- 1
- Katahi tatou ka tahuri, ka haere ki runga na te huarahi ki Pahana: na, ka puta mai a Oka kingi o Pahana, ki te tu i a tatou, a ia, me tona iwi katoa, ki Eterei whawhai ai.
- 2
- A ka mea mai a Ihowa ki a au, Kei wehi koe i a ia: ta te mea ka hoatu ia e ahau ki tou ringaringa, me tona iwi katoa hoki, me tona oneone; a ka rite to meatanga ki a ia ki tau i mea ai ki a Hihona kingi o nga Amori, i noho ra i Hehepona.
- 3
- Na, homai ana e Ihowa e to tatou Atua ki o tatou ringaringa a Oka hoki kingi o Pahana, me tona iwi katoa; a, patua ana ia e tatou, a kahore tetahi morehu ona i mahue.
- 4
- Na, ka horo i a tatou, i taua wa ano, ona pa katoa, kahore he pa i kore te tangohia e tatou i a ratou, e ono tekau nga pa, nga wahi katoa o Arakopa, o te rangatiratanga o Oka i Pahana.
- 5
- Ko enei pa katoa, hanga rawa ki nga taiepa teitei, ki nga tatau, ki nga tutaki; hāunga ano nga kāinga noho koraha, tona tini.
- 6
- A hunā katoatia enei e tatou, peratia ana me ta tatou i mea ai ki a Hihona kingi o Hehepona, hunā iho nga tangata o nga pa katoa, me nga wahine, me nga tamariki.
- 7
- Ko nga kararehe ia, me nga taonga o nga pa, i tangohia ma tatou.
- 8
- Na, i taua wa ano, ka tangohia e tatou i te ringaringa o nga kingi tokorua o nga Amori te whenua i tenei taha o Horano, o te awa o Aranona atu, a tae noa ki Maunga Heremona;
- 9
- (Ko Heremona i huaina e nga Haironi ko Hiriona; na nga Amori ia i hua ko Heniri.)
- 10
- Nga pa katoa o te mania, me Kireara katoa, me Pahana katoa, tae noa atu ki Hareka, ki Eterei, nga pa hoki o te rangatiratanga o Oka i Pahana.
- 11
- Ko Oka anake hoki, ko te kingi o Pahaua, i mahue, he oranga no nga tangata roroa. Na, ko tona moenga he moenga rino; kahore iana i Rapata, i nga tamariki a Amona? e iwa whatianga te roa, e wha hoki whatianga te whanui, ki to te tangata whatianga.
- 12
- A ko tenei whenua i riro mai na i a tatou i taua wa, i Aroera atu, i tera i te awa i Aranona, me tetahi taha o Maunga Kireara, me ona pa i hoatu e ahau ki nga Reupeni ratou ko nga Kari.
- 13
- A, ko te wahi o Kireara i mahue, me Pahana katoa, te rangatiratanga o Oka, i hoatu e ahau ki tetahi taanga o te hapu o Manahe; nga wahi katoa o Arakopa, me Pahana katoa i kiia nei ko te whenua o nga tangata roroa.
- 14
- Na Haira tama a Manahe i tango te whenua katoa o Arakopa, a tae noa ki nga rohe o Kehuri, o Maakati; a huaina iho te ingoa o aua wahi ko Pahana-hawota-haira, a, tenei ano inaianei.
- 15
- A tukua atu ana e ahau a Kireara mo Makiri.
- 16
- A tukua atu ana e ahau ki nga Reupeni, ratou ko nga Kari, te wahi e takoto atu ana i Kireara, a tae noa ki te awa ki Aranona, ki waenganui o te awa, me te rohe ano hoki, a tae noa ki te awa ki Iapoko, ko te rohe ia ki nga tamariki a Amona:
- 17
- Me te mania hoki, me Horano, me tona rohe, e takoto atu ana i Kinereta, taea noatia te moana i te mania, te moana tote, i raro iho o Ahetota-pihika, ki te taha ki te rawhiti.
- 18
- A i whakahau ano ahau i a koutou i taua wa, i mea, Kua homai e Ihowa e to koutou Atua tenei whenua kia nohoia: haere atu, e te hunga maia katoa, me a koutou patu, i mua i o koutou tuakana i nga tamariki a Iharaira.
- 19
- Ko a koutou wahine ia, me a koutou potiki, me a koutou kararehe, (e mohio ana hoki ahau he tini a koutou kararehe,) me noho ki o koutou pa i hoatu e ahau ki a koutou;
- 20
- Kia meinga ra ano e Ihowa o koutou tuakana kia okioki, kia peneitia me koutou, kia whiwhi ano hoki ratou ki te whenua ka homai nei e Ihowa e to koutou Atua ki a ratou i tera taha o Horano: katahi koutou ka hoki, tera tangata tera tangata, ki tona kāinga i hoatu e ahau ki a koutou.
- 21
- A i whakahau ano ahau i a Hohua i taua wa, i mea, Kua kite ou kanohi i nga mea katoa i mea ai a Ihowa to koutou Atua ki enei kingi tokorua: ka penatia e Ihowa nga rangatiratanga katoa ka whiti atu nei koe ki reira.
- 22
- Kei wehi koutou i a ratou: ta te mea, ma Ihowa ma to koutou Atua, ta koutou whawhai.
- 23
- A, i inoi ano ahau i taua wa ki a Ihowa, i mea,
- 24
- E te Ariki, e Ihowa, kua timata nei koe te whakakite ki to pononga i tou nui, me tou ringaringa kaha: ko wai hoki te Atua i te rangi, i te whenua ranei, e penei ana te mahi me au mahi, e rite ana ranei ki a koe te kaha?
- 25
- Tena ra, kia whiti atu ahau kia kite i tena whenua pai i tera taha o Horano, i tena maunga pai, i Repanona ano hoki.
- 26
- Otiia i riri mai a Ihowa ki a au, mo ta koutou hoki, kahore ano hoki i rongo ki a au: na, ka mea mai a Ihowa ki a au, Kati ra tau; kaua e korero mai ano ki a au ki tenei mea.
- 27
- Piki atu ki te tihi o Pihika, ka anga ai ou kanohi ki te taha ki te hauauru, ki te nota hoki, ki te tonga, ki te rawhiti, a ma ou kanohi e titiro atu; ta te mea e kore koe e whiti i tenei Horano.
- 28
- Engari, whakahaua atu a Hohua e koe, whakatenatenangia hoki, whakamaiatia: ta te mea ko ia te haere atu i te aroaro o tenei iwi, a mana ratou e whakawhiwhi ki te whenua e kite ai koe.
- 29
- Na, ka noho tatou ki te raorao i te ritenga atu o Pete-peoro.
Address: 
Phone: 
Email: