- 1
- I hangā he whakapakoko koura e Kingi Nepukaneha, tona roa e ono tekau nga whatianga, tona whanui e ono nga whatianga: whakaturia ana e ia ki te mānia o Rura i to Papurona kawanatanga.
- 2
- Katahi a Nepukaneha ka tono tangata atu ki te huihui mai i nga ariki, i nga kawana, i nga rangatira, i nga kai whakarite whakawa, i nga kai tiaki taonga, i nga kai whakatakoto whakaaro, i era atu rangatira, i nga kawana katoa ano hoki o nga kawanatanga, kia haere mai ki te tāinga o te kawa o te whakapakoko i whakaturia e Kingi Nepukaneha.
- 3
- Katahi nga ariki, nga kawana, nga rangatira, nga kai whakarite whakawa, nga kai tiaki taonga, nga kai whakatakoto whakaaro, era atu rangatira, me nga kawana katoa o nga kawanatanga ka huihui mai ki te tāinga o te kawa o te whakapakoko kua oti nei te whakatu e Kingi Nepukaneha; na, tu ana ratou ki te aronga o te whakapakoko kua oti nei te whakatu e Nepukaneha.
- 4
- Na, nui atu te karanga a te kai karanga, He whakahau tenei ki a koutou, e nga tangata, e nga iwi, e nga reo,
- 5
- Ka rongo koutou i te tangi o te korenete, o te putorino, o te hāpa, o te hakaputa, o te hatere, o te taratimere, o nga mea tangi katoa, me takoto koutou, me koropiko ki te whakapakoko koura ka oti nei te whakatu e Kingi Nepukaneha.
- 6
- Na, ki te kahore tetahi e takoto, e koropiko, i taua haora ano ka makā ia ki waenganui o te oumu he mura rawa nei te ngiha.
- 7
- I taua wa tonu ano i te rongonga o te iwi katoa i te tangi o te korenete, o te putorino, o te hāpa, o te hakaputa, o te hatere, o nga mea tangi katoa, takoto tonu iho nga tangata katoa, nga iwi, nga reo, koropiko ana ki te whakapakoko koura kua oti nei te whakatu e Kingi Nepukaneha.
- 8
- Na, i taua wa ano ka haere mai etahi Karari, ka whakahe i nga Hurai,
- 9
- I korero ratou, i mea ki a Kingi Nepukaneha, E te kingi, kia ora tonu koe.
- 10
- I whakatakotoria he ture e koe, e te kingi, na, nga tangata katoa e rongo ana i te tangi o te koronete, o te putorino, o te hāpa, o te hakaputa, o te hatere, o te taratimere, o nga mea tangi katoa, kia takoto ratou, kia koropiko ki te whakapakoko koura.
- 11
- A ki te kahore tetahi e takoto, e koropiko, kia makā ia ki te oumu he mura rawa te ngiha.
- 12
- He Hurai enei, he hunga i waiho e koe hei kai tirotiro mo nga mea o te kawanatanga o Papurona, ko Hataraka, ko Mehaka, ko Apere-neko; kihai enei tangata i whakaaro ki a koe, e te kingi, e kore ratou e mahi ki o atua, e kore ano e koropiko ki te whakapakoko koura ka oti nei te whakatu e koe.
- 13
- Na ka riri a Nepukaneha, weriweri ana: ki atu ana ia kia kawea mai a Hataraka, a Mehaka, a Apere-neko. Na kawea mai ana e ratou enei tangata ki te aroaro o te kingi.
- 14
- I korero atu a Nepukaneha, i mea ki a ratou, He pono ranei, e Hataraka, e Mehaka, e Apere-neko, kahore koutou e mahi ki oku atua, kahore e koropiko ki te whakapakoko koura ka oti nei te whakatu e ahau?
- 15
- Na, ki te mea ka rite a koutou whakaaro i te wa e rongo ai koutou i te tangi o te korenete, o te putorino, o te hāpa, o te hakaputa, o te hatere, o te taratimere, o nga mea tangi katoa, a ka takoto koutou, ka koropiko ki te whakapakoko i hangā e ahau; e pai ana; tena ko tenei e kore koutou e koropiko, ka makā koutou i taua haora ki roto ki te oumu he mura rawa tona ngiha, a ko wai te Atua hei whakaora i a koutou i roto i oku ringa?
- 16
- I whakahokia mai e Hataraka, e Mehaka, e Apere-neko, i mea ratou ki te kingi, E Nepukaneha, kahore a matou maharahara ki te whakahoki kupu atu ki a koe mo tenei mea.
- 17
- Ki te penatia, e taea ano e to matou Atua, e karakiatia nei e matou, te whakaora matou i roto i te oumu he mura rawa nei te ngiha, ina, ka whakaorangia ano matou e ia i roto i tou ringa, e te kingi.
- 18
- A, ka kore, kia mohio koe, e te kingi, e kore matou e mahi ki o atua, e kore ano e koropiko ki te whakapakoko koura kua oti na te whakatu e koe.
- 19
- Na, kī tonu a Nepukaneha i te whakatakariri, rereke ana te ahua o tana mata ki a Hataraka, ratou ko Mehaka, ko Apere-neko: korero mai ana ia, whakahau mai ana kia whitu nga whakanekehanga ake o te hana o te oumu i to mua hana.
- 20
- I whakahau ano ia i nga tangata kaha rawa o tana ope kia herea a Hataraka, a Mehaka, a Apere-neko, kia māka ratou ki roto ki te oumu he mura rawa nei te ngiha.
- 21
- Na, kua herea nei enei tangata, i a ratou ano o ratou koti, o ratou kakahu o roto, o ratou potae, me era kakahu ano o ratou, kua makā ki roto ki te oumu he mura rawa nei tona ngiha.
- 22
- Na, he kaha rawa ta te kingi whakahau, nui rawa ano hoki te hahana o te ahi, aua tangata i hapainga ake ai a Hataraka, a Mehaka, a Apere-neko, mate iho ratou i te mura o te ahi.
- 23
- Na, taka ana aua tangata tokotoru, a Hataraka, a Mehaka, a Apere-neko, ki waenganui o te oumu he mura rawa nei tona ngiha.
- 24
- Te tino miharotanga o Nepukaneha, hohoro tonu tona whakatika ake, kei te korero, kei te mea ki ana kai whakatakoto whakaaro, He teka ianei tokotoru nga tangata i makā e tatou ki waenganui o te ahi? Ka whakahokia mai e ratou, a ka mea ki te kingi, He tika ano, e te kingi.
- 25
- Ka whakahokia mai e ia a ka mea, Nana, tokowha nga tangata e kitea nei e ahau, kahore he here, e haereere ana i waenganui o te ahi, kahore hoki e ahatia; na, te ahua o te tokowha kei to te Tama a te Atua.
- 26
- Na, ko te whakatatanga mai o Nepukaneha ki te kuwaha o te oumu he mura rawa nei te ngiha, kei te korero, kei te mea, E Hataraka, e Mehaka, e Apere-neko, e nga pononga o te Atua o runga rawa, puta mai, haere mai hoki. Katahi a Hataraka, ratou ko Mehaka, ko Apere-neko ka haere mai i waenganui i te ahi.
- 27
- Na, te huihuinga o nga ariki, o nga kawana, o nga rangatira, o nga kai whakatakoto whakaaro a te kingi, ka kite ratou i enei tangata, kihai nei te ahi i whai kaha ki o ratou tinana, kihai ano tetahi makawe o o ratou māhunga i mimingo, kihai ano o ratou koti i wera, kihai ano hoki te piro ahi i rere i runga i a ratou.
- 28
- Katahi a Nepukaneha ka korero, ka mea, Kia whakapaingia te Atua o Hataraka, o Mehaka, o Apere-neko, nana nei hoki i unga mai tana anahera, a whakaorangia mai ana e ia ana pononga i whakawhirinaki nei ki a ia, i whakaputa ke nei i te kupu a te kingi, a tukua ana e ratou o ratou tinana, he mea kei mahi ratou, kei koropiko ki tetahi atu atua, engari ki to ratou Atua anake.
- 29
- Na, ko taku ture tenei e whakatakotoria atu nei, na, nga tangata, te iwi, te reo, he kupu kino nei tana mo te Atua o Hataraka, o Mehaka, o Apere-neko, ka haehaea ratou, a ka meinga o ratou whare hei puranga paru: no te mea kahore atu he atua e rite tana whakaoranga ki tenei.
- 30
- I whakanekehia ake ano hoki a Hataraka, a Mehaka, a Apere-neko e te kingi i te kawanatanga o Papurona.
Address: 
Phone: 
Email: