- 1
- Ki te tango te tangata i te wahine, a ka marenatia, a e kore e manakohia e ia, no te mea kua kitea e ia he he tona: na, me tuhituhi e ia he pukapuka whakarere ki a ia, me hoatu hoki ki tona ringa, ka tono atu i roto i tona whare.
- 2
- A ka puta mai ia i tona whare, na, ka haere, a ka waiho hei wahine ma tetahi atu tangata.
- 3
- A ki te kino to muri tahu ki a ia, a ka tuhituhia e ia he pukapuka whakarere ki a ia, ka hoatu hoki ki tona ringa, ka tono atu ano hoki i a ia i roto i tona whare; ki te mate ranei to muri tahu i tango nei i a ia hei wahine mana;
- 4
- E kore e ahei i te tahu tuatahi, nana nei ia i tono atu, te tango i a ia hei wahine mama i muri i tona whakapokenga; he mea whakarihariha hoki tena ki te aroaro o Ihowa; kaua ano hoki e mea kia whai hara te whenua i hoatu nei e Ihowa e tou Atua ki a koe hei kāinga tupu.
- 5
- Ki te tango te tangata i te wahine hou, e kore ia e haere ki te whawhai, e kore ano hoki tetahi mahi e whakaritea mana: kia kotahi tau e noho noa ai ia i tona whare, whakahari ai i te ngakau o tana wahine i tangohia e ia.
- 6
- Kaua e tangohia e te tangata to raro kohatu, to runga ranei kohatu o te mira, hei taunaha: he tango hoki tena i te oranga o te tangata hei taunaha.
- 7
- Ki te mau tetahi tangata e tahae ana i tetahi o ona teina o nga tamariki a Iharaira, hei mea taonga mona, hei hoko ranei mana; me whakamate tena tahae, a ka whakakorea atu e koe te kino i roto i a koe.
- 8
- Kia mahara, i nga pānga mai o te repara, kia whakaritea marietia, kia mahia nga mea katoa e tohutohungia ana ki a koutou e nga tohunga e nga Riwaiti: kia mahara koutou kia mahia taku i whakahau atu ai ki a ratou.
- 9
- Kia mahara ki ta Ihowa ki ta tou Atua i mea ai ki a Miriama i te ara, i to koutou haerenga mai i Ihipa.
- 10
- Ki te whakatarewa atu koe i tetahi mea ki tou hoa, kaua e haere ki roto ki tona whare ki te tiki i tana taunaha.
- 11
- Me tu koe ki waho, a ma te tangata i a ia nei to mea, e kawe mai te taunaha ki a koe ki waho.
- 12
- Otiia ki te mea he rawa-kore taua tangata, kei moe koe me te takoto ano tana taunaha:
- 13
- Me ata whakahoki e koe te taunaha ki a ia ina toene te ra, kia moe ai ia i roto i tona kakahu, a ka manaaki atu i a koe, a ka waiho hei tika mou ki te aroaro o Ihowa o tou Atua.
- 14
- Kei tukinotia e koe te kai mahi, te mea iti, e rawa-kore ana, ahakoa no ou tuakana, no o tangata iwi ke ranei i tou whenua, i roto i ou kuwaha:
- 15
- Me hoatu e koe tona utu i tona ra ano, kei toene te ra me te takoto ano taua mea; he rawa-kore hoki ia, a e okaka ana tona ngakau ki taua mea: kei karanga ia ki a Ihowa mo tou kino, a ka waiho hei hara mou.
- 16
- E kore e whakamatea nga mātua mo te he o nga tamariki, e kore ano hoki e whakamatea nga tamariki mo te he o nga mātua: kei tona hara ki ano he matenga mo tera tangata mo tera tangata.
- 17
- Kei whakapeaua ketia e koe te whakarite whakawa mo te manene, mo te pani ranei; kaua ano hoki e tangohia te kakahu o te pouaru hei taunaha:
- 18
- Engari kia mahara, he pononga koe i mua i Ihipa, a na Ihowa na tou Atua koe i whakaora mai i reira: koia ahau i whakahau ai i a koe ki te mea i tenei mea.
- 19
- Ka kotia e koe au hua i tau mara, a ka wareware tetahi paihere i te mara, kei hoki atu koe ki te tiki: me waiho ma te manene, ratou ko te pani, ko te pouaru: kia manaakitia ai koe e Ihowa e tou Atua i nga meatanga katoatanga a ou ringa.
- 20
- E taia e koe tau oriwa, kaua e hokia e meatia nga manga: me waiho ma te manene, ma te pani, ma te pouaru.
- 21
- E whakiia e koe tau mara waina, kaua e hokia e hamua: me waiho ma te manene, ma te pani, ma te pouaru.
- 22
- Me mahara ano hoki koe he pononga koe i mua i te whenua o Ihipa; koia ahau i whakahau ai i a koe kia mea i tenei mea,
Address: 
Phone: 
Email: