- 1
- A, tenei ake, ki te ata whakarongo koe ki te reo o Ihowa o tou Atua, ki te mau ki te mahi i ana whakahaunga katoa e whakahau atu nei ahau i tenei ra ki a koe, na, ka whakanui a Ihowa tou Atua i a koe ki runga ake i nga iwi katoa o te whenua:
- 2
- A ka tae mai ki a koe, ka hopu hoki i a koe, enei manaakitanga katoa, ki te whakarongo koe ki te reo o Ihowa o tou Atua.
- 3
- Ka manaakitia koe i roto i te pa, ka manaakitia hoki koe i te mara.
- 4
- Ka manaakitia nga hua o tou kopu, me nga hua o tou oneone, me nga hua o o kararehe, nga uri o o kau, me nga kahui o o hipi.
- 5
- Ka manaakitia to kete me to whare toa.
- 6
- Ka manaakitia koe ina haere mai, ka manaakitia hoki ina haere atu.
- 7
- Ka mea a Ihowa i o hoa riri e whakatika mai ana ki a koe, kia tukitukia i to aroaro: kotahi ano te ara e puta mai ai ratou ki a koe, a e whitu nga ara e rere atu ai ratou i to aroaro.
- 8
- Ka whakahau iho a Ihowa i te manaakitanga mou, mo o whare toa, mo nga mea katoa hoki e toro atu ai tou ringa; a, ka manaaki ia i a koe ki runga i te whenua, ka homai nei e Ihowa e tou Atua ki a koe.
- 9
- Ka whakatuturutia koe e Ihowa hei iwi tapu mona, ka peratia me tana i oati ai ki a koe, ki te mau koe ki nga whakahaunga a Ihowa a tou Atua, ki te haere i ana huarahi.
- 10
- A, ka kite nga iwi katoa o te whenua kua huaina iho te ingoa o Ihowa ki a koe; a, ka wehi i a koe.
- 11
- Ka whakanui rawa ano hoki a Ihowa i te pai mou, ka whai hua hoki tou kopu, ka whai hua o kararehe, ka whai hua to oneone, i runga i te whenua, i oati ai a Ihowa ki ou mātua kia hoatu ki a koe.
- 12
- Ka whakatuwhera a Ihowa i ona taonga pai mou, i te rangi hei homai i te ua ki tou whenua i tona po ano, hei manaaki ano hoki i nga mahi katoa a to ringa: a ka tuku moni atu koe ki nga iwi maha, e kore ano hoki koe e tango i te moni tarewa.
- 13
- A, ka meinga ano koe e Ihowa hei upoko, e kore hoki e waiho hei hiku; a, ki runga tonu ano koe, e kore hoki koe e heke ki raro; ki te whakarongo koe ki nga whakahaunga a Ihowa a tou Atua, e whakahau atu nei ahau i tenei ra ki a koe, a ka puritia, ka mahia:
- 14
- A, e kore e peka atu i tetahi o nga kupu e whakahau atu nei ahau i tenei ra ki a koe, ki matau, ki maui ranei, whai ai ki nga atua ke, mahi ai ki a ratou.
- 15
- A, tenei ake, ki te kore koe e whakarongo ki te reo o Ihowa o tou Atua, e mau ki te mahi i ana whakahaunga katoa, me ana tikanga, e whakahau atu nei ahau i tenei ra ki a koe; na, ka tae mai ki a koe, ka hopu hoki i a koe, enei kanga katoa:
- 16
- Ka kangā koe i te pa, ka kangā koe i te mara.
- 17
- Ka kangā to kete me to whare toa.
- 18
- Ka kangā te hua o tou kopu, me te hua o tou oneone, te uri o o kau, me nga kahui o o hipi.
- 19
- Ka kangā koe i to haerenga mai, ka kangā hoki koe i to haerenga atu.
- 20
- Ka tukua mai e Ihowa ki a koe te kanga, te tuatea, me te whakatupehupehu, ki nga mea katoa e toro atu ai tou ringa ki te mahi, kia ngaro ra ano koe, kia hohoro ra ano te mate atu; mo te kino o au mahi, i whakarere nei koe i a au.
- 21
- Ka whakapiritia mai e Ihowa ki a koe te mate uruta, kia whakapotoa atu ra ano koe e ia i runga i te whenua, e haere atu na koe ki reira ki te tango.
- 22
- Ka patu a Ihowa i a koe ki te kohi, ki te kiri-ka, ki te mumuratanga, ki te toronga nui, ki te mate-wai, ki te maroketanga, ki te kokatanga o te kai; a ka whai ena mea i a koe, a, ngaro noa koe.
- 23
- A ka whakaparahi tou rangi i runga i tou mahunga, ka whakarino hoki te whenua i raro i a koe.
- 24
- Ka homai e Ihowa hei ua mo tou whenua te puehu me te nehu: ka rere iho taua mea i te rangi ki runga ki a koe, kia ngaro ra ano koe.
- 25
- Ka mea a Ihowa i a koe kia patua ki te aroaro o ou hoa riri: kotahi ano te ara e haere atu ai koe ki a ia, a, e whitu nga ara e rere ai koe i tona aroaro: a, ka whakamararatia atu koe ki nga rangatiratanga katoa o te whenua.
- 26
- A ka ai to tinana hei kai ma nga manu katoa o te rangi, ma nga kararehe hoki o te whenua, a kahore he tangata hei whakawehi atu.
- 27
- Ka patu a Ihowa i a koe ki te whenua o Ihipa, ki nga pukupuku, ki te papaka, ki te waihakihaki hoki, e kore nei koe e taea te rongoa.
- 28
- Ka patu a Ihowa i a koe ki te haurangitanga, ki te matapotanga, ki te ngakau pohehe:
- 29
- A ka whawha koe i te tino awatea, ka pera ano me te tangata matapo e whawha nei i roto i te pouri, a e kore e tika i o huarahi: a, ka waiho koe hei tukinotanga kautanga, hei murunga i nga ra katoa, a kahore he kai whakaora.
- 30
- Ka taumau koe i te wahine, he tangata ke mana ia e moe: ka hanga koe i te whare, a e kore e noho ki roto: ka whakato koe i te mara waina, a e kore e whakiia ona hua e koe.
- 31
- Ko to kau ka patua ki to aroaro, a e kore koe e kai i tetahi wahi ona: ko to kaihe ka pahuatia atu i tou aroaro, e kore ano hoki e whakahokia mai ki a koe: ko o hipi ka hoatu ma o hoa riri, a kahore o tangata hei pupuri.
- 32
- Ko o tamariki me o tamahine ka hoatu ki te iwi ke, a ka titiro atu o kanohi ki a ratou i te roa o te ra, a, matawaia noa: kahore hoki he kaha i tou ringa.
- 33
- Ko nga hua o tou oneone, me to uauatanga katoa, ka kainga e te iwi kihai nei i mohiotia e koe; a hei tukinotanga kautanga koe, hei kurunga i nga ra katoa:
- 34
- A ka haurangi koe ki nga mea e kitea ana e o kanohi, e kite ai koe.
- 35
- Ka patu a Ihowa i a koe, i nga turi, i nga waewae hoki, ki te tuwhenua kino e kore e taea te rongoa, i te kapu o tou waewae, a, tae noa ki to tumuaki.
- 36
- Ka whakaheke atu a Ihowa i a koe, i to kingi hoki, e meatia e koe hei kingi mou, ki te iwi kihai nei koe i mohio koutou ko ou mātua; a ka mahi koe i reira ki nga atua ke, ki te rakau, ki te kohatu.
- 37
- A ka waiho koe hei miharotanga, hei whakatauki, hei taunu i roto i nga iwi katoa e kawea atu ai koe e Ihowa ki reira.
- 38
- He nui te purapura e kawea atu e koe ki te mara, a he iti tau e kohikohi mai ai; ka pau hoki i te mawhitiwhiti.
- 39
- Ka whakatokia, ka mahia hoki e koe nga mara waina, ko te waina ia e kore e inumia e koe, e kore hoki e whakiia nga hua; ka kainga hoki e te huhu.
- 40
- Ka whai oriwa koe puta noa i ou rohe, ko te hinu ia e kore e whakawahia e koe; ta te mea ka horo o oriwa.
- 41
- Ka whanau o tamariki me o tamahine, otiia e kore ratou e noho ki a koe; ka riro hoki ratou i te herehere.
- 42
- Ko o rakau katoa me nga hua o tou oneone ka pau i te mawhitiwhiti.
- 43
- Ko te manene i roto i a koe ka kake ake ki runga i a koe, ki runga noa atu; ko koe ia ka heke iho ki raro noa iho.
- 44
- Mana e homai te moni tarewa ki a koe, ko koe ia e kore e hoatu i te mea tarewa ki a ia: ko ia ka waiho hei upoko, ko koe ia ka waiho hei hiku.
- 45
- A ka tae mai enei kanga katoa ki a koe, ka whai hoki i a koe, ka hopu ano i a koe, kia hunā ra ano koe; mou kihai i whakarongo ki te reo o Ihowa o tou Atua, kihai i mau ki ana whakahaunga me ana tikanga i whakahaua mai e ia ki a koe;
- 46
- A ka piri mai ena mea ki a koe hei tohu, hei miharotanga, ki ou uri ano hoki, ake ake ake.
- 47
- Mou kihai i mahi ki a Ihowa ki tou Atua me te koa ano, me te ngakau hari, mo te huanga o nga mea katoa:
- 48
- A ka mahi koe ki ou hoa riri e tukua mai e Ihowa ki a koe, i runga ano i te mate-kai, i te mate-wai, me te kakahu-kore, me te kore hoki o nga mea katoa: a, ka hoatu e ia he ioka rino ki tou kaki, a, ngaro noa koe i a ia.
- 49
- Ka hapainga mai e Ihowa ki a koe he iwi no tawhiti, no te pito o te whenua, ano he ekara e rere ana; he iwi e kore e mohiotia e koe tona reo;
- 50
- He iwi kanohi hinana, e kore e whakaaro ki te kanohi o te koroheke, e kore hoki e tohu i te taitamariki:
- 51
- A ka kai ia i nga hua o o kararehe, i te hua hoki o tou oneone, a hunā noatia koe: a e kore e toe i a ia he witi mau, he waina, he hinu ranei, nga uri ranei o o kau, me nga kahui o o hipi, a, ngaro noa koe i a ia.
- 52
- A ka whakapaea koe e ia i roto i ou kuwaha katoa, a whenuku noa ou taiepa teitei, e kore nei e taea te piki, i whakamanamanangia nei e koe, a, puta noa i tou whenua: a ka whakapae ia i a koe i roto i ou kuwaha katoa, puta noa i tou whenua: i homai nei e Ihowa e tou Atua ki a koe.
- 53
- A ka kai koe i te hua o tou kopu, i te kikokiko o o tama, o o tamahine, e homai e Ihowa e tou Atua ki a koe, i te whakapaenga, i te kopaninga hoki, e kopania ai koe e ou hoa riri:
- 54
- He tangata whakatarapi i roto i a koe, he mea whakaahu noa iho, he ana tona kanohi ki tona teina, ki te wahine hoki o tona uma, ki ana tamariki hoki e toe ana, i whakatoea e ia:
- 55
- Kei hoatu e ia ki tetahi o ratou tetahi wahi o te kikokiko o ana tamariki e kainga ana e ia: no te mea kahore tetahi mea mana i toe i te whakapaenga, i te kopaninga, e kopania ai koe e ou hoa riri i roto i ou kuwaha katoa.
- 56
- He wahine whakatarapi i roto i a koe, he mea whakaahu, e kore nei e whakamatau atu kia whakaturia te kapu o tona waewae ki runga ki te whenua, i te whakatarapi hoki, i te whakaahu, kino ana tona kanohi ki te tane o tona uma, ki tana tamaiti hoki, me tana tamahine,
- 57
- Ki tona whenua hoki e puta mai ana i waenganui o ona waewae, ki ana tamariki hoki i whanau i roto i a ia: ka kainga pukutia hoki e ia i te kore o nga mea katoa i te whakapaenga, i te kopaninga, e kopani ai to hoa riri i a koe i roto i ou kuwaha.
- 58
- Ki te kahore koe e mahara kia mahia nga mea katoa o tenei ture e tuhituhia nei ki tenei pukapuka, kia wehi i tenei ingoa e whakamoemititia ana, e wehingia ana, i a IHOWA I TOU ATUA.
- 59
- A ka meinga ou whiunga e Ihowa kia miharotia, me nga whiunga o ou uri, he whiunga hoki e nui ana, e mau tonu ana, me nga mate kino hoki, e mau tonu ana.
- 60
- A, ka kauparea mai e ia ki a koe nga mate katoa o Ihipa, i wehi na koe; a ka piri ki a koe.
- 61
- Ko nga mate katoa ano hoki me nga whiu katoa, kahore nei i tuhituhia ki te pukapuka o tenei ture, ka whakapangia mai e Ihowa ki a koe, a hunā noatia koe.
- 62
- A ka mahue iho koutou he hunga tokotorutoru, koutou i rite nei ki nga whetu o te rangi te tini; no te mea kihai koe i whakarongo ki te reo o Ihowa o tou Atua.
- 63
- A ka rite ki te koa o Ihowa ki a koutou i tana whakawhiwhinga i a koutou ki te pai, i tana whakanuinga hoki i a koutou; ka pena ano hoki te koa o Ihowa, ina whakangaromia koutou, ina hunā rawatia koutou; a ka unuhia atu koutou i runga i te whenua e haere atu nei koutou ki reira ki te tango.
- 64
- A ka whakamarara atu a Ihowa i a koe ki nga iwi katoa, ki tetahi pito o te whenua, puta noa ki tetahi pito o te whenua; a ka mahi koe i reira ki nga atua ke, kahore nei koe i mohio, koutou tahi ko ou mātua, ki te rakau, ki te kohatu.
- 65
- A e kore e ta to manawa i roto i ena iwi, kahore hoki he okiokinga mo te kapu o tou waewae: a, ka homai e Ihowa ki a koe ki reira he ngakau ohooho, me te kanohi hangore, me te ngakau tuatea:
- 66
- A ka tarewa tou ora ki tou aroaro; ka wehi hoki koe i te po i te ao, kahore hoki he tuturutanga mo tou ora:
- 67
- I te ata ka mea koe, Aue, tē ahiahi! a i te ahiahi ka mea koe, Aue, tē awatea! i te pawera hoki o to ngakau e pawera ai koe, i te kitenga hoki o ou kanohi, e kite ai koe.
- 68
- A ka whakahokia a Ihowa i a koe ki Ihipa i runga kaipuke, na te huarahi i korero ra ahau ki a koe, E kore koe e kite i reira a muri ake nei: a ka hokona atu koutou ki reira ki ou hoa riri, hei pononga tane, hei pononga wahine, a, kahore he tangata hei hoko.
Address: 
Phone: 
Email: