- 1
- Kei te mutunga o nga tau e whitu ka mea koe i te tukunga noatanga.
- 2
- A, ko te tikanga tenei mo te tukunga noatanga: Ko nga kai whakatarewa katoa i te moni, e whakatarewa mai nei i te moni, ki o ratou hoa, me tuku noa atu; kaua e tohea i o ratou hoa, i o ratou teina ranei; no te mea hoki e kiia ana, Ko te tukunga noatanga a Ihowa.
- 3
- He tangata iwi ke, tohea atu: ko tau mea ia i to teina, me tuku noa atu e tou ringa;
- 4
- Kia kore ai te rawa-kore i roto i a koe; he mea hoki ka manaaki rawa a Ihowa i a koe i runga i te whenua ka homai nei e Ihowa e tou Atua ki a koe, kia tangohia hei kāinga tupu:
- 5
- Kia ata whakarongo ia koe ki te reo o Ihowa o tou Atua, kia puritia, kia mahia enei whakahaunga katoa e whakahau nei ahau i tenei ra ki a koe.
- 6
- No te mea ka manaakitia koe e Ihowa e tou Atua, ka peratia me tana i korero ai ki a koe: a mau e whakatarewa moni atu ki nga iwi maha, ko koe ia e kore e tango i te moni tarewa; a, hei kawana koe mo nga iwi maha, e kore ano hoki ratou e meinga hei kawana mou.
- 7
- Ki te mea kei roto i a koe tetahi o ou teina e rawa-kore ana, i roto i tetahi o o kuwaha o tou whenua, e homai nei e Ihowa e tou Atua ki a koe, kaua e whakauaua tou ngakau, kaua hoki e kopia tou ringa ki tou teina rawa-kore:
- 8
- Engari me whakatuwhera marie atu tou ringa ki a ia, kia ngawari hoki ki te whakatarewa moni ki a ia mo tona rawa-koretanga, e rawa-kore nei ia.
- 9
- Kia tupato kei puta ake te whakaaro i roto i tou ngakau kino, kei mea, E tata ana te tau whitu, te tau tukunga noatanga; a, ka kino to kanohi ki tou teina rawa-kore, a e kore e hoatu e koe ki a ia; na, ka tangi atu ia ki a Ihowa i a koe ka kino nei, a, ka whai hara koe.
- 10
- Hoatu marie ki a ia, kaua hoki e pouri tou ngakau, ina hoatu e koe ki a ia: ko te mea hoki tenei e manaaki ai a Ihowa tou Atua i a koe, i au mahinga katoatanga, i nga mea katoa e totoro atu ai tou ringa.
- 11
- E kore hoki te rawa-kore e whakakorea i te whenua: koia taku e whakahau nei ki a koe, e mea nei, Kia nui te whakatuwheratanga o tou ringa ki tou teina, ki ou tangata e mate kai ana, e rawa-kore ana i tou whenua.
- 12
- Ki te hokona atu ki a koe tou teina, tetahi Hiperu tane, Hiperu wahine ranei, a ka mahi ki a koe, a e ono nga tau; na, te whitu o nga tau me tuku ia kia haere noa atu i a koe.
- 13
- A, ka tukua ia kia mawehe noa atu i a koe, kaua ia e tukua rawa-koretia atu:
- 14
- Kia ngawari koe ki te homai ki a ia i etahi o o hipi, o o witi, o to waina hoki i to poka: me homai e koe ki a ia etahi o nga mea i hoatu e Ihowa e tou Atua hei manaakitanga mou.
- 15
- Kia mahara ano hoki he pononga koe i mua i te whenua o Ihipa, a, na Ihowa na tou Atua koe i whakaora: koia ahau i whakahau ai i tenei mea ki a koe inaianei.
- 16
- A, ki te mea mai ia ki a koe, E kore ahau e mawehe atu i a koe; nona hoki e aroha ana ki a koutou ko tou whare, a he mea pai ano ki a ia te noho ki a koe;
- 17
- Na, me tango e koe tetahi oka, ka titi ai i tona taringa ki te tatau, a ka waiho ia hei pononga mau, oti tonu atu. Me pena hoki e koe ki to pononga wahine.
- 18
- Kei kino tau whakaaro ina tukua ia kia haere noa atu i a koe; ta te mea e rite ana ana mahi ki a koe i nga tau e ono ki a nga kai mahi tokorua, ki a nga mea e utua ana: a ka manaaki a Ihowa tou Atua i a koe i nga mea katoa e mea ai koe.
- 19
- Ko nga mea matamua e whanau ana i roto i o kau, i o hipi, nga tane, me whakatapu e koe ma Ihowa ma tou Atua: kaua e whakamahia e koe to puru matamua, kaua hoki e kutikutia to hipi matamua.
- 20
- Hei te aroaro o Ihowa o tou Atua koe kai ai i tena mea, i tenei tau i tenei tau, a koe, me tou whare hoki, i te wahi e whiriwhiri ai a Ihowa tou Atua.
- 21
- A, ki te mea he koha tona, he totitoti, he matapo, tetahi atu koha kino ranei, kaua ia e patua e koe ma Ihowa ma tou Atua.
- 22
- Hei roto i ou kuwaha koe kai ai i tena mea: ma te tangata poke raua ko te tangata ma e kai tahi tena mea, kia pera ano me te kainga o te anaterope raua ko te hata.
- 23
- Otiia kaua e kainga ona toto; ringitia atu ki te whenua, ano he wai.
Address: 
Phone: 
Email: