- 1
- E kite koe i te kau a tou teina, i tana hipi ranei, e atiutiu ke ana, kei ninihi atu koe i a ratou: me ata whakahoki mai ano e koe ki tou teina.
- 2
- A ki te kahore tou teina e tata ki a koe, ki te kahore ranei koe e mohio ki a ia, na, me kawe e koe ki tou whare, a ka noho ki a koe, a rapu noa tou teina i a ia; katahi ka whakahoki atu e koe ki a ia.
- 3
- Me pena ano e koe ki tana kaihe, me pena ano ki tona kakahu, me pena ano hoki ki nga mea ngaro katoa a tou teina, ina ngaro atu i a ia, a kua kitea e koe; e kore e ahei kia ninihi atu koe.
- 4
- E kite koe i te kaihe a tou teina, i tana kau ranei, kua hinga i te ara, kei ninihi atu koe i a raua: me ata whakaara tahi korua i a ia.
- 5
- Kei kakahuria e te wahine te mea o te tane, kei kakahuria hoki e te tane te kakahu o te wahine: he mea whakarihariha hoki ki a Ihowa ki tou Atua te hunga katoa e pena aua.
- 6
- Ki te pono atu koe ki te ohanga manu i te ara, i runga i tetahi rakau, i te whenua ranei, a he pi ano, he hua ranei, me te katua e pehi ana i nga pi, i nga hua ranei, kei tangohia tahitia e koe te katua me nga tamariki.
- 7
- Me ata tuku atu e koe te katua, ka tango ai i nga tamariki mau; kia whiwhi ai koe ki te pai, kia roa ai hoki ou ra.
- 8
- Ka hangā e koe he whare hou, me hanga ano e koe he taiepa mo tou tuanui; kei whai toto i a koe tou whare, ina taka te tangata i runga.
- 9
- Kaua e whakauruurua nga purapura e whakatokia e koe ki tau mara waina; kei poke te hua o te purapura e whakatokia e koe, me nga hua o te mara waina.
- 10
- Kaua e huihuia te kau ki te kaihe hei parau mau.
- 11
- Kei kakahuria e koe te mea kakano whakauru, ara, te huruhuru hipi i whakaurua nei ki te rinena.
- 12
- Hangā etahi kurupatu mau mo nga pito e wha o tou kakahu, e kakahu ai koe.
- 13
- Ki te tango te tangata i te wahine, a ka haere ki roto ki a ia, a ka kino ki a ia,
- 14
- A ka mea kia korerotia kinotia ia, kia haere hoki he ingoa kino mona, ka mea, I tango ahau i tenei wahine, a, taku whakatatanga atu ki a ia, na, ka kite ahau ehara ia i te wahina:
- 15
- Katahi ka tikina e te papa raua ko te whaea o te kotiro, a ka kawea mai nga tohu o te wahinatanga o te kotiro ki nga kaumatua o te pa ki te kuwaha:
- 16
- A ka korero atu te papa o te kotiro ki nga kaumatua, Taku tamahine nei, i hoatu e ahau hei wahine ma tenei tangata, a kua kino ia ki a ia;
- 17
- Na, tenei ia te mea nei kia korerotia kinotia ia, e mea ana, Kihai ahau i kite, he wahina to tamahine; na, ko nga tohu enei o te wahinatanga o taku kotiro; me te hora ano raua i te kakahu ki te aroaro o nga kaumatua o te pa.
- 18
- Katahi ka mau nga kaumatua o taua pa ki taua tangata, ka whiu i a ia;
- 19
- Kia kotahi hoki rau o nga hekere e tangohia e ratou i a ia hei utu, ka hoatu ai ki te papa o te kotiro, mona hoki i whakairi i te ingoa kino ki runga ki tetahi o nga tamahine a Iharaira: a hei wahine ano ia mana; e kore e ahei kia whakarerea e ia i nga ra katoa e ora ai ia.
- 20
- Tena ko tenei, he pono tena korero, kahore i kitea nga tohu o te wahinatanga o te kotiro:
- 21
- Katahi ka kawea e ratou te kotiro ki te kuwaha o te whare o tona papa, a ka akina ia e nga tangata o tona pa ki te kohatu, kia mate, mo tana mahi poauau i roto i a Iharaira, mo tana puremutanga i roto i te whare o tona papa: a ka whakakorea atu e koe te kino i roto i a koe.
- 22
- Ki te mau tetahi tangata e takoto ana ki te wahine whai tahu, na, me whakamate raua tokorua, te tane i takoto ki te wahine, me te wahine ano hoki: a ka whakakorea atu e koe te kino i roto i a Iharaira.
- 23
- Ki te taumautia ma te tangata tetahi kotiro, he wahina, a ka tupono tetahi tangata ki a ia i te pa, a ka takotoria e ia;
- 24
- Katahi ka kawea raua e koutou ki te kuwaha o tena pa, a ka akina ki te kohatu, kia mate; te kotiro, mona kihai i karanga i roto i te pa; me te tangata, mona i whakaiti i te wahine a tona hoa: a ka whakakorea atu e koe te kino i roto i a koe.
- 25
- Otiia ki te tupono te tangata i te parae ki tetahi kotiro kua oti te taumau, a ka hopukia atu ia e te tangata, ka takotoria hoki e ia: na, ko te tangata anake i takoto nei ki a ia e mate:
- 26
- Kauaka ia te kotiro e ahatia; kahore hoki o te kotiro hara e mate ai: e rite ana hoki tenei mea ki te whakatikanga ake o te tangata ki tona hoa, a kohurutia iho:
- 27
- I tupono hoki te tane ki a ia i te parae, a i karanga te kotiro i taumautia nei, a kahore he kai whakaora mona.
- 28
- Ki te tupono tetahi tangata ki te kotiro, ki te wahina kahore nei i taumautia, a ka hopu atu i a ia, ka takoto ki a ia, a ka kitea raua;
- 29
- Na, kia rima tekau nga hekere hiriwa e homai ki te papa o te kotiro e te tangata i takoto nei ki a ia, a ka waiho te wahine hei wahine mana; mona i whakaiti i a ia; e kore e ahei kia whakarerea atu ia e ia i nga ra katoa e ora ai ia.
- 30
- E kore e ahei kia tangohia e te tangata te wahine a tona papa, kia horahia hoki te remu o tona papa.
Address: 
Phone: 
Email: