- 1
- A i karanga atu a Mohi ki a Iharaira katoa, i mea ki a ratou, Whakarongo, e Iharaira, ki nga tikanga, me nga whakariteritenga e korerotia atu nei e ahau ki o koutou taringa i tenei ra, kia akona ai aua mea, kia puritia ai, kia mahia ai hoki e koutou.
- 2
- I whakarite a Ihowa to tatou Atua i te kawenata ki a tatou i Horepa.
- 3
- Kihai a Ihowa i whakarite i tenei kawenata ki o tatou mātua; engari ki a tatou nei ano, e ora katoa nei tatou i konei inaianei.
- 4
- I korero mai a Ihowa ki a koutou titiro atu titiro mai, i te maunga i waenganui o te ahi.
- 5
- (Ko au i tu i te takiwa o Ihowa o koutou i taua wa, hei whakapuaki atu ki a koutou i te korero a Ihowa: i wehi hoki koutou i te ahi, kihai hoki i piki ake ki te maunga;) i mea,
- 6
- Ko Ihowa ahau ko tou Atua, naku koe i whakaputa mai i te whenua o Ihipa, i te whare pononga.
- 7
- Aua etahi atua ke atu mou ki mua atu i a au.
- 8
- Kei hanga koe i te whakapakoko mou, i tetahi ritenga ranei o nga mea o te rangi i runga, o te whenua ranei i raro, o te wai ranei i raro i te whenua.
- 9
- Kei koropiko koe ki ena mea, kei mahi ranei ki ena mea: ko Ihowa hoki ahau ko tou Atua, he Atua hae, e mea ana i nga hara o nga mātua kia tau iho ki nga tamariki, a, te toru, te wha ra ano o nga whakatupuranga o te hunga e kino ana ki a au,
- 10
- E whakaputa aroha ana hoki ki nga mano ki te hunga e aroha ana ki a au, a e whakarite ana i aku ture.
- 11
- Kei whakahuatia noatia e koe te ingoa o Ihowa o tou Atua: e kore hoki a Ihowa e mea he hara-kore te tangata e whakahua noa ana i tona ingoa.
- 12
- Kia mau ki te ra hapati, kia whakatapua, kia pera me ta Ihowa me ta tou Atua i whakahau ai ki a koe.
- 13
- E ono nga ra e mahi ai koe, e mea ai hoki i au mea katoa;
- 14
- Tena ko te ra whitu, he hapati no Ihowa no tou Atua; kaua e mahia tetahi mahi i reira, e koe, e to tamaiti, e to tamahine, e to pononga tane, e to pononga wahine, e to kau, e to kaihe, e o kararehe katoa hoki, me to tangata ke i roto i o tatau; kia okioki ai to pononga tane me to pononga wahine, kia pena ai me koe.
- 15
- A kia mahara ano he pononga koe i mua i te whenua o Ihipa, a na Ihowa na tou Atua i whakaputa mai koe i reira, i runga ano i te ringaringa kaha, i te ringaringa maro: no reira i whakahau ai a Ihowa tou Atua i a koe kia whakaritea te ra hapati.
- 16
- Whakahonoretia tou papa me tou whaea, kia rite ki ta Ihowa ki ta tou Atua i whakahau ai ki a koe; kia roa ai ou ra, kia whiwhi ai hoki koe ki te pai i runga i te whenua e homai nei e Ihowa e tou Atua ki a koe.
- 17
- Aua e patu.
- 18
- Aua e puremu.
- 19
- Aua e tahae.
- 20
- Aua e whakapae teka ki tou hoa.
- 21
- Aua hoki e hiahia ki te wahine a tou hoa, aua hoki e hiahia ki te whare o tou hoa, ki tana mara, ki tana pononga tane, ki tana pononga wahine, ki tana kau, ki tana kaihe, ki tetahi mea ranei a tou hoa.
- 22
- Ko enei kupu i korerotia mai e Ihowa ki to koutou huihui katoa i te maunga i waenganui o te ahi, o te kapua, o te pouritanga hoki, he nui ano hoki te reo; a kahore atu ano ana kupu: a tuhituhia iho e ia ki nga papa kohatu e rua a homai ana ki a au.
- 23
- A, to koutou rongonga ai i te kupu i roto i te pouritanga, (ko te maunga hoki e ka ana i te ahi,) na, ka whakatata mai koutou ki a au, ara nga upoko katoa o o koutou iwi, me o koutou kaumatua;
- 24
- A ka mea mai, Na, kua whakakite mai a Ihowa to tatou Atua i tona kororia ki a tatou, me tona nui, kua rongo hoki tatou i tona reo i roto i te ahi; kua kite tatou i tenei ra ka korero a Ihowa ki te tangata, a ka ora ano.
- 25
- Na, he aha te mea ka mate nei matou? ka pau hoki matou i tenei ahi nui; ki te rongo ano matou i te reo o Ihowa o to tatou Atua, na ka mate matou.
- 26
- Ko wai hoki, o nga kikokiko katoa i rongo ki te reo o te Atua ora e korero ana i roto i te ahi, me tatou hoki i rongo, a i ora ano?
- 27
- Mau e whakatata atu, e whakarongo atu hoki ki nga mea katoa e korero mai ai a Ihowa to tatou Atua; mau hoki e korero mai ki a matou nga mea katoa e korero ai a Ihowa to tatou Atua ki a koe; a ma matou e whakarongo atu, e mahi.
- 28
- A, ka rongo mai a Ihowa i te puakanga mai o a koutou kupu, i a koutou e korero mai ana ki a au; na, ka mea mai a Ihowa ki a au, Kua rongo ahau i te puakanga mai o nga kupu a te iwi nei, i korero ra ratou ki a koe: he pai nga mea katoa i korero ra ratou.
- 29
- Na, me i pena o ratou ngakau i roto i a ratou, te wehi i a au, te pupuri hoki i aku whakahaunga katoa i nga ra katoa, kia whiwhi ai ratou ki te pai me a ratou tamariki hoki ake tonu atu!
- 30
- Haere, mea atu ki a ratou, Hoki atu koutou ki o koutou teneti.
- 31
- Ko koe ia, e tu ki konei taua, a maku e korero ki a koe nga whakahaunga katoa, me nga tikanga, me nga whakariteritenga e whakaako ai koe ki a ratou, hei mahi ma ratou ki te whenua e hoatu nei e ahau kia nohoia e ratou.
- 32
- Na, kia mahara koutou kia pera te mahi me ta Ihowa me ta to koutou Atua i whakahau ai ki a koutou: kaua e peka ke ki matau ki maui.
- 33
- Haere i nga huarahi katoa i whakahau ai a Ihowa to koutou Atua ki a koutou, kia ora ai koutou, kia whiwhi ai koutou ki te pai, kia roa ai hoki o koutou ra ki te whenua ka riro mai nei i a koutou.
Address: 
Phone: 
Email: