaro nui o Papurona.
- 19
- Na, kua whakapuakina mai taua mea ngaro ki a Raniera, he mea moemoea i te po, a whakapai atu ana a Raniera ki te Atua o te rangi.
- 20
- I oho mai a Raniera, i mea, Kia whakapaingia te ingoa o te Atua, a ake ake ake, nona hoki te whakaaro nui me te kaha.
- 21
- E whakaputaina ketia ana hoki e ia nga wa me nga ra: e whakakahoretia ana e ia nga kingi, e whakaturia ana ano nga kingi e ia: e homai ana e ia te whakaaro nui ki te hunga whakaaro nui, te mātauranga ano hoki ki te hunga e mātau ana ki te whakaaro;
- 22
- E whakapuakina mai ana e ia nga mea hohonu, nga mea ngaro: e matau ana ia ki nga mea o te pouritanga: kei a ia te nohoanga o te māramatanga.
- 23
- Whakawhetai tonu ahau ki a koe, whakamoemiti tonu ki a koe, e te Atua o oku mātua, nau nei hoki i homai nga whakaaro nui me te kaha ki a au, a whakaaturia mai ana e koe ki a au nga mea i inoi ai matou ki a koe: kua whakaaturia mai nei hoki e koe te mea a te kingi ki a matou.
- 24
- Na, haere ana a Raniera ki a Arioko, ki ta te kingi i whakarite ai hei whakangaro mo nga tangata whakaaro nui o Papurona; haere atu ana ia, a ko tana kupu tenei ki a ia, Kaua e whakangaromia nga tangata whakaaro nui o Papurona: kawea atu ahau ki te aroaro o te kingi, a maku e whakakite atu te tikanga ki te kingi.
- 25
- Na, hohoro tonu ta Arioko kawe atu i a Raniera ki te aroaro o te kingi; ko tana kupu ano tenei ki a ia, Kua kitea e ahau he tangata i roto i nga whakarau o Hura hei whakakite i te tikanga ki te kingi.
- 26
- Ka oho mai te kingi, a ka mea ki a Raniera, tona ingoa nei ko Peretehatara; E taea ranei e koe te whakaatu mai te moe i kitea e ahau, me tona tikanga ano ki a au?
- 27
- Ka whakahokia mai e Raniera i te aroaro o te kingi, a ka mea, E kore taua mea ngaro i uia mai ra e te kingi e taea te whakaatu e te hunga whakaaro nui, e nga kai titiro whetu, e nga tohunga maori, e nga tohunga tuāhu, ki te kingi;
- 28
- Engari kei te rangi te Atua hei whakaatu i nga mea ngaro; e whakakitea mai ana e ia ki a kingi Nepukaneha nga mea e puta mai i nga ra whakamutunga. Ko to moe tenei, me nga mea i kitea e to māhunga i runga i to moenga;
- 29
- Tau na, e te kingi, he whakaaro nau i puta ake i runga i to moenga mo nga mea e puta mai a mua: e whakakitea mai ana ki a koe e te kai whakaatu o nga mea ngaro, nga mea e puta mai a mua.
- 30
- Na, ahau nei, ehara i te mea he nui atu oku whakaaro i o tetahi tangata ora, i whakapuakina mai ai tenei mea ngaro ki a au; engari kia whakakitea atu ai tona tikanga ki te kingi, kia mohio ai hoki koe ki nga whakaaro o to ngakau.
- 31
- Titiro rawa atu koe, e te kingi, na, ko tetahi whakapakoko nui. Taua whakapakoko nui nei, nui atu te kanapa, tu tonu ki to aroaro; he hanga whakawehi rawa tona ahua.
- 32
- Te pane o taua whakapakoko he koura para-kore; tona uma, ona ringaringa, he hiriwa; tona kopu, ona huha, he parahi,
- 33
- Ona waewae he rino, ona raparapa, he rino tetahi wahi, he uku tetahi wahi.
- 34
- Titiro tonu atu koe, na, ko tetahi kohatu, he mea tapahi mai, kahore hoki he ringaringa, aki tonu mai ki te whakapakoko, ki ona raparapa, he rino nei tetahi wahi, he uku tetahi wahi, wahia putia iho.
- 35
- Na, mongamonga ngatahi te rino, te uku, te parahi, te hiriwa, te koura, kua rite ki te papapa o nga patunga witi i te raumati; kahakina atu ana e te hau, a kahore noa iho i kitea he wahi mo aua mea. Na, te kohatu i akina ai te whakapakoko, kua meinga hei maunga nui, kapi ana te whenua katoa i a ia.
- 36
- Ko te moe tenei. Na, me korero atu tona tikanga e matou ki te aroaro o te kingi.
- 37
- Ko koe, e te kingi, te kingi o nga kingi, kua homai hoki e te Atua o te rangi he kingitanga ki a koe, he kaha, he mana, he kororia.
- 38
- Na, nga wahi katoa e nohoia ana e nga tamariki a te tangata, nga kararehe o te parae, nga manu o te rangi, homai ana e ia ki tou ringaringa, kua oti ano koe te mea e ia hei rangatira mo ratou katoa. Ko koe taua pane koura.
- 39
- Na, ka puta ake tetahi atu kingitanga i muri i a koe, iti iho i a koe, me tetahi atu, ara, te tuatoru o nga kingitanga, he parahi, a ka whakahaere tikanga tera mo te whenua katoa.
- 40
- Na, te wha o nga kingitanga ka rite ki te rino te kaha: he mea wawahi hoki te rino, he mea hoki e taea ai e ia nga mea katoa: ka rite ano hoki ki ta te rino e wawahi nei i enei katoa tana wawahi, tana kuru.
- 41
- Na, to kitenga, i nga raparapa, i nga matimati, he uku na te kai pokepoke tetahi wahi, he rino tetahi wahi, ka wehea te kingitanga; ka mau ano ia he kaha rino i roto, ka pera ano me te rino i kitea e koe e whakauruuru ana ki roto ki te uku paru na.
- 42
- Na, nga matimati o nga raparapa ra, he rino nei tetahi wahi, he uku tetahi wahi, ka pena ano te kingitanga, ka kaha tetahi wahi, tetahi wahi he mea ngahorohoro.
- 43
- Na, to kitenga i te rino e whakauru ana ki roto ki te uku paru na, ka whakauru ano ratou ki roto ki nga uri tangata: e kore ia e piri tetahi ki tetahi, ka rite ki te rino e kore nei e uru ki roto ki te uku.
- 44
- Na, i nga ra o enei kingi, ka whakaturia e te Atua o te rangi he kingitanga e kore e ngaro. Na, e kore te kingitanga e waiho mo tetahi atu iwi; engari ko tera hei wahi, hei whakamoti i enei kingitanga katoa, ko ia ano ka tu tonu, a ake ake ake.
- 45
- Na, i kite na koe he mea tapahi mai te kohatu i roto i te maunga, kahore hoki he ringaringa, a mongamonga noa i a ia te rino, te parahi, te uku, te hiriwa, te koura; e whakapuakina mai ana e te Atua nui ki te kingi nga mea e puta mai amua: na, tūturu rawa te moe, pumau tonu tona tikanga.
- 46
- Te tino tapapatanga iho o Kingi Nepukaneha koropiko atu ana ki a Raniera, whakahaua tonutia iho e ia kia whakaherea he whakahere me nga whakakakara reka ki a ia.
- 47
- I oho mai te kingi ki a Raniera, i mea, Tika rawa, ko tou Atua te Atua o nga atua, te Ariki o nga kingi, te kai whakapuaki o nga mea ngaro, ka taea nei hoki e koe te whakapuaki tenei mea ngaro.
- 48
- Na, ka meinga a Raniera e te kingi hei tangata rahi, he maha ano nga hakari nui i homai e ia ki a ia, i waiho ano ia hei kawana mo te kawanatanga katoa o Papurona, hei tino kawana ano hoki mo nga tangata whakaaro nui katoa o Papurona.
- 49
- Katahi a Raniera ka tono ki te kingi, a whakaritea ana e ia a Hataraka, a Mehaka, a Apere-neko hei kai tirotiro mo nga mea o te kawanatanga o Papurona: ko Raniera ia i noho ki te kuwaha o te kingi.
Address: 
Phone: 
Email: