- 1
- Na, tenei ano nga whakahaunga, nga tikanga, me nga whakariteritenga, i whakahaua mai e Ihowa e to koutou Atua, kia whakaakona atu ki a koutou, hei mahi ma koutou ki te whenua e haere atu nei koutou ki reira ki te tango:
- 2
- Kia wehi ai koe i a Ihowa i tou Atua, kia puritia ai ana tikanga katoa, me ana whakahaunga e whakahaua nei e ahau ki a koe, e koe, e to tamaiti, me te tama hoki a to tamaiti, i nga ra katoa e ora ai koe; kia roa ai hoki ou ra.
- 3
- Na, whakarongo, e Iharaira, kia mahara hoki kia mahia enei mea, kia whiwhi ai koe ki te pai, kia nui rawa ai hoki koutou, kia pera ai me ta Ihowa, me ta te Atua o o mātua i korero ai ki a koe, ki te whenua e rerengia ana e te waiu me te honi.
- 4
- Whakarongo, e Iharaira: Ko Ihowa, ko to tatou Atua, he Ihowa kotahi.
- 5
- A me whakapau katoa tou ngakau, tou wairua, me tou kaha ki te aroha ki a Ihowa ki tou Atua.
- 6
- A hei roto ano i tou ngakau enei kupu e whakahau atu nei ahau ki a koe i tenei ra.
- 7
- Whakaakona marietia atu hoki ki o tamariki, korerotia i a koe e noho ana i roto i tou whare, i a koe e haere ana i te huarahi, i a koe e takoto ana, i to aranga ake hoki.
- 8
- A me here e koe ena mea hei tohu ki tou ringa, a hei pare ano ena mea ki waenganui o ou kanohi.
- 9
- Tuhituhia ano hoki ki nga pou tatau o tou whare, ki o tatau hoki.
- 10
- A, a mua ake nei, i nga wa ano e kawea ai koe e Ihowa e tou Atua, ki te whenua i oati ai ia ki ou mātua, ki a Aperahama, ki a Ihaka, ki a Hakopa, ka homai e ia ki a koe nga pa e nui ana, e pai ana, kihai nei i hangā e koe.
- 11
- Me nga whare hoki ki tonu i nga mea papai katoa, kihai nei i whakakiia e koe, me nga poka wai oti rawa te keri, he mea kihai i keria e koe, me nga mara waina, me nga oriwa, kihai nei i whakatokia e koe: a ka kai koe, ka makona;
- 12
- Kia tupato ki a koe i reira, kei wareware ki a Ihowa, nana nei koe i whakaputa mai i te whenua o Ihipa, i te whare pononga.
- 13
- Ko Ihowa ko tou Atua tau e wehi ai, me mahi ano hoki ki a ia, ko tona ingoa hoki hei oatitanga mau.
- 14
- Kei whai atu koutou ki nga atua ke, ki etahi o nga atua o nga tauiwi i tetahi taha o koutou, i tetahi taha;
- 15
- (He Atua hae hoki a Ihowa tou Atua, i waenganui i a koe,) kei mura mai te riri a Ihowa a tou Atua ki a koe, a ka whakangaro atu i a koe i te mata o te whenua.
- 16
- Kei whakamatautau koutou i a Ihowa i to koutou Atua, me koutou ra i whakamatautau i a ia i Maha.
- 17
- Puritia marietia nga whakahaunga a Ihowa a to koutou Atua, me ana whakaaturanga, me ana tikanga, i whakahaua mai nei e ia ki a koe.
- 18
- Mahia hoki te mea e tika ana, e pai ana ki te aroaro o Ihowa; kia whiwhi ai koe ki te pai, kia tae atu ai koe, kia noho ai ki te whenua pai i oatitia atu e Ihowa ki ou mātua.
- 19
- Kia peia ai o hoa riri katoa i tou aroaro, kia rite ai ki ta Ihowa i korero ai.
- 20
- A ki te ui mai to tamaiti ki a koe a mua ake nei, ki te mea mai, Hei aha nga whakaaturanga, me nga tikanga, me nga whakariteritenga, i whakahaua mai nei e Ihowa e to tatou Atua ki a koutou?
- 21
- Na, ka mea atu koe ki to tamaiti, He pononga matou na Parao i Ihipa; a he kaha te ringa i whakaputaina mai ai matou e Ihowa i Ihipa:
- 22
- A whakakitea mai ana e Ihowa nga tohu me nga merekara, he nui, he nanakia, ki Ihipa, ki a Parao, ki tona whare katoa hoki, me te titiro ano matou.
- 23
- A whakaputaina mai ana matou e ia i reira, kia kawea mai ai matou, kia homai ai e ia te whenua i oati ai ia ki o tatou mātua.
- 24
- A whakahaua mai ana tatou e Ihowa kia mahia enei tikanga katoa, kia wehi i a Ihowa, i to tatou Atua, hei pai mo tatou i nga ra katoa, kia whakaorangia ai tatou e ia, kia penei ai me tenei inaianei.
- 25
- A hei tika tenei mo tatou, ki te mau ta tatou mahi i enei whakahaunga katoa ki te aroaro o Ihowa, o to tatou Atua, ki te pera me tana i whakahau ai ki a tatou.
Address: 
Phone: 
Email: