- 1
- I te toru o nga tau o te kingitanga o Kingi Perehatara ka puta mai ki a au he whakakitenga, ki a au hoki, ki a Raniera, i muri iho i tera i whakakitea mai ki a au i te timatanga.
- 2
- I kite moemoea ano ahau: na, i toku kitenga ai, i Huhana ahau i te kāinga kingi, i tera i te kawanatanga i Erama: na, ka kite moemoea ahau, i a au ano i te taha o te awa o Urai.
- 3
- Te marangatanga ake o oku kanohi, ka kite ahau, na, ko tetahi hipi toa e tu ana i te ritenga atu o te awa, e rua ano hoki ona haona, roa noa atu ano hoki nga haona ki runga, kei runga noa atu ia tetahi i tetahi: na, tera i purero ra, no muri i puta ake ai.
- 4
- I kite ano ahau i te hipi toa e aki mai ana ki te taha ki te hauauru, ki te nota, ki te tonga; a kore noa iho tetahi kararehe i tu ki tona aroaro, kahore hoki he tangata hei whakaora i roto i tona ringaringa; heoi mahia ana e ia tana i pai ai, a nui haere ana ia.
- 5
- Na, i a au e whakaaroaro ana, na, ko te putanga mai o tetahi koati toa i te taha ki te hauauru i te mata o te whenua katoa, kihai ano ia i pa ki te whenua: he haona hoki e tirohia atu o te koati i waenganui i ona kanohi.
- 6
- Te tino haerenga mai ki te hipi toa e rua nei ona haona, ki tera i kitea atu e ahau e tu ana i te ritenga atu o te awa, rere mai ana ia ki a ia, tona kaha weriweri tonu.
- 7
- I kite ano ahau i a ia, whakatata mai ana ki te hipi toa, whakatakariri tonu ano hoki ia ki a ia, patua iho e ia te hipi toa, whatīa ana e ia ona haona e rua, kahore hoki he kaha o te hipi toa ki te tu ki tona aroaro; kei te turaki ia i a ia ki te whenua, takatakahia ana ia e ia; kahore ano hoki he kai whakaora mo te hipi toa i roto i tona ringaringa.
- 8
- Na, kua nui noa atu te koati toa, kua kaha, na, ka whati te haona nui, a e wha nga mea e tirohia atu i puta ake i tona turanga, he mea e anga ana ki nga hau e wha o te rangi.
- 9
- Na, kua puta ake i roto i tetahi o ratou tetahi haona nohinohi; na, kua nui noa atu i te taha ki te tonga, ki te rawhiti, ki te whenua ahuareka.
- 10
- I nui haere ano, a tae tonu atu ki te ope o te rangi; whakatakā ana e ia ki te whenua etahi o te ope, o nga whetu ano hoki, takatakahia ana e ia.
- 11
- I tae atu ano tana whakanui i a ia ki te rangatira o te ope, whakakorea iho e ia te patunga tapu, te mea tūturu, turakina iho tona wahi tapu.
- 12
- I homai ano hoki he ope ki a ia hei whawhai ki te patunga tapu tūturu, na te kino hoki, a turakina iho e ia te pono ki te whenua; a mahi ana, kake ana.
- 13
- I rongo ano ahau i tetahi anahera tapu e korero ana, a ka korero mai tetahi atu anahera tapu ki tera atu i korero ra; Kia pehea te roa o te mea i puta mai nei mo te patunga tapu tūturu, mo te he whakangaro ano hoki e tukua atu ai te wahi tapu me te ope kia takatakahia?
- 14
- Na, ko tana meatanga mai ki a au, Kia taka nga ra e rua mano e toru rau, ko reira te wahi tapu purea ai.
- 15
- Na, te kitenga oku, o Raniera, i taua mea i puta mai ra, ka rapua e ahau te tikanga, na, me te mea he ahua tangata e tu ana i toku aroaro.
- 16
- I rongo ano ahau i te reo tangata i te takiwa o nga tahatika o Urai e karanga ana, e mea ana, E Kapariera, meinga tenei tangata kia mohio ki te mea i puta atu ra.
- 17
- Na, ka haere mai tera ki te wahi i tu ai ahau, a tona taenga mai ka wehi ahau, takoto tapapa ana ahau. Na, ko tana meatanga mai ki a au, Kia mohio koe, e te tama a te tangata: no nga wa hoki o te mutunga te wa o te mea i puta mai ra.
- 18
- Na, i a ia e korero mai ana ki a au, kua au taku moe i a au e tapapa atu ana ki te whenua. Na, ka pa mai ia ki a au, a ka meinga ahau e ia kia tu ki runga.
- 19
- Katahi ia ka mea mai, Nana, me whakaatu atu e ahau ki a koe nga mea e puta mai i te whakamutunga iho o te whakatakariri: no te mea ko a te wa i whakaritea te mutunga.
- 20
- Te hipi toa i kitea e koe i nga haona e rua, ko nga kingi era o Meri, o Pahia.
- 21
- Te koati huruhuru, ko te kingi tera o Kariki: Na, te haona nui i waenganui i ona kanohi, ko te kingi tuatahi tera.
- 22
- Na, te whatinga o tera, a e wha i tu ki runga ki tona turanga, e wha nga kingitanga e ara ake i roto i te iwi, e kore ia e rite te kaha ki tona.
- 23
- Na, i te whakamutunga o to ratou kingitanga, i te mea ka rite ta nga kai poka ke, ka ara ake he kingi he kanohi hinana tona, e matau ana ki nga kupu ngaro.
- 24
- He nui ano hoki tona kaha, otiia ehara i te mea na tona kaha ake: he hanga whakamiharo ano hoki tana whakangaro; ka kake ano hoki ia, ka mahi, ka whakangaro ano i te hunga nui ratou ko te iwi tapu.
- 25
- Ma tana ngarahu mohio ano hoki ka meinga ai e ia te tinihanga kia kake i roto i tona ringaringa; ka whakanui ano hoki ia i a ia i roto i tona ngakau, he tokomaha ano e ngaro i a ia i runga i te rangimarie: ka whakatika atu ano hoki ia ki te rangatira o nga rangatira; otiia ka wawahia ia, ehara ano i te mea na te ringaringa.
- 26
- Na, te mea i puta mai ra, to te ahiahi, to te ata, tera i korerotia ra, pono tonu: na, kopia atu te whakakitenga; he mea hoki ia mo nga rangi maha.
- 27
- Na, kua iwi-kore noa iho ahau a Raniera, he maha ano hoki nga rangi oku e mate ana; muri iho ka maranga ahau, a mahia ana e ahau te mahi a te kingi; miharo tonu ano hoki ahau ki te mea i puta mai ra, kihai ia i matauria e tetahi.
Address: 
Phone: 
Email: