- 1
- Kia mahara ki te marama ki a Apipi, whakaritea hoki te kapenga, hei mea ki a Ihowa ki tou Atua: ko Apipi, hoki te marama i whakaputaina mai ai koe e Ihowa e tou Atua i Ihipa i te po.
- 2
- A, me patu e koe te kapenga hei mea ki a Ihowa ki tou Atua, te hipi, me te kau, ki te wahi e whiriwhiri ai a Ihowa kia waiho tona ingoa ki reira.
- 3
- Kaua e kainga tahitia e koe me taua mea he taro rewena; e whitu nga ra e kainga ai e koe hei kinaki mo taua mea, te taro rewena-kore, te taro tangihanga hoki; no te mea i haere potatutatu mai koe i te whenua o Ihipa: kia mahara ai koe ki te ra i puta mai ai koe i te whenua o Ihipa, i nga ra katoa e ora ai koe.
- 4
- Kaua ano hoki e kitea te rewena ki a koe puta noa i o rohe katoa, a, kia whitu ra ano nga ra; kaua hoki e whakatoea mo te ata tetahi wahi o te kikokiko e patua ana e koe i te ahiahi o te ra tuatahi.
- 5
- Ekore e ahei kia patua e koe te kapenga i roto i tetahi o ou tatau, e homai ana e Ihowa e tou Atua ki a koe:
- 6
- Engari hei te wahi e whiriwhiri ai a Ihowa tou Atua kia waiho tona ingoa ki reira, patu ai koe i te kapenga i te ahiahi, i te toenetanga o te ra, i te wa ano i puta mai ai koe i Ihipa.
- 7
- Na, me tunu e koe, me kai hoki ki te wahi e whiriwhiri ai a Ihowa tou Atua: a, i te ata ka tahuri ka haere ki ou teneti.
- 8
- E ono nga ra e kai ai koe i te taro rewena-kore: a i te ra whitu te huihuinga nui ki a Ihowa ki tou Atua: kaua tetahi mahi e mahia.
- 9
- Taua e koe, kia whitu nga wiki: kei to tukunga mataati i te toronaihi ki te witi koe timata ai te tatau i nga wiki e whitu.
- 10
- Na, me whakarite e koe te hakari o nga wiki, hei mea ki a Ihowa ki tou Atua ki tetahi tahua, he mea hoatu noa na tou ringa; kia rite tau e homai ai ki ta Ihowa ki ta tou Atua manaakitanga i a koe.
- 11
- Na, ka koa koe ki te aroaro o Ihowa o tou Atua, koutou tahi ko to tama, ko to tamahine, me to pononga tane, me to pononga wahine, me te Riwaiti i roto i ou tatau, me te nohonoa, me te pani, me te pouaru, i roto i a koe, ki te wahi i whiriwhiria e Ihowa e tou Atua kia waiho tona ingoa ki reira.
- 12
- A, kia mahara he pononga koe i mua i Ihipa: me pupuri hoki, me mahi enei tikanga.
- 13
- Me whakarite e koe te hakari whare wharau, kia whitu nga ra, ua poto i a koe te kohikohi to witi me to waina:
- 14
- A ka koa koe ki to hakari, koutou tahi ko to tama, ko to tamahine, me to pononga tane, me to pononga wahine, me te Riwaiti, me te nohonoa, me te pani, me te pouaru i roto i ou tatau.
- 15
- Kia whitu nga ra e whakarite ai koe i te hakari ki a Ihowa ki tou Atua, i te wahi e whiriwhiri ai a Ihowa: mo Ihowa hoki mo tou Atua i manaaki i a koe, i o hua katoa, i nga mahi katoa hoki a ou ringa; mo reira ko te koa anake ano mau.
- 16
- E toru nga wa o te tau e kitea mai ai ou tane katoa ki te aroaro o Ihowa o tou Atua, ki te wahi e whiriwhiri ai ia; ko te hakari taro rewena-kore, ko te hakari o nga wiki, ko te hakari whare wharau: kaua hoki ratou e puta rawa-kore mai ki te aroaro a Ihowa:
- 17
- Ko ta ia tangata ta ia tangata e homai ai kia rite ki tana i whiwhi ai, ki ta Ihowa ki ta tou Atua manaakitanga i homai e ia ki a koe.
- 18
- Meatia etahi kai whakarite whakawa, me etahi rangatira mou i ou kuwaha katoa e homai ana e Ihowa e tou Atua ki a koe, puta noa i ou iwi: kia tika hoki te whakarite whakawa e whakarite ai ratou mo te iwi.
- 19
- Kaua e whakapeaua ketia te whakarite whakawa; kaua hoki e whakaaro ki te tangata, kaua ano hoki e tango i te utu whakapati: he mea whakamatapo hoki te utu whakapati i nga kanohi o te hunga whakaaro nui, he mea whakapeau ke hoki i nga kupu a te hunga tika.
- 20
- Ko te mea tika anake tau e whai ai, kia ora ai koe, kia noho ai hoki ki te whenua e homai nei e Ihowa e tou Atua ki a koe.
- 21
- Kaua e whakatokia tetahi motu rakau, aha ranei aha ranei, ki te taha o te aata o Ihowa o tou Atua, e hangā e koe.
- 22
- Kaua ano hoki e whakaturia ake tetahi whakapakoko mau: e kinongia nei e Ihowa e tou Atua.
Address: 
Phone: 
Email: