- 1
- I te tuatahi o nga tau o Perehatara kingi o Papurona, ka moea he moe e Raniera, i kitea ano he mea e tona māhunga i runga i tona moenga: na, tuhituhia ana e ia te moe, a korerotia atu ana te tikanga o nga korero.
- 2
- I korero a Raniera, i mea, I kite ahau i roto i taku moe i te po, na, ko nga hau e wha o te rangi e ngangare ana i runga i te moana nui.
- 3
- E wha ano hoki nga kararehe nui i puta ake i te moana, rerekē tonu tetahi, tetahi.
- 4
- I rite te tuatahi ki te raiona, he parirau ekara ano hoki ona: titiro tonu atu au, na, kua hutia atu ona parirau, a kua ara atu ia i runga i te whenua, kua meinga ano kia tu ona waewae, ano he tangata; i homai ano hoki he ngakau tangata ki a ia.
- 5
- Na, ko tetahi atu kararehe, ko te tuarua, kei te pea te rite, ara ana ia ko tetahi taha ona, e toru ano hoki nga rara i tona mangai i ona niho: a ka mea ake ratou ki a ia; Whakatika, kia nui te kikokiko e kainga e koe.
- 6
- I muri i tenei ka titiro atu ahau, na, ko tetahi atu, kei te reparo te rite, e wha nga parirau o te manu i tona tuara; e wha ano nga pane o taua kararehe, kua tukua mai ano hoki te rangatiratanga ki a ia.
- 7
- I muri i tenei ka kite ahau i roto i nga moemoea o te po, na, ko te tuawha o nga kararehe, he hanga whakawehi, he mea whakamataku, he kaha noa atu; he niho rino ona, he mea nui; kei te kai, kei te wawahi, a mongamonga noa, te toenga takatakahia ana e ona waewae: he mea rerekē ano i era atu kararehe katoa i mua i a ia, kotahi tekau ano hoki ona haona.
- 8
- I whakaaroa e ahau nga haona, na, kua puta ake tetahi atu haona, he mea nohinohi, i roto i a ratou, a i tona aroaro e toru nga haona no era o mua, he mea unu take atu: na, he kanohi i roto i taua haona nei, he mea e rite ana ki nga kanohi tangata, he mangai korero mea nui ano hoki.
- 9
- Titiro noa ahau, na, kua turakina nga torona, kua noho ano hoki te Tuaiho Onamata, tona kakahu ma tonu me he hukarere, nga makawe o tona māhunga kei te huruhuru hipi kua oti te whakama, tona torona he mura ahi, ona wīra he ahi e ka ana.
- 10
- I pupū mai he awa ahi, i rere mai i tona aroaro: mano iho, mano iho, ana kai mahi, tini, tini whaioio e tu ana i tona aroaro: kua noho te whakarite whakawa, kua tuwhera nga pukapuka.
- 11
- I titiro atu ano ahau i reira, he mea hoki na te reo o nga kupu nui i korerotia e te haona: titiro tonu ahau, a whakamatea noatia iho te kararehe, tona tinana whakangaromia iho, tukua atu ana ki te ahi e ka ana.
- 12
- Era atu o nga kararehe, i whakakahoretia to ratou kawanatanga: i tukua atu ia ki a ratou he roa ki te ora, a taka noa he wa, he taima.
- 13
- I kite ano ahau i roto i nga moemoea o te po, na, ko tetahi e rite ana ki te Tama a te tangata e haere mai ana me nga kapua ano o te rangi, kua tae atu ki te Tuaiho Onamata, kua kawea atu ano hoki e ratou ki tona aroaro.
- 14
- I tukua atu ano hoki ki a ia he kawanatanga, he kororia, he kingitanga, kia mahi ai nga tangata katoa, nga iwi, nga reo, ki a ia: tona kawanatanga he kawanatanga e mau tonu ana, e kore e pahemo; e kore ano tona kingitanga e ngaro.
- 15
- Pouri tonu ahau a Raniera, ara, toku wairua i waenganui i toku tinana, raruraru ana ahau i nga mea i kitea e toku māhunga.
- 16
- Whakatata atu ana ahau ki tetahi o te hunga e tu ana i reira, ui atu ana ahau ki a ia ki te tika o tenei katoa. Na, ka korerotia mai e ia ki a au, a ka meinga ahau kia mohio ki te tikanga o nga mea.
- 17
- Enei kararehe nui, nga mea e wha nei, e wha nga kingi e puta ake i roto i te whenua.
- 18
- Otiia ka riro te kingitanga i te hunga tapu o te Runga-rawa, ka mau ano hoki te kingitanga ki a ratou, a ake ake ake.
- 19
- Katahi ahau ka mea kia mohio ki te tika o te wha o nga kararehe i rerekē nei i era atu katoa, he nui whakaharahara nei te wehi, ona niho he rino, ona maikuku he parahi, o tera i kai ra, i wawahi ra a mongamonga noa, a takatakahia ana te toenga ki ona waewae;
- 20
- O nga haona kotahi tekau ano hoki i tona pane, o tera atu ano hoki i puta ake ra, a taka ana etahi e toru i tona aroaro, o taua haona ra he kanohi nei ona, he mangai ano hoki e korero ana i nga mea nui whakaharahara, o tera he maia rawa tona ahua i to ona hoa.
- 21
- I titiro atu ahau, na, kua whawhai taua haona ki te hunga tapu, a taea ana ratou e ia;
- 22
- Taea noatia te taenga mai o te Tuaiho Onamata, te homaitanga ano hoki o te whakarite whakawa ki te hunga tapu o te Runga-rawa; kia puta mai ano te wa e riro ai te kingitanga i te hunga tapu.
- 23
- Ko tana kupu tenei, Te wha o nga kararehe, ko te wha tera o nga kingitanga i runga i te whenua, ka rerekē ano hoki i nga kingitanga katoa, ka pau i a ia te whenua katoa, ka takatakahia ano e ia, ka wawahia, a mongamonga noa.
- 24
- Na, nga haona kotahi tekau i tenei kingitanga, kotahi tekau nga kingi e ara; a ka ara ake ano tetahi i muri i a ratou, ka rerekē ano ia i o mua, a e toru nga kingi e taea e ia.
- 25
- He nui ano ana kupu mo te Runga-rawa, ka whakatupuria kinotia ano e ia te hunga tapu o te Runga-rawa, ka mea ano ia kia whakariroia ketia nga wa me nga ture; ka tukua atu ano enei ki roto ki tona ringaringa, kia taka ra ano he wa, me etahi wa, me te wehenga ano o nga wa.
- 26
- Otiia ka noho te whakarite whakawa, a ka whakakahoretia tona kingitanga, moti iho, ngaro iho, a taea noatia te mutunga.
- 27
- A ka hoatu te kingitanga, te kawanatanga, te nui ano hoki o te kingitanga i raro i te rangi katoa ki nga tangata o te hunga tapu o te Runga-rawa; tona kingitanga he kingitanga mutunga-kore, a ka mahi nga kawanatanga katoa, ka whakarongo ki a ia.
- 28
- I konei te mutunga o te mea. Na, ahau, a Raniera, nui atu toku raruraru i aku whakaaro, puta ke ana toku mata: heoi puritia iho e ahau taua mea i roto i toku ngakau.
Address: 
Phone: 
Email: