- 1
- Ko nga kupu enei o te kawenata, i akona iho e Ihowa ki a Mohi kia whakaritea atu ki nga tamariki a Iharaira, i te whenua o Moapa; hāunga ia te kawenata i whakaritea e ia ki a ratou i Horepa.
- 2
- A ka karanga a Mohi ki a Iharaira katoa, ka mea atu ki a ratou, Kua kite koutou i nga mea katoa i mea ai a Ihowa ki to koutou aroaro i te whenua o Ihipa ki a Parao, ki ona tangata katoa, me tona whenua katoa;
- 3
- I nga whakamatauranga nui i kite ra ou kanohi, i nga tohu, me aua merekara nui:
- 4
- He ahakoa ra, kahore ano i homai e Ihowa ki a koutou he ngakau mohio, nga kanohi hei titiro, nga taringa hei whakarongo, a, tae noa ki tenei ra.
- 5
- Na, ka wha tekau nga tau i arahi ai ahau i a koutou i te koraha: kahore nei i tawhitotia o koutou kakahu ki a koutou, kahore hoki tou hu i tawhitotia ki tou waewae.
- 6
- Kahore ano koutou i kai i te taro, i inu ranei i te waina, i te wai whakahaurangi ranei: kia mohio ai koutou ko Ihowa ahau ko to koutou Atua.
- 7
- A, to koutou taenga mai ki tenei wahi, na, ka puta mai a Hihona kingi o Hehepona, raua ko Oka kingi o Pahana, ki te tu i a tatou ki te riri, a, patua iho ratou e tatou:
- 8
- Na, ka tango tatou i to ratou oneone, a, hoatu ana e tatou hei kāinga mo nga Reupeni, mo nga Kari, mo tetahi taanga hoki o te iwi o Manahe.
- 9
- Na, puritia ra nga kupu o tenei kawenata, mahia hoki, kia kake ai koutou i nga mea katoa e mea ai koutou.
- 10
- E tu ana koutou katoa i tenei ra i te aroaro o Ihowa o to koutou Atua; o koutou upoko a o koutou iwi, o koutou kaumatua, o koutou rangatira, me nga tangata katoa o Iharaira,
- 11
- A koutou tamariki, a koutou wahine, me te tangata iwi ke i roto i tou nohoanga, te kai tātā i o wahie, me te kai utuutu wai mai mou:
- 12
- Kia uru ai koe ki te kawenata o Ihowa o tou Atua, ki tona oati hoki, e whakaritea nei e Ihowa e tou Atua ki a koe i tenei ra:
- 13
- Kia whakapumau ai ia i a koe i tenei ra hei iwi mona, ko ia hoki hei Atua mou, kia rite ai ki tana i korero ai ki a koe, ki tana hoki i oati ai ki ou mātua ki a Aperahama, ki a Ihaka, ki a Hakopa.
- 14
- Na kahore ahau i whakarite i tenei kawenata, me tenei oati ki a koutou anake;
- 15
- Engari ki enei e tu ana i konei i a tatou inaianei, i te aroaro o Ihowa o to tatou Atua, ki nga mea ano hoki kahore i konei i a tatou i tenei ra:
- 16
- (E mohio ana hoki koutou ki to tatou nohoanga ki te whenua o Ihipa, ki to tatou haerenga mai hoki na waenganui o nga iwi i haere mai nei tatou;
- 17
- A kua kite koutou i a ratou mea whakarihariha, me a ratou whakapakoko rakau, kohatu, hiriwa, koura, i waenganui i a ratou:)
- 18
- Kei noho i roto i a koutou he tangata, he wahine ranei, hapu ranei, he iwi ranei, e ahu ke ana tona ngakau inaianei i a Ihowa i to tatou Atua, e haere ana ki te mahi ki nga atua o enei iwi; kei puta ake i roto i a koutou he pakiaka e tupu ake ai te taru whakamate, me te womawori;
- 19
- A tenei ake, kei tana rongonga i nga kupu o tenei kanga, na ka manaaki ia i a ia ano i roto tona ngakau, ka mea, Ka mau te rongo ki a au, he aha ahau tē haere noa ai i te pakeketanga o toku ngakau? he aha tē taparua noatia ai te mahi whakahaurangi ki runga ki te mate-wai?
- 20
- E kore a Ihowa e aro ki te tohu i a ia; engari ka paowa te riri a Ihowa me tona ngakau hae ki taua tangata, a, ka tapapa iho ki runga ki a ia nga kanga katoa ka tuhituhia nei ki tenei pukapuka, a, ka horoi atu a Ihowa i tona ingoa i raro iho o te rangi.
- 21
- A, ka wehea mai ia e Ihowa mo te kino, i roto i nga iwi katoa o Iharaira, ka rite ki nga kanga katoa o te kawenata ka tuhituhia nei ki tenei pukapuka o te ture:
- 22
- A ka mea to muri whakapaparanga o a koutou tamariki, e tupu ake i muri i a koutou, me te tangata iwi ke hoki e haere mai ana i te whenua tawhiti, ua kite ratou i nga whiunga o tena whenua, me nga matenga e whakamatea ai a reira e Ihowa;
- 23
- I te whenua katoa hoki he whanariki, he tote, he ngiha, e kore e whakatokia, e kore e tupu, e kore hoki e pihi ake tetahi otaota ki reira, e rite ana ki te hunanga o Horoma, raua ko Komora, o Arema, raua ko Tepoimi i hunā e Ihowa i a ia e aritarita ana, e riri ana:
- 24
- Na, ka mea nga iwi katoa, Na te aha a Ihowa i penei ai ki tenei whenua? Na te aha i mura ai tenei riri nui?
- 25
- Katahi ka meatia mai, Mo ratou ra i whakarere i te kawenata a Ihowa a te Atua o o ratou mātua, i whakaritea e ia ki a ratou, i tana whakaputanga mai i a ratou i te whenua o Ihipa:
- 26
- Na ratou hoki i haere i mahi ki nga atua ke, a koropiko atu ana ki a ratou, ki nga atua kihai nei i mohiotia e ratou, kihai ano hoki i whai wahi ki a ratou.
- 27
- Na, mura mai ana te riri a Ihowa ki tenei whenua, hei whakaputa mai ki a ratou i nga kanga katoa i tuhituhia ki tenei pukapuka:
- 28
- A huarangatia atu ana ratou e Ihowa i runga i to ratou oneone, i te mea e riri ana, e aritarita ana, e whakatakariri noa iho ana ia, a makā ana ratou ki te whenua ke, me tenei hoki inaianei.
- 29
- Kei a Ihowa kei to tatou Atua nga mea ngaro: ko nga mea ia ka oti nei te whakapuaki mai, ma tatou, me a tatou tamariki, ake nei, ake nei, kia mahi ai tatou i nga kupu katoa o tenei ture.
Address: 
Phone: 
Email: