- 1
- I tukua he hakari nui e Kingi Perehatara ma etahi o ana ariki, kotahi te mano, a inu waina ana ia i te aroaro o te mano.
- 2
- I te mea e inu waina ana a Perehatara, ka ki ia kia kawea mai nga oko, nga mea koura, nga mea hiriwa i tangohia mai e tona pāpā e Nepukaneha i roto i te temepera i Hiruharama, hei mea inu ma te kingi ratou ko ana rangatira, ko ana wahine, ko ana wahine hoahoa.
- 3
- Na, ka kawea mai e ratou nga oko koura i tangohia mai i roto i te temepera o te whare o te Atua i Hiruharama; a hei mea inu ena ma te kingi, ratou ko ana ariki, ko ana wahine, ko ana wahine hoahoa.
- 4
- Inu waina ana ratou, a whakamoemititia ana e ratou nga atua, nga mea koura, hiriwa, parahi, rino, rakau, kohatu.
- 5
- I taua haora ano ka puta mai nga maihao o tetahi ringaringa tangata, kei te tuhituhi ki te ritenga ake o te turanga rama, ki te mea i pania ki te taha o te whare o te kingi: a ka kite te kingi i te wahi o te ringaringa i tuhituhia ai.
- 6
- Na, kua puta ke te mata o te kingi, raruraru ana ia i ana whakaaro, a tangoro iho nga hononga o tona hope, kei te aki mai ano ona turi ki a raua.
- 7
- Na, nui atu te karanga a te kingi kia kawea mai nga kai titiro whetu, nga Karari, nga tohunga tuāhu. I korero mai ano te kingi, i mea ki nga tangata whakaaro nui o Papurona, Te tangata e korerotia ai tenei tuhituhinga, a ka whakaaturia mai ano e ia tona tikanga ki a au, he ngangana te kakahu mona, na, mo tona kaki he mekameka koura, a ko ia ano hei rangatira tuatoru i te kingitanga.
- 8
- Na, ko te haerenga mai o nga tangata whakaaro nui katoa a te kingi: heoi kihai i ahei te korero i te tuhituhinga, kihai ano i whakaaturia tona tikanga ki te kingi.
- 9
- Na, nui atu te raruraru o Kingi Perehatara, kua puta ke tona mata, a miharo ana āna ariki.
- 10
- Na, ka haere mai te kuini ki te whare hakari, he meatanga hoki ki nga kupu a te kingi ratou ko ana ariki: kaki taha korero mai te kuini, a ka mea, E te kingi, kia ora tonu koe: kei raruraru koe i o whakaaro, kei puta ke ano hoki to mata.
- 11
- He tangata tenei i to kingitanga, kei a ia nei te wairua o nga atua tapu; i nga ra ano hoki o to pāpā i kitea te māramatanga, te mohio, me nga whakaaro nui i roto i a ia, he mea e rite tonu ana ki nga whakaaro nui o nga atua, a meinga ana ia e to pāpā, e Kingi Nepukaneha, ae ra, e to pāpā, e te kingi, hei rangatira mo nga tohunga maori, ratou ko nga kai titiro whetu, ko nga Karari, ko nga tohunga tuāhu:
- 12
- Pai atu ra hoki te wairua i roto i taua Raniera i huaina nei e te kingi, ko Peretehatara, he matauranga, he mohiotanga, he whakaatu i nga moe, he whakakite mai i nga kupu pakeke: tareka ana i a ia nga mea e mau ana. Na, kia karangatia a Raniera, a mana e whakakite mai te tikanga.
- 13
- Katahi ka kawea mai a Raniera ki te aroaro o te kingi. A ka korero mai te kingi, ka mea ki a Raniera, ko taua Raniera ranei koe, ko tera i roto i nga tamariki o nga whakarau o Hura, i kawea mai nei e te kingi e toku pāpā i Huria?
- 14
- Kua rongo ahau ki a koe, kei roto i a koe te wairua o nga atua, a e kitea ana te māramatanga i roto i a koe, te matauranga, me nga whakaaro nui e pai rawa ana.
- 15
- Na, kua kawea mai nei nga tangata whakaaro nui, nga kai titiro whetu, ki toku aroaro, kia korerotia ai e ratou tenei tuhituhinga, kia whakaaturia mai ai e ratou tona tikanga ki a au: heoi kihai i taea e ratou te whakaatu mai te tikanga o taua mea.
- 16
- Kua rongo ano hoki ahau ki a koe, ka taea e koe te whakaatu tikanga, a ka tareka i a koe nga mea e mau ana. Na, ki te taea e koe te tuhituhinga te korero, a ka whakaaturia mai tona tikanga ki a au, he ngangana te kakahu mou, he mekameka koura ano tenei mo te kaki, ko koe ano hoki hei rangatira tuatoru i te kingitanga.
- 17
- Na, ka whakahokia mai e Raniera, a ka mea ki te aroaro o te kingi, Mau ano au hakari, hoatu ano o utu ki tetahi atu; me korero ano ia e ahau te tuhituhinga ki te kingi, me whakaatu ano te tikanga ki a ia.
- 18
- E te kingi, i homai e te Atua o runga rawa he kingitanga ki to pāpā ki a Nepukaneha, he nui, he kororia, he honore.
- 19
- Na taua nui ano i homai ra e ia ki a ia i wiri ai nga tangata katoa, nga iwi, nga reo, i wehi ai i tona aroaro: āna i pai ai whakamatea ana e ia, āna i pai ai i whakaorangia e ia, āna i pai ai whakaturia ana e ia, āna i pai ai whakaititia iho e ia.
- 20
- A ka whakakake tona ngakau, ka pakeke ano hoki tona hinengaro i runga i te whakapehapeha, na, kua whakatakā ia i runga i tona torona kingi, whakakahoretia iho tona kororia.
- 21
- A aia atu ana ia i roto i nga tamariki a te tangata, kua meinga ano hoki tona ngakau kia rite ki o nga kararehe; i nga kaihe mohoao ano hoki tona nohoanga, he mea whangai ano ia ki te tarutaru, ano he kau; i maku ano hoki tona tinana i te tomairangi o te rangi, a mohio noa ia kei te whakahaere tikanga te Atua o runga rawa i roto i te kingitanga o nga tangata, a e whakaritea ana e ia ma tana e pai ai.
- 22
- Na, ko koe, ko tana tama, e Perehatara, kihai i whakaititia e koe to ngakau, me te mohio ano koe ki tenei katoa;
- 23
- Heoi whakakake ana koe ki te Ariki o te rangi, kua oti ano hoki nga oko o tona whare te kawe mai ki tou aroaro, kua inu waina ano koe ki aua mea, koutou ano ko o ariki, ko o wahine, ko o wahine iti; kua whakamoemiti ano koe ki nga atua, ki nga mea hiriwa, koura, parahi, rino, rakau, kohatu, e kore nei e kite, e kore e rongo, e kore e mohio: na, te Atua kei tona ringa nei to manawa, nana nei o huarahi katoa, kihai ia i whakakororiatia e koe.
- 24
- Katahi ka ungā atu te wahi o te ringaringa i tona aroaro; na, kua oti tenei mea te tuhituhi.
- 25
- Na, ko te mea tenei i tuhituhia, MENE, MENE, TEKERE, UPARAHINI.
- 26
- Ko te tikanga tenei o te mea: MENE; Kua oti to kingitanga te tatau e te Atua, mutu pu i a ia.
- 27
- TEKERE; Kua oti koe te pauna ki te pauna, a kua kitea tou koha.
- 28
- PEREHE; Kua oti to kingitanga te wahi, kua hoatu ano hoki ki nga Meri, ki nga Pahi.
- 29
- Katahi a Perehatara ka whakahau, a whakakakahuria ana a Raniera e ratou ki te mea ngangana, whakanohoia ana e ratou he mekameka koura ki tona kaki, karangarangatia ana ia e ratou ko ia te rangatira tuatoru o te kingitanga.
- 30
- I taua po ano ka patua a Perehatara kingi o nga Karari.
- 31
- A riro ana te kingitanga i a Tariuha Meri: ona tau e ono tekau ma rua.
Address: 
Phone: 
Email: