- 1
- Na, whakarongo mai ra e Iharaira ki nga kianga mai, me nga whakaritenga, e whakaako atu nei ahau ki a koutou kia mahia, kia ora ai koutou, kia tae atu ai, kia noho ai hoki ki te whenua e hoatu nei e Ihowa, e te Atua o o koutou mātua, ki a koutou.
- 2
- Te kupu e whakahaua atu nei e ahau ki a koutou, kaua e tapiritia e koutou ki etahi atu, kaua ano hoki e kinitia atu tetahi wahi o taua kupu ano; kia rite ai i a koutou nga whakahaunga a Ihowa a to koutou Atua, e whakahaua atu nei e ahau ki a koutou.
- 3
- Kua kite o koutou kanohi i nga mea i meatia e Ihowa mo Paara-peoro: ko nga tangata katoa hoki i whai i a Paara-peoro, whakamatea rawatia iho ratou e Ihowa e to koutou Atua i roto i a koutou.
- 4
- Tena ko koutou, ko nga mea i awhi atu ki a Ihowa ki to koutou Atua, e ora katoa ana koutou i tenei ra.
- 5
- Titiro, kua whakaako atu ahau i a koutou ki nga tikanga, ki nga whakariteritenga, ki a Ihowa, ki a toku Atua i ako mai ai ki a au, hei mahi ma koutou i waenganui o te whenua e haere atu nei koutou ki reira ki te tango.
- 6
- Na, kia mau koutou ki aua mea, mahia hoki: ko ta koutou whakaaro nui hoki ia, me to koutou mohiotanga ki te titiro mai a nga tauiwi, a nga mea e rongo ana ki enei tikanga katoa, a ka mea ratou, Koia hoki, he hunga mohio, he hunga tupato tenei iwi nui.
- 7
- Ko wai hoki te iwi e rite ana te nui, kua tata mai te Atua ki a ratou, pera hoki me Ihowa me to tatou Atua e tata mai ana i a tatou karangatanga katoatanga atu ki a ia?
- 8
- Ko wai hoki te iwi e rite ana te nui, i a ia nei nga tikanga, me nga whakariteritenga tika, pera me tenei ture katoa e hoatu nei e ahau ki to koutou aroaro i tenei ra.
- 9
- Mau ia koe e tiaki, me tiaki marie ano hoki tou wairua, kei wareware koe ki nga mea i kite ai ou kanohi, kei riro atu hoki i roto i tou ngakau, i nga ra katoa e ora ai koe; engari me whakaako e koe o tama, me nga tama hoki a o tama ki ena mea;
- 10
- Ki te ra ano hoki i tu ai koe i te aroaro o Ihowa, o tou Atua, i Horepa, i ta Ihowa meatanga mai ki a au, Huihuia mai te iwi ki a au, a, maku e mea kia rongo ratou i aku korero, kia whakaakona ai ratou kia wehi i a au i nga ra katoa e ora ai ratou i runga i te whenua, hei whakaako atu ma ratou ki a ratou tamariki.
- 11
- Na, ka whakatata atu koutou, ka tu hoki i raro iho o te maunga; ko te maunga hoki, kā tonu i te ahi, a kati noa ki waenganui o te rangi,—te pouri! te kapua! na, pouri kerekere.
- 12
- Na, ka korero mai a Ihowa ki a koutou i waenganui o te ahi: ko te puakanga mai o nga kupu ta koutou i rongo ai, tena ko tetahi ahua kihai i kitea e koutou; heoi ano ko te reo kau.
- 13
- Na, ka kauwhau atu ia ki a koutou i tana kawenata, i whakahaua mai e ia ki a koutou kia whakaritea, kotahi tekau nga upoko, a tuhituhia iho e ia ki nga papa kohatu e rua,
- 14
- A, i whakahau mai ano a Ihowa i a au i taua wa, kia whakaakona atu koutou ki nga tikanga me nga whakariteritenga, hei mahi ma koutou ki te whenua e haere atu nei koutou ki reira ki te tango.
- 15
- Tiakina marietia ra o koutou wairua, (ta te mea hoki, kihai koutou i kite i tetahi ahua, me he aha me he aha, i te ra i korero ai a Ihowa ki a koutou i Horepa i waenganui o te ahi.)
- 16
- Kei he koutou kei hanga i te whakapakoko ma koutou, i te ritenga o tetahi tauira, i te ahua o te tane o te wahine ranei;
- 17
- I te ahua o tetahi kararehe o te whenua, i te ahua o tetahi manu whai parirau e rererere ana i te rangi.
- 18
- I te ahua o tetahi mea e ngokingoki ana i te whenua, i te ahua o tetahi ika i roto i te wai i raro iho o te whenua:
- 19
- Kei anga ake ranei ou kanohi ki te rangi, a ka kite i te ra, i te marama ranei, me nga whetu, i te ope katoa o te rangi, na, ka akina atu koe ki te koropiko atu ki ena mea, ki te mahi atu hoki ki ena mea, i tuwhaina mai na e Ihowa e tou Atua, mo nga iwi katoa i raro o te rangi, puta noa puta noa.
- 20
- Na Ihowa ia koutou i tango, nana hoki koutou i whakaputa mai i roto i te oumu rino, i Ihipa, kia waiho ai hei iwi tupu mona, me koutou inaianei.
- 21
- A i riri mai ano a Ihowa ki a au mo ta koutou hoki, a oati mai ana e kore ahau e whiti atu i Horano, e kore ano hoki e tae atu ki te whenua pai, ka homai nei e Ihowa e tou Atua ki a koe hei kāinga tupu.
- 22
- Engari ka mate au ki tenei whenua, e kore ahau nei e whiti i Horano: ko koutou ia ka whiti, ka tango hoki i taua whenua pai.
- 23
- Kia tupato koutou, kei wareware ki te kawenata o Ihowa o to koutou Atua, i whakaritea e ia ki a koutou, kei hangā hoki he whakapakoko ma koutou, he ritenga ranei mo tetahi mea, i riri mai nei koe e Ihowa e tou Atua:
- 24
- Ko Ihowa hoki ko tou Atua, he ahi e kai ana, he Atua hae ia.
- 25
- E whanau au tamariki me nga tamariki a au tamariki, a ka roa to koutou nohoanga ki te whenua, a ka taka koutou, ka hanga hoki i te whakapakoko, i te ahua ranei o tetahi mea, a ka mahi i te mea e kino ana i te tirohanga a Ihowa a tou Atua, hei whakapataritari i a ia.
- 26
- Ka waiho e ahau i tenei ra te rangi me te whenua hei kai titiro mo koutou, mo te matenga hoki e hohoro ai koutou te mate atu i te whenua e whiti atu nei koutou i Horano ki reira, ki te tango; ekore e roa o koutou ra ki reira, engari ka tino ngaro rawa koutou.
- 27
- A ka whakamarara atu a Ihowa i a koutou ki nga tauiwi, a he hunga torutoru o koutou e toe iho i roto i nga tauiwi, e kawea atu ai koutou e Ihowa ki reira.
- 28
- A, ka mahi koutou ki reira ki nga atua i hangā nei e nga ringaringa o te tangata, ki te rakau, ki te kohatu, e kore nei e kite, e kore e rongo, e kore e kai, e kore ano hoki e hongi.
- 29
- Otiia ki te rapu koe i reira i a Ihowa i tou Atua, na, ka kitea e koe ki te whakapaua katoatia tou ngakau me tou wairua ki te rapu i a ia.
- 30
- Ki te mate koe, a ka pono ki a koe enei mea katoa i nga ra a muri ake nei, a ka hoki koe ki a Ihowa, ki tou Atua, ka whakarongo ano hoki ki tona reo,
- 31
- (He Atua tohu hoki a Ihowa tou Atua,) e kore ia e whakarere i a koe, e kore ano hoki e whakangaro i a koe, e kore hoki e wareware ki te kawenata ki ou mātua, i oati ai ia ki a ratou.
- 32
- Na, ui atu ki nga rangi onamata, o mua ake i a koe, o te ra iho ano i hangā ai e te Atua te tangata ki runga ki te whenua, i tetahi pito o te rangi paku noa ki tetahi pito o te rangi, i puta mai ranei tetahi mea hei rite mo tenei mea te nui, i rangona ranei e rite ana ki tenei?
- 33
- I rongo ranei tetahi iwi i te reo o te Atua e korero mai ana i waenganui o te ahi, me tau i rongo ai, a ora ake?
- 34
- I whakamatau ranei te Atua te haere iho, te tango i tetahi iwi mona i waenganui i tetahi iwi, i runga ano i nga whakamatauranga, i runga i nga tohu, i nga merekara, i te whawhai, i te ringaringa kaha, i te ringaringa maro, i nga whakawehi nui, i nga mea katoa i mea ai a Ihowa to koutou Atua ki a koutou ki to koutou aroaro i Ihipa?
- 35
- I whakakitea mai ai ena mea ki a koe kia mohio ai koe ki a Ihowa ko ia te Atua; kahore ke atu i a ia.
- 36
- I meatia koe e ia kia rongo ki tona reo i runga i te rangi, hei whakaako i a koe; a, i runga ano i te whenua i whakakitea e ia tana ahi nui ki a koe; ko ana kupu hoki i rangona e koe i waenganui i te ahi.
- 37
- A no te mea i aroha ia ki ou mātua, koia i whiriwhiria ai e ia o ratou uri i muri iho i a ratou, i whakaputaina mai ai hoki koe i Ihipa, me tana titiro tonu iho, i runga ano hoki i tona kaha nui.
- 38
- Kia peia atu ai nga iwi e nui ana, e kaha ana i a koe i tou aroaro, kia kawea atu ai koe, kia hoatu ai ki a koe to ratou oneone hei kāinga pumau; koia tenei inaianei.
- 39
- Na, kia mohio koe i tenei ra, kia whakaaro hoki i roto i tou ngakau, ko Ihowa, ko ia te Atua i te rangi i runga, i te whenua hoki i raro; kahore ke atu.
- 40
- Na, kia mau ki ana tikanga, me ana whakahaunga, e whakahaua atu nei e ahau i tenei ra ki a koe, hei pai hoki mou, mo au tamariki hoki i muri i a koe, kia roa ai o ra ki runga i te whenua ka hoatu nei e Ihowa e tou Atua ki a koe, a, ake tonu atu.
- 41
- Katahi a Mohi ka motuhake i nga pa e toru i tenei taha o Horano, i te taha ki te rawhiti;
- 42
- Hei rerenga atu mo te tangata whakamate, i whakamate i tona hoa, otiia ehara i te mea totika, ehara hoki i te hoa riri nona, i mua ai; na ka rere ia ki tetahi o aua pa, a ka ora.
- 43
- I Pehere i te koraha, i te whenua mānia, i to nga Reupeni; i Ramoto i Kireara, i to nga Kari; i Korana i Pahana, i to nga Manahi.
- 44
- A, ko te ture tenei i hoatu e Mohi ki te aroaro o nga tamariki a Iharaira.
- 45
- Ko nga whakaaturanga ano enei, me nga tikanga, me nga whakariteritenga, i korerotia atu e Mohi ki nga tamariki a Iharaira, i to ratou putanga mai i Ihipa,
- 46
- I tenei taha o Horano, i te raorao i te ritenga atu o Pete-peoro, i te whenua o Hihona kingi o nga Amori, i noho ra i Hehepona, i patua ra e Mohi ratou ko nga tamariki a Iharaira, i to ratou putanga mai i Ihipa.
- 47
- A, tangohia ana tona whenua e ratou, me te whenua hoki o Oka kingi o Pahana, ko nga kingi tokorua raua o nga Amori, i tenei taha o Horano, i te taha ki te rawhiti;
- 48
- O Aroera atu nei i te pareparenga o te awa o Aranona, a, Maunga Tiona atu ana, ara, a Heremona.
- 49
- Me te mānia katoa hoki i tenei taha o Horano i te taha ki te rawhiti, a tae noa ki te moana o te mānia i raro iho i nga pukenga wai o Pihika.
Address: 
Phone: 
Email: