- 1
- Ki te mea ka kitea tetahi tangata i whakamatea ki te oneone i homai e Ihowa e tou Atua hei kāinga mou, e takoto ana i te parae, a kahore e mohiotia na wai ia i patu:
- 2
- Katahi ka puta mai ou kaumatua me ou kai whakarite whakawa, a ka whanganga atu ki nga pa i tetahi taha o te tupapaku i tetahi taha:
- 3
- Na, ko te pa e tata ana ki te tupapaku, me tiki e nga kaumatua o taua pa tetahi kuao kau, ki te uha, ki te mea kahore ano i whakamahia, kahore nei i to ioka;
- 4
- Me kawe ano hoki e nga kaumatua o taua pa te kuao kau ki raro ki tetahi awaawa ururua, kahore nei i ngakia, i whakatokia ranei, ka whawhati ai i te kaki o te kau ki reira ki te awaawa:
- 5
- Na, ka whakatata mai nga tohunga nga tama a Riwai; ko ratou hoki ta Ihowa ta tou Atua i whiriwhiri ai hei minita ki a ia, hei manaaki ano hoki i runga i te ingoa o Ihowa; a ma ratou te kupu mo nga tautohe katoa, mo nga patu katoa:
- 6
- Me horoi ano hoki e nga kaumatua katoa o taua pa, e tata ana ki te tupapaku, o ratou ringa ki runga i te kuao kau i whatiia nei te kaki ki te awaawa:
- 7
- Na, ka korero ake ratou, a ka mea, Kihai i whakahekea tenei toto e o matou ringaringa, kihai ano hoki o matou kanohi i kite.
- 8
- Kia marie mai ki tou iwi ki a Iharaira, i hokona nei e koe, e Ihowa, kaua ano hoki e whakairia nga toto hara-kore ki runga ki tou iwi ki a Iharaira. Na, ka whai whakamarietanga ratou mo aua toto.
- 9
- Penei ka whakakorea atu e koe te toto hara-kore i roto i a koe, ina mea koe i te mea e tika ana ki ta Ihowa titiro.
- 10
- Ka haere koe ki te whawhai ki ou hoa riri, a ka homai ratou e Ihowa e tou Atua ki ou ringa, a ka whakaraua ratou e koe hei whakarau;
- 11
- A ka kite koe i tetahi wahine ataahua i roto i nga whakarau, a ka hiahia ki a ia, ka tango hoki i a ia hei wahine mau:
- 12
- Na, me kawe ia e koe ki roto ki tou whare; a ka heua e ia tona mātenga, ka meatia ano hoki ona maikuku.
- 13
- Na, ka whakarerea atu e ia te kakahu o tona whakaraunga, a ka noho ki roto ki tou whare, ka tangi ki tona papa ki tona whaea; kia kotahi tino marama, a, muri iho ka haere atu koe ki a ia, a ka meinga hei tahu ki a ia, ko ia hoki hei wahine mau.
- 14
- A ki te kahore koe e whakaahuareka ki a ia, na me tuku atu e koe ki tana wahi e pai ai, kaua rawa e hokona ki te moni, kaua hoki e waiho hei mea taonga; he mea hoki kua whakaititia nei ia e koe.
- 15
- Ki te tokorua nga wahine a tetahi tangata, kotahi e arohina ana, kotahi e kinongia ana, a ka whanau he tamariki mana i te mea e arohaina ana, i te mea hoki e kinongia ana; a, na te mea e kinongia ana te tamaiti matamua:
- 16
- A ka tae ki te ra e whakarerea iho ai e ia ana mea ma ana tamariki, e kore e ahei kia meinga hei matamua te tamaiti a te mea e arohaina ana, ara, hei kauaemua mo te tino matamua, mo te tamaiti a te wahine e kinongia ana:
- 17
- Engari me whakaae ia ki te tamaiti a te mea e kinongia ana, ko ia hei matamua, me hoatu ki a ia nga wahi e rua o ana mea katoa: no te mea ko ia te timatanga o tona kaha; mana nga tikanga o te matamuatanga.
- 18
- Ki te mea he whakakeke, he whakatoi, te tamaiti a tetahi tangata, a e kore e rongo ki te reo o tona papa, ki te reo hoki o tona whaea, a ka whiua e raua, a e kore e rongo ki a raua:
- 19
- Na, ka mau tona papa raua ko tana whaea ki a ia, a ka kawea mai ia ki nga kaumatua o tona pa, ki te kuwaha ano hoki o tona wahi;
- 20
- A ka mea ki nga kaumatua o tona pa, He whakakeke, he whakatoi, tenei tamaiti a maua; e kore e rongo ki to maua reo, he kakai tonu, he iinu tonu tana.
- 21
- Katahi ka akina ia e nga tangata katoa o tona pa ki te kohatu, kia mate; a ka whakakorea atu e koe te kino i roto i a koe, a ka rongo a Iharaira katoa, ka wehi.
- 22
- Ki te mea ano hoki he hara to tetahi tangata e tika ai te mate mona, a ka meinga kia whakamatea, a ka taronatia e koe ki runga ki te rakau:
- 23
- Kaua e waiho tona tinana i runga i te rakau i te po, engari me ata tanu i taua rangi ano; (he mea kanga hoki na te Atua te tangata i taronatia;) kei poke tou oneone, e hoatu nei e Ihowa e tou Atua ki a koe hei kāinga tupu.
Address: 
Phone: 
Email: