- 1
- Kia mahara kia mahia nga whakahaunga katoa e whakahaua nei e ahau ki a koe i tenei ra, kia ora ai koutou, kia tini ai, kia tae ai hoki, kia whiwhi ai ki te whenua i oati ra a Ihowa ki o koutou mātua.
- 2
- Kia mahara hoki koe ki te huarahi katoa i arahi ai a Ihowa tou Atua i a koe i te koraha, i enei tau e wha tekau, kia iro ai koe, hei whakamatautau hoki i a koe, kia mohiotia ai nga aha noa i roto i tou ngakau, ka pupuri ranei koe i ana whakahaunga, kahore ranei.
- 3
- A whakawhiua ana koe e ia, i whakamatea ano hoki koe ki te kai, i whangaia koe e ia ki te mana, (kihai nei i mohiotia e koe, kihai ano hoki i mohiotia e ou mātua,) kia whakamohio ai ia i a koe e kore te tangata e ora ki te taro kau, engari ma nga kupu katoa e puta mai ana i te waha o Ihowa ka ora ai te tangata.
- 4
- Ko tou kakahu kihai i tawhitotia ki a koe, kihai ano hoki tou waewae i pupuhi, i enei tau e wha tekau.
- 5
- Kia mohio ano hoki koe i roto i tou ngakau e papaki ana a Ihowa tou Atua i a koe, e pera ana me te tangata e papaki ana i tana tamaiti.
- 6
- Mo reira kia mau ki nga whakahaunga a Ihowa a tou Atua, haere hoki i ana huarahi me te wehi ano ki a ia.
- 7
- Ta te mea hoki, e kawe ana a Ihowa tou Atua i a koe ki te whenua pai, ki te whenua o nga awa wai, o nga puna, me nga wai hohonu e rere mai ana i nga raorao, i nga maunga;
- 8
- Ki te whenua o te witi, o te parei, o te waina, o te piki, me nga pamekaranete: ki te whenua o te hinu oriwa, me te honi;
- 9
- Ki te whenua e kore ai e iti haere to taro e kai ai koe, e kore rawa ai koe e hapa i tetahi mea; ki te whenua he rino ona kohatu, a ka keri koe i te parahi i roto i ona maunga.
- 10
- A ka kai koe, ka makona, na, kia whakapai atu koe ki a Ihowa ki tou Atua mo te whenua pai kua homai e ia ki a koe.
- 11
- Kia tupato kei wareware koe ki a Ihowa ki tou Atua, kei kore koe e pupuri i ana whakahaunga, me ana whakariteritenga, me ana tikanga, e whakahaua atu nei e ahau ki a koe tenei ra.
- 12
- Kei kai koe, a ka makona, kei hanga hoki koe i nga whare papai, a noho ana i roto;
- 13
- A ka tini haere o kau, me o hipi, ka nui hoki te hiriwa me te koura mou, a ka tini haere nga mea katoa i a koe;
- 14
- Na, ka kake tou ngakau, a ka wareware koe ki a Ihowa ki tou Atua, i whakaputa mai ra i a koe i te whenua o Ihipa, i te whare pononga;
- 15
- I arataki hoki i a koe i tena koraha nui e wehingia ana, i reira te nakahi tua-ahi nei, me te kopiona, me te mate-wai; kahore hoki o reira wai; i whakaputa mai ano hoki i te wai mau i roto i te kohatu kiripaka;
- 16
- I whangai i a koe i te koraha ki te mana kihai nei i mohiotia e ou mātua, kia iro ai koe, kia whakamatautau ai hoki ia i a koe, a kia pai ai te tukunga iho ki a koe;
- 17
- A, ka mea i roto i tou ngakau, Na toku kaha, na te uaua hoki o toku ringaringa, i whiwhi ai au ki enei taonga.
- 18
- Engari kia mahara koe ki a Ihowa ki tou Atua; nana hoki i homai te kaha ki a koe i whiwhi ai koe ki te taonga, kia whakamana ai ia i tana kawenata i oati ai ia ki ou mātua, a ka rite nei inaianei.
- 19
- Na, ki te wareware koe ki a Ihowa ki tou Atua, a ka whai ki nga atua ke, ka mahi hoki ki a ratou, ka koropiko atu hoki ki a ratou, me whakaatu e ahau ki a koutou i tenei ra, ka ngaro rawa koutou.
- 20
- Ka whakangaromia koutou, ka peratia me nga iwi e whakangaromia nei e Ihowa i to koutou aroaro; mo koutou kihai i rongo ki te reo o Ihowa o to koutou Atua.
Address: 
Phone: 
Email: