- 1
- Na, ka whakahau atu a Mohi, ratou ko nga kaumatua o Iharaira, i te iwi, ka mea, Puritia nga whakahaunga katoa e whakahau nei ahau ki a koutou i tenei ra.
- 2
- A, tenei ake, i te ra ano e whiti ai koutou i Horano ki te whenua e homai ana e Ihowa e tou Atua ki a koe, na, ka whakaara ake koe i etahi kohatu nui mau, ka pani hoki ki te kotakota:
- 3
- Ka tuhituhi hoki i nga kupu katoa o tenei ture ki aua mea, whiti atu koe, ua haere atu ki te whenua e homai ana e Ihowa e tou Atua ki a koe, ki te whenua e rerengia ana e te waiu, e te honi; ua rite ki ta Ihowa ki ta te Atua o o mātua i korero ai ki a koe.
- 4
- Mo reira, e whiti koutou i Horano, me whakaara enei kohatu e whakahaua nei e ahau i tenei ra ki a koutou, ki runga ki Maunga Epara, ka pani hoki ki te kotakota.
- 5
- Me hanga ano hoki e koe ki reira tetahi aata ma Ihowa ma tou Atua, ki te aata kohatu: kaua e akina iho aua mea ki te rino.
- 6
- Me hanga e koe te aata ma Ihowa ma tou Atua ki nga kohatu toitu: ka whakaeke ai i nga tahunga tinana ma Ihowa ma tou Atua ki runga:
- 7
- Patua hoki nga whakamarietanga, kainga hoki ki reira, me te koa ano, ki te aroaro o Ihowa o tou Atua.
- 8
- Ka tuhituhi ano i nga kupu katoa o tenei ture ki nga kohatu, kia mārama hoki.
- 9
- A, i korero mai ano a Mohi, ratou ko nga tohunga, ko nga Riwaiti, ki a Iharaira katoa, i mea, Kia whai taringa mai, whakarongo mai hoki, E Iharaira; No tenei ra i meinga ai koe hei iwi mo Ihowa mo tou Atua.
- 10
- Na, me whakarongo koe ki te reo o Ihowa o tou Atua, me mahi hoki ana whakahaunga, me ana tikanga e whakahaua atu nei e ahau i tenei ra ki a koe.
- 11
- A, i whakahau ano a Mohi i te iwi i taua rangi ano, i mea,
- 12
- Ko enei e tu ki runga ki Maunga Keritimi hei manaaki i te iwi, ua whiti atu koutou i Horano; ko Himeona, ko Riwai, ko Hura, ko Ihakara, ratou ko Hohepa, ko Peniamine:
- 13
- A, ko enei e tu ki runga ki Maunga Epara hei kanga; ko Reupena, ko Kara, ko Ahera, ko Hepuruna, ko Rana, ko Napatari.
- 14
- Na ka korero mai nga Riwaiti, ka mea, kia nui ano hoki te reo, ki nga tangata katoa o Iharaira,
- 15
- Kia kangā te tangata e hanga ana i te whakapakoko, i te mea whakairo, whakarewa ranei, e whakariharihangia nei e Ihowa, he mea mahi na te ringaringa o te kai mahi, e whakanoho ana hoki i taua mea ki te wahi ngaro. A, ma te iwi katoa e whakahoki mai, e mea mai, Amine.
- 16
- Kia kangā te tangata e whakahawea ana ki tona papa, ki tona whaea ranei. A, ma te iwi katoa e mea mai, Amine.
- 17
- Kia kangā te tangata e neke atu ana i te rohe a tona hoa. A, ma te iwi katoa e mea mai, Amine.
- 18
- Kia kangā te tangata e whakapohehe ana i te matapo ki te huarahi. A, ma te iwi katoa e mea mai, Amine.
- 19
- Kia kangā te tangata e whakaputa ke ana i te whakarite whakawa mo te manene, mo te pani, mo te pouaru. A, ma te iwi katoa e mea mai, Amine.
- 20
- Kia kangā te tangata e moe ana ki te hoa wahine o tona papa; mona i hura i te remu o tona papa. A, ma te iwi katoa e mea mai, Amine.
- 21
- Kia kangā te tangata e moe ana ki tetahi kararehe. A, ma te iwi katoa e mea mai, Amine:
- 22
- Kia kangā te tangata e moe ana ki tona tuahine, ki te tamahine a tona papa, ki te tamahine ranei a tona whaea. A, ma te iwi katoa e mea mai, Amine.
- 23
- Kia kangā te tangata e moe ana ki tona hungawai wahine. A, ma te iwi katoa e mea mai, Amine.
- 24
- Kia kangā te tangata e patu puku ana i tona hoa. A, ma te iwi katoa e mea mai, Amine.
- 25
- Kia kangā te tangata e tango ana i te utu mo te patunga o te tangata hara-kore. A, ma te iwi katoa e mea mai, Amine.
- 26
- Kia kangā te tangata e kore e mau i a ia nga kupu katoa o tenei ture, hei mahi mana. A, ma te iwi katoa e mea mai, Amine.
Address: 
Phone: 
Email: