- 1
- Whakarongo mai, e Iharaira, Ko a tenei ra koe whiti ai i Horano, haere ai ki te tango i te whenua o nga iwi e nui ana, e kaha ana i a koe, nga pa hoki e nui ana, e taiepatia ana, a, tutuki noa ki te rangi;
- 2
- I te iwi nui, i te iwi roroa, i nga tamariki a nga Anakimi, e mohio na koe, i rongo hoki, Ko wai e tu ki te aroaro o nga tamariki a Anaka?
- 3
- Na, kia mohio koe i tenei ra, ko Ihowa ko tou Atua, ko ia kei tou aroaro e haere ana, mana ratou e huna, ano he ahi e kai ana, mana hoki e whakamate to ratou tara ki tou aroaro: a ka peia atu ratou e koe, ka hohoro hoki te huna i a ratou ka rite ki ta Ihowa i korero ai ki a koe.
- 4
- Kei korero koe i roto i tou ngakau, ua pei a Ihowa tou Atua i a ratou i tou aroaro, kei mea, He tika noku i kawe mai ai a Ihowa i a au ki te tango i tenei whenua; kahore, no te kino o enei iwi i pei ai a Ihowa i a ratou i tou aroaro.
- 5
- Ehara i te tika nou, i te tapatahi ranei no tou ngakau i haere ai koe ki te tango i to ratou whenua; kahore, he kino no enei iwi i pei ai a Ihowa tou Atua i a ratou i tou aroaro, he mea hoki kia whakamana ai ia i te kupu i oati ai a Ihowa ki ou mātua, ki a Aperahama, ki a Ihaka, ki a Hakopa.
- 6
- Ina, kia mohio koe ehara i te tika nou i hoatu ai e Ihowa e tou Atua tena whenua pai ki a koe, kia tangohia e koe; ta te mea he iwi kaki maro koe.
- 7
- Kia mahara, kei wareware ki au whakataritaringa ki a Ihowa ki tou Atua i te koraha: no te ra iho ano i haere mai ai koe i te whenua o Ihipa, a tae noa mai koutou ki tenei wahi e tutu ana ano koutou ki a Ihowa.
- 8
- A, i Horepa ano i whakapataritari koutou ki a Ihowa, a riri ana a Ihowa ki a koutou, mea ana kia hunā koutou.
- 9
- I taku pikinga atu ki te maunga, ki te tiki i nga papa kohatu, i nga papa o te kawenata i whakaritea e Ihowa ki a koutou, na, ka noho au i te maunga, a e wha tekau nga ra, e wha tekau nga po; kahore ahau i kai i te taro, kahore ano hoki i inu i te wai.
- 10
- A homai ana e Ihowa ki a au nga papa kohatu e rua, he mea tuhituhi na te ringaringa o te Atua: a ko te tuhituhinga o aua mea i rite ki nga kupu katoa i korero ai a Ihowa ki a koutou i te maunga i waenganui o te ahi, i te ra o te huihuinga.
- 11
- Nawai a, ka taka nga ra e wha tekau me nga po e wha tekau, na, ka homai e Ihowa ki a au nga papa kohatu e rua, nga papa hoki o te kawenata.
- 12
- A ka mea mai a Ihowa ki a au, Whakatika, heke atu i konei, hohoro; kua taka hoki tou iwi i kawea mai e koe i Ihipa: kua hohoro ratou te peka ke atu i te huarahi i kiia atu e ahau ki a ratou; kua hangā e ratou he whakapakoko, he mea whakarewa na ratou.
- 13
- A i korero mai ano hoki a Ihowa ki a au, i mea, Kua kite ahau i tenei iwi, nana, he iwi kaki maro ratou:
- 14
- Tukua atu ahau ki te huna i a ratou, ki te horoi atu hoki i to ratou ingoa i raro iho o te rangi: a maku koe e mea hei iwi kaha, hei iwi nui ake i a ratou.
- 15
- Na, ka tahuri au, ka heke iho i te maunga, ko te maunga hoki ka tonu i te ahi, me nga papa e rua hoki o te kawenata i oku ringa e rua.
- 16
- A, taku tirohanga atu, na, kua hara koutou ki a Ihowa ki to koutou Atua, kua hanga i te kuao kau ma koutou, he mea whakarewa: kua hohoro koutou te peka ke atu i te huarahi i kiia mai e Ihowa ki a koutou.
- 17
- Na, kua mau au ki nga papa e rua, pangā atu ana e ahau i roto i oku ringaringa e rua, a wahia iho aua mea e ahau ki to koutou aroaro.
- 18
- Na, takoto ana ahau ki te aroaro o Ihowa, pera ana ano me to te timatanga, e wha tekau nga ra, e wha tekau nga po, kihai ahau i kai i te taro, kihai hoki i inu i te wai, mo o koutou hara katoa hoki i hara ai koutou, i mahi ai i te kino ki te aroaro o Ihowa, hei whakapataritari i a ia.
- 19
- I pawera hoki ahau i te riri, i te aritarita, i a Ihowa ra i whakatakariri ki a koutou, e mea ana kia hunā koutou. A, whakarongo mai ana a Ihowa ki a au i taua wa ano.
- 20
- A i riri rawa ano a Ihowa ki a Arona, i mea kia whakamatea ia: a i inoi ano ahau mo Arona i taua wa ano.
- 21
- Na ka tango ahau i ta koutou hara, i te kuao kau i hangā e koutou, a tahuna ana ki te ahi, patokia iho, hurihia marietia ana, a ngotangota noa, ano he puehu: na, pangā atu ana e ahau ona ngota ki te awa e rere iho ana i te maunga.
- 22
- A, i Tapera, i Maha hoki, i Kipi-roto-hataawa i whakapataritari ano koutou ki a Ihowa.
- 23
- I te tononga ano hoki a Ihowa i a koutou i Karehe-parenea, i tana meatanga mai, Haere ki runga, tangohia te whenua i hoatu e ahau ki a koutou, na, ka tutu koutou ki te kupu a Ihowa a to koutou Atua, kihai ano hoki koutou i whakapono ki a ia, kihai i whakarongo ki tona reo.
- 24
- Tutu ana koutou ki a Ihowa no te ra iho ano i mohio ai ahau ki a koutou.
- 25
- A, takoto ana ahau i te aroaro o Ihowa, a e wha tekau nga ra, e wha tekau nga po, rite tahi ki aku i takoto ai i mua; mo te meatanga mai a Ihowa kia whakangaromia koutou.
- 26
- Na, inoi atu ana ahau ki a Ihowa, mea ana, E te Ariki, e Ihowa, kaua e whakangaromia tou iwi, tou taonga tupu hoki, i hokona nei e koe, i kitea ai tou nui, i whakaputaina mai nei e koe i Ihipa ki te ringaringa kaha.
- 27
- Kia mahara ki o pononga, ki a Aperahama, ki a Ihaka, ki a Hakopa: kaua e titiro mai ki te pakeketanga o tenei iwi, ki to ratou kino, ki to ratou hara.
- 28
- Kei mea te whenua, i whakaputaina mai nei matou e koe i reira, Kihai i kaha a Ihowa ki te kawe i a ratou ki te whenua i korero ai ia ki a ratou, he kino hoki nona ki a ratou, koia i kawea atu ai ratou e ia kia whakamatea ki te koraha.
- 29
- Otira ko tou iwi ano ratou, ko tou taonga tupu hoki, i whakaputaina mai nei e koe, i runga ano i to kaha nui, ki tou tākakau maro hoki.
Address: 
Phone: 
Email: