- 1
- Na nepukaneha, na te kingi ki nga tangata katoa, ki nga iwi, ki nga reo e noho ana i te whenua katoa; Kia whakanuia to koutou rangimarie.
- 2
- I mea ahau e pai ana kia whakakitea atu nga tohu me nga mea whakamiharo i mahia nei e te Atua o runga ki a au.
- 3
- Ano te nui o ana tohu! ano te nui o ana mea whakamiharo! tona kingitanga he kingitanga mau tonu, tona kawanatanga kei tera whakatupuranga, kei tera whakatupuranga.
- 4
- I te ata noho ahau a Nepukaneha i roto i toku whare, koa tonu i roto i toku whare kingi:
- 5
- Ka kite ahau i tetahi moe i wehi ai ahau, raruraru ana ahau i nga whakaaro i runga i toku moenga, i nga mea ano hoki i kitea e toku māhunga.
- 6
- Na, kua puaki taku ture kia kawea mai nga tangata whakaaro nui katoa o Papurona ki toku aroaro, kia whakakitea mai ai e ratou te tikanga o te moe ki a au.
- 7
- Na, te haerenga mai o nga tohunga maori, o nga kai titiro whetu, o nga Karari, ratou ko nga tohunga tuāhu, korerotia atu ana e ahau te moe ki to ratou aroaro: heoi kihai i whakaaturia mai e ratou tona tikanga ki a au.
- 8
- Nawai a, kua tae mai ki toku aroaro a Raniera, tona ingoa nei ko Peretehatara, he mea i rite ki te ingoa o toku atua, he tangata kei a ia nei te wairua o nga atua tapu, a korerotia atu ana e ahau te moe ki tona aroaro; i mea ahau,
- 9
- E Peretehatara, e te rangatira o nga tohunga maori, e mohio ana hoki ahau kei a koe te wairua o nga atua tapu, e kore ano koe e he ki tetahi mea ngaro, whakaaturia mai ki a au nga mea i puta mai, te moemoea i kite ai ahau, me te tikanga ano o aua mea.
- 10
- Ko nga mea enei i kitea e toku māhunga i runga i toku moenga; titiro rawa atu ahau, na, ko tetahi rakau i waenganui o te whenua, nui atu tona tiketike.
- 11
- Kua tupu taua rakau, kua kaha, roa tonu, tutuki tonu ki te rangi, he mea hoki i kitea mai i nga pito o te whenua katoa.
- 12
- Ataahua tonu nga rau, he maha nga hua, i runga i a ia he kai ma te katoa: i whai taumarumarunga iho nga kirehe o te parae i raro i a ia, i noho ano hoki nga manu o te rangi i runga i ona manga, i reira hoki nga kikokiko katoa e kai ana.
- 13
- I kite ahau i roto i nga mea i kitea e toku māhunga i runga i toku moenga, na, ko tetahi tutei, he mea tapu ano hoki, e heke iho ana i runga i te rangi;
- 14
- Nui atu tana karanga; i mea ia, Tuaina te rakau, poutoutoa ona manga, whakahoroa atu ona rau, titaritaria atu ona hua; kia haere atu nga kararehe i raro i a ia, me nga manu ano i ona manga:
- 15
- Me waiho ano ia te take o ona pakiaka i te whenua, here rawa ki te rino, ki te parahi, i roto i te taru hou o te parae; kia maku ano i te tomairangi o te rangi; na, te wahi mana kei ta nga kararehe, kei te tarutaru o te whenua:
- 16
- Kia puta ke tona ngakau tangata, a kia hoatu he ngakau kararehe ki a ia, kia whitu ano hoki ona wa e taka.
- 17
- Tenei mea he mea whakatakoto na nga tutei; he mea ki mai ano hoki na te kupu a nga mea tapu: kia mohio ai te hunga ora kei te whakahaere tikanga te Runga-rawa i roto i te kingitanga o nga tangata, a e hoatu ana e ia tana e pai ai, e meinga ana hoki e ia nga ware rawa o nga tangata hei rangatira mo reira.
- 18
- Tenei moe, he mea kite naku na Kingi Nepukaneha. Na, mau, e Peretehatara, e whakaatu mai tona tikanga, kahore nei hoki i taea e nga tangata whakaaro nui katoa o toku kingitanga te whakaatu te tikanga ki a au; engari koe he mea mana; kei roto na hoki i a koe te wairua o nga atua tapu.
- 19
- Na, ketekete kau ana a Raniera, tona ingoa nei ko Peretehatara, kotahi te haora, raru ana ia i ana whakaaro, Ka korero mai te kingi, a ka mea, Kei raruraru koe, e Peretehatara, i te moe, i tona tikanga ranei. Ka whakahokia mai e Peretehatara, a ka mea, E toku Ariki, kia waiho tenei moe ma te hunga e kino ana ki a koe, me tona tikanga ano mo o hoa riri.
- 20
- Te rakau i kite na koe, tera i tupu, i kaha ra, i roa, a tutuki atu ana ki te rangi, i kitea mai ano hoki e te whenua katoa;
- 21
- He ataahua nei ona rau, he maha ano hoki ona hua, he kai ano hoki i runga ma te katoa, a noho ana nga karahehe o te parae i raro i a ia, he nohoanga ano hoki a runga i ona manga no nga manu o te rangi:
- 22
- Taua rakau na, ko koe, e te kingi, kua tupu na hoki koe, kua kaha; kua tupu na hoki tou nui, kua tutuki atu ki te rangi, me to kingitanga ano ki te pito o te whenua.
- 23
- Na, te tutei ra i kitea e te kingi, te mea tapu hoki i heke iho i te rangi, a i mea, Tuaina te rakau, whakangaromia; me waiho ano ia te take o ona pakiaka ki te whenua, here rawa ki te rino, ki te parahi, i te taru hou o te parae; kia maku ano hoki koe i te tomairangi o te rangi; a te wahi māna, hei ta nga kararehe o te parae, kia taka ra ano ona wa e whitu;
- 24
- Ko te tikanga tenei, E te kingi, ko te ture ano tenei a te Runga-rawa ka tae nei ki runga ki toku ariki, ki te kingi:
- 25
- Ara, kia aia atu koe i roto i nga tangata, a ki nga kararehe o te parae he nohoanga mou, kia meinga ano koe kia kai tarutaru, kia pera ano me nga kau, kia maku ano hoki i te tomairangi o te rangi, e whitu ano hoki nga wa ou ka taka, kia mohio ra ano koe kei te whakahaere tikanga a te Runga-rawa i roto i te kingitanga o nga tangata, a e hoatu ana e ia ki tana e pai ai.
- 26
- Na, te kianga mai ra kia waiho te take o nga pakiaka o te rakau: ka pumau ki a koe to kingitanga, ina mohio koe ko nga rangi hei whakahaere tikanga.
- 27
- Na, kia manakohia mai taku whakaaro e koe, e te kingi, kia whatīa atu ano hoki ou hara e te tika, kia whatīa ano o kino e te mahi tohu ki nga rawa-kore, a tera pea e roa to ata noho.
- 28
- I pa katoa mai tenei ki a Kingi Nepukaneha.
- 29
- I te mutunga o nga marama kotahi tekau ma rua e haereere ana ia i te whare kingi i te kingitanga o Papurona.
- 30
- Ka korero te kingi, ka mea, He teka ianei ko Papurona nui tenei i hangā e ahau hei whare mo te kingitanga; he nui no toku kaha, hei whakahonore ano hoki mo toku kororia?
- 31
- I te kupu ano i te mangai o te kingi ka pa mai he reo no te rangi, E Kingi Nepukaneha, he kupu tenei ki a koe, Ka riro to kingitanga.
- 32
- Ka aia atu ano koe i roto i nga tangata, a te kāinga mou kei nga kararehe o te parae: ka meinga koe kia kai tarutaru, kia pera ano me nga kau, e whitu nga wa ou ka taka, kia mohio ra ano koe kei te whakahaere tikanga a te Runga-rawa i roto i te kingitanga o nga tangata, a e hoatu ana e ia ki tana e pai ai.
- 33
- I taua haora ano ka rite taua mea ki a Nepukaneha: na, ka aia atu ia i roto i nga tangata, a kai tarutaru ana ia, pera ana me nga kau, i maku ano hoki tona tinana i te tomairangi o te rangi, tupu noa iho ona huruhuru, kei nga huruhuru ekara te rite, ona matikuku rite tonu ki o te manu.
- 34
- Na, i te mutunga o nga ra ka anga ake nga kanohi oku, o Nepukaneha, ki te rangi, a hoki mai ana toku ngakau mahara ki a au, a whakapaingia ana a te Runga-rawa e ahau, whakamoemiti atu ana ahau, whakahonore ana i a ia, e ora tonu ana hoki ia, he rangatiratanga mau tonu ano hoki tona rangatiratanga, tona kingitanga ano hoki kei tera whakatupurunga, kei tera whakatupuranga.
- 35
- Ki te whakaaro iho ano hoki he kahore noa iho nga tangata katoa o te whenua: a e mahia ana e ia tana e pai ai i roto i te ope o te rangi, i nga tangata ano hoki o te whenua; e kore ano tona ringa e taea te pupuri e tetahi, kahore hoki he kianga atu ki a ia, E aha ana koe?
- 36
- I taua wa ano ka hoki mai oku mahara ki a au, i hoki mai ano toku honore me toku ahua rangatira ki a au, hei whakakororia mo toku kingitanga; i rapua mai ano ahau e oku kai whakatakoto whakaaro, e oku ariki; na, ka u ahau i roto i toku kingitanga, he nui whakaharahara ano hoki te kororia i whakanekehia ake moku.
- 37
- Na, tenei ahau a Nepukaneha te whakamoemiti, te whakanui, te whakahonore nei i te Kingi o te rangi, he pono hoki ana mahi katoa, ana ara he whakarite whakawa: te hunga ano hoki e haere ana i runga i te whakapehapeha ka taea ratou e ia te whakaiti.
Address: 
Phone: 
Email: