- 1
- Na, ka tahuri tatou, ka haere hoki ki te koraha na te huarahi ki te Moana Whero; i pera ano me ta Ihowa i ki mai ai ki a au: a he maha nga ra i taiawhiotia ai e tatou a Maunga Heira.
- 2
- Na, ka korero mai a Ihowa ki a au, ka mea,
- 3
- Ka roa nei to koutou taiawhiotanga i tenei maunga: tahuri atu whaka-te-nota.
- 4
- Whakahaua atu hoki e koe te iwi, mea atu, Ka haere nei koutou na nga rohe o o koutou tuakana, o nga tamariki a Ehau, e noho ana i Heira; a ka wehi ratou i a koutou: mo reira kia tupato i a koutou:
- 5
- Kaua e whakapataritari i a ratou; no te mea hoki e kore e hoatu e ahau ki a koutou tetahi wahi o to ratou whenua, ahakoa takahanga kautanga mo te kapu o te waewae, no te mea kua hoatu e ahau a Maunga Heira ki a Ehau hei kāinga tupu.
- 6
- Hokona he kai i a ratou ki te moni, ka kai ai koutou; ko te wai hoki me hoko e koutou i a ratou ki te moni, ka inu ai.
- 7
- He mea hoki kua manaaki a Ihowa tou Atua i a koe i nga mahinga katoatanga a tou ringa; e mohio ana ia ki to haerenga i tenei koraha nui: ka wha tekau enei tau i noho ai a Ihowa tou Atua ki a koe, a kahore ano koe kia hapa ki tetahi mea.
- 8
- A ka pahemo i a tatou o tatou tuakana, nga tamariki a Ehau, e noho ana i Heira, i a tatou e haere ana na te huarahi i te mania o Erata o Ehiono-kapere na, ka tahuri tatou, ka haere na te huarahi i te koraha o Moapa.
- 9
- A ka mea mai a Ihowa ki a au, Kei whawhai koe ki nga Moapi, kaua ano e whakatari pakanga ki a ratou; ta te mea, ekore e hoatu e ahau tetahi wahi o to ratou whenua hei kāinga mou, no te mea kua hoatu a Ara e ahau hei kāinga mo nga tamariki a Rota.
- 10
- I noho nga Emime ki reira i mua ai, he nui, he tini, he roroa tena iwi, rite tahi ano ki nga Anakimi.
- 11
- I korerotia hoki ratou he roroa, he pera me nga Anakimi; na nga Moapi ia ratou i hua Ko nga Emime.
- 12
- I noho hoki nga Hori ki Heira i mua; a, muri iho i a ratou ko nga tamariki a Ehau, na ratou hoki ratou i huna i to ratou aroaro, a noho iho ki to ratou wahi, rite tahi to ratou ki ta Iharaira i mea ai ki te whenua i riro mai i a ia, i homai nei e Ihowa ki a ratou.
- 13
- Tena, whakatika koutou, (ko au atu,) whiti atu i te awa i Terete: na, ka whiti mai tatou i te awa i Terete.
- 14
- A, nga ra i haere mai ai tatou i Karehe-parenea, a tae noa ki to tatou whitinga mai i te awa i Terete, e toru tekau ma waru nga tau, no ka poto atu i roto i te ope te whakapaparanga katoa o nga tangata hapai patu; i rite tonu ki ta Ihowa i oati ai ki a ratou.
- 15
- I runga ano hoki i a ratou te ringaringa o Ihowa e whakamate ana i a ratou i roto i te ope, a, poto noa ratou.
- 16
- A ka poto katoa nga tangata hapai patu te matemate atu i roto i te iwi.
- 17
- Na, ka korero mai a Ihowa ki a au, ka mea,
- 18
- Ko a tenei ra koe haere ai ma Ara, ma te rohe o Moapa.
- 19
- A, e tata atu koe ki te ritenga atu o nga tamariki a Amona, kaua e whawhai ki a ratou, kaua ano hoki e whakatari pakanga ki a ratou: e kore hoki e hoatu e ahau tetahi wahi o te whenua o nga tamariki a Amona hei kāinga mou, no te mea kua hoatu e ahau hei kāinga mo nga tamariki a Rota.
- 20
- (I korerotia hoki taua whenua he whenua tangata roroa; i noho hoki nga tangata roroa ki reira i mua ai, a huaina iho ratou e nga Amoni, Ko nga Hamahumi.
- 21
- He nui, he maha, he roroa taua iwi, rite tahi ki nga Anakimi; na Ihowa ia ratou i huna, i to ratou aroaro; a riro mai ana to ratou kāinga i a ratou, a noho tonu iho i muri iho i a ratou.
- 22
- Rite tahi ki tana i mea ai ki nga tamariki a Ehau, e noho ra i Heira, i tana hunanga i nga Hori i to ratou aroaro; na, riro mai ana i a ratou to ratou kāinga, a noho iho ratou i muri iho i a ratou, a, mohoa noa nei.
- 23
- A ko nga Awimi, i noho ra ki Haterimi, a, puta noa ki Aha, na nga Kapatorimi i haere mai ra i Kapatora ratou i huna, a noho iho ano i muri iho i a ratou.)
- 24
- Whakatika, haere, whiti atu hoki i te awa, i Aranona; na, kua hoatu e ahau ki tou ringa a Hihona kingi o Hehepona, te Amori, me tona whenua: anga atu, tangohia, e riri i ta korua riri.
- 25
- Kei tenei ra au timata ai te whakapa i to paweratanga me to wehi, ki nga iwi i raro iho o te rangi, puta noa puta noa, ki nga mea e rongo ana ki tou rongo, a ka wiri ratou, ka aue hoki i a koe.
- 26
- Na, tukua atu ana e ahau nga karere i te koraha, i Keremota, ki a Hihona, ki te kingi o Hehepona; mo te ata noho nga kupu, a ka mea atu,
- 27
- Kia haere atu ahau na tou whenua; ka haere ahau na te huanui; e kore ahau e peka atu ki matau ki maui.
- 28
- Mau e homai he kai maku hei utu mo te moni, ka kai ai ahau; e homai hoki he wai moku mo te moni, ka inu ai ahau; heoi ano ko te haerenga kautanga atu o oku waewae;
- 29
- (Kia rite ki ta nga tamariki a Ehau e noho ana i Heira i mea ai ki a au, me ta nga Moapi hoki e noho ra i Ara;) kia whiti atu ra ano ahau i Horano, ki te whenua i homai e Ihowa e to matou Atua ki a matou.
- 30
- Heoi, kihai a Hihona kingi o Hehepona, i pai kia haere atu tatou na tona kāinga: na Ihowa hoki na tou Atua i whakapakeke tona wairua, i whakamaia hoki tona ngakau, kia hoatu ai ia ki tou ringa; koia ano tenei inaianei.
- 31
- Na, ka mea mai a Ihowa ki a au, Titiro, kua timata ahau te tuku atu ki tou aroaro i a Hihona me tona whenua: anga atu, tangohia tona whenua hei kāinga.
- 32
- Na, ka puta mai a Hihona ki te tu i a tatou, ki te whawhai hoki i Iahata, a ia, me tona iwi katoa.
- 33
- A homai ana ia e Ihowa e to tatou Atua ki to tatou aroaro; na, patua ana ia e tatou, me ana tama, me tona iwi katoa.
- 34
- A horo ana i a tatou ona pa katoa, i taua wa ano, hunā iho ano hoki nga tangata o nga pa katoa, me nga wahine, me nga potiki, kihai tetahi morehu i mahue i a tatou.
- 35
- Ko nga kararehe ia i tangohia ma tatou, me nga taonga hoki o nga pa i horo i a tatou.
- 36
- O Aroera atu ano, i te taha o te awa o Aranona, me te pa hoki i te awa, a paku noa ki Kireara, kahore tetahi pa i maia i a tatou: homai katoa mai ana e Ihowa e to tatou Atua ki a tatou.
- 37
- Heoi ano ko te whenua o nga tamariki a Amona kihai i taea atu e koe, me nga wahi katoa o te awa o Iapoko, me nga pa o nga maunga, me nga wahi katoa i kiia mai e Ihowa e to tatou Atua ki a tatou.
Address: 
Phone: 
Email: