- 1
- A tenei ake, i te wa e tae ai koe ki te whenua ka homai e Ihowa e tou Atua ki a koe hei kāinga tuturu, ka riro mai a reira i a koe, a ka noho koe ki reira;
- 2
- Na, me tango e koe etahi o nga mea matamua o nga hua katoa o te whenua, e mauria mai e koe i tou oneone ka homai nei e Ihowa e tou Atua ki a koe, me whawhao hoki ki roto ki tetahi kete, ka haere mai ai ki te wahi e whiriwhiri ai a Ihowa tou Atua kia waiho tona ingoa ki reira.
- 3
- Na, ka haere mai koe ki te tohunga e minita ana i aua ra, a ka mea ki a ia, Tenei au te korero nui nei i tenei ra ki a Ihowa ki tou Atua, kua tae mai ahau ki te whenua i oati ai a Ihowa ki o tatou mātua kia homai ki a tatou.
- 4
- Na, ka tango te tohunga i te kete i to ringa, ka whakatakoto hoki ki mua mai o te aata o Ihowa o tou Atua.
- 5
- Ko reira koe oho atu ai, mea ai ki te aroaro o Ihowa o tou Atua, He Hiriani, i ora noa i te mate, toku matua; a haere ana ia ki raro ki Ihipa, a noho ana i reira, he hunga tokotorutoru, na, meinga ana ia hei iwi nui i reira, he kaha, he tini:
- 6
- Na, ka tukino nga Ihipiana ki a matou, ka whakawhiu i a matou, a, whakaritea ana e ratou he mahi ma matou, he nanakia:
- 7
- A, to matou tangihanga atu ki a Ihowa ki te Atua o o matou matua, na, whakarongo mai ana a Ihowa ki to matou reo, titiro mai ana ki to matou whakawhiunga, ki to matou whakamahinga, me to matou tukinotanga:
- 8
- Na, whakaputaina ana matou e Ihowa i Ihipa, kaha tonu te ringa, maro tonu te tākakau, me nga whakawehi nui, me nga tohu, me nga merekara:
- 9
- A kawea mai ana matou e ia ki tenei wahi, a, homai ana ki a matou tenei whenua, he whenua e rerengia ana e te waiu, e te honi.
- 10
- Na, kia kite mai koe, kua kawea mai nei e ahau nga hua matamua o te whenua i homai nei e koe ki a au, E Ihowa. Katahi ka whakatakotoria e koe ki te aroaro o Ihowa o tou Atua, me te koropiko ano ki te aroaro o Ihowa o tou Atua:
- 11
- Ka koa hoki ki nga mea pai katoa i homai e Ihowa e tou Atua ki a koutou, ko tou whare, a koe, te Riwaiti, me te manene i roto i a koe.
- 12
- Ka poto i a koe te motuhake nga whakatekau katoa o o hua i te toru o nga tau, i te tau e whakamotuhaketia ai te whakatekau, ka homai ano hoki e koe ki te Riwaiti, ki te manene, ki te pani, ki te pouaru hoki, kia kainga e ratou i roto i ou kuwaha, a ka makona;
- 13
- Katahi koe ka mea atu ki te aroaro o Ihowa o tou Atua, Kua poto mai i a au i roto i toku whare nga mea tapu, kua hoatu ano hoki e ahau ki te Riwaiti, ki te manene, ki te pani, ki te pouaru, kua whakaritea e ahau au whakahaunga katoa i whakahau ai koe ki a au: kahore ahau i whakapaheke i o whakahaunga, kahore ano hoki i wareware:
- 14
- Kahore ahau i kai i tetahi wahi o tena mea i a au e tangi ana ki te tupapaku, kahore ano i tangohia e ahau tetahi wahi o ena mea mo nga mahi poke, kahore ano hoki i hoatu e ahau tetahi wahi o taua mea hei mea tupapaku: whakarongo tonu ahau ki te reo o Ihowa o toku Atua, a, rite tonu aku mahi ki nga mea katoa i whakahaua mai e koe ki a au.
- 15
- Titiro iho i to nohoanga tapu, i te rangi, manaakitia hoki tou iwi a Iharaira, me te whenua i homai nei e koe ki a matou, pera hoki me tau i oati ai ki o matou mātua, te whenua hoki e rerengia ana e te waiu e te honi.
- 16
- No tenei ra a Ihowa tou Atua i whakahau ai i a koe, kia mahia enei tikanga, me nga whakariteritenga: na, puritia, mahia, e tou ngakau katoa, e tou wairua katoa.
- 17
- Kua whakaae koe i tenei ra ki a Ihowa hei Atua mou, kia haere i ana huarahi, kia whakaritea hoki ana tikanga, me ana whakahaunga, me ana whakariteritenga, kia whakarongo ano hoki ki tona reo:
- 18
- A, kua whakaae ano a Ihowa ki a koe i tenei ra hei iwi mona, motuhake rawa, hei pera me tana i korero ai ki a koe, hei pupuri hoki i ana whakahaunga katoa;
- 19
- Mo tana mea hoki i a koe kia nui ake i nga iwi katoa i hangā e ia, te whakamoemiti, te ingoa hoki, me te kororia; kia waiho ano koe hei iwi tapu mo Ihowa mo tou Atua, hei pera me tana i korero ai.
Address: 
Phone: 
Email: