- 1
- Nga kupu a te Kai Kauwhau, ara a te tama a Rawiri, i kingi nei ki Hiruharama.
- 2
- He tino horihori rawa, e ai ta te Kai kauwhau, he tino horihori rawa; he horihori katoa.
- 3
- He aha te pai ki te tangata o tona mauiui katoa e mauiui ai i raro i te ra?
- 4
- Ko tenei whakatupuranga e haere atu ana, ko tera whakatupuranga e haere mai ana: te whenua ia, mau tonu.
- 5
- E whiti ana te ra, e heke atu ana te ra, hohoro tonu atu ki tona wahi i whiti mai ai.
- 6
- E anga ana te hau ki te tonga; na, kua taka, kei te nota, he hanga takataka tonu tana; kua hoki mai ano te hau, he takataka hoki nana.
- 7
- E rere ana nga awa katoa ki te moana, heoi kahore e ki te moana: te wahi i rere mai ai nga awa, ka hoki ano ratou ki reira.
- 8
- Mauiui rawa nga mea katoa, e kore e taea e te tangata te korero: e kore te kanohi e makona i te matakitakinga atu, e kore ano hoki te taringa e ki i te mea e whakarongo atu ana.
- 9
- To mua mea hei mea ano aianei, te mea hoki i mahia i mua ka mahia ano aianei; kahore hoki he mea hou i raro i te ra.
- 10
- He mea ranei tenei e ki ai tetahi, Titiro, he mea hou tenei? He mea ia no nga wa o mua, no era i mua atu i a tatou.
- 11
- Kahore he maharatanga ki nga mea o mua; nga mea ano hoki o muri ake e kore era e maharatia e te hunga o muri iho.
- 12
- He kingi ahau te Kai kauwhau no Iharaira i Hiruharama.
- 13
- Na, ka anga toku ngakau ki te whakaaro nui hei rapu, hei kimi i nga mea katoa e mahia ana i raro i te rangi: na te Atua tenei whakararuraru kino i homai ki nga tamariki a te tangata hei whakararu i a ratou.
- 14
- Kua kite ahau i nga mea katoa e mahia ana i raro i te ra. Nana, he horihori katoa, he pouritanga wairua.
- 15
- Te mea piko e kore e taea te whakatika: nga mea i koha tetahi wahi e kore e taea te tatau.
- 16
- I korerorero ano ahau ki toku ngakau, i mea, Nana, kua nui nei ahau, kua neke ake oku whakaaro ki runga ake i o te hunga katoa i mua i a au i Hiruharama: he maha ano nga mea kua kitea nei e toku ngakau, he whakaaro nui, he matauranga.
- 17
- I tukua ano e ahau toku ngakau ki te mohio i nga whakaaro nui, ki te mohio ano i te haurangi, i te wairangi: kua kite ahau he pouritanga wairua ano hoki tenei.
- 18
- Ma te nui hoki o te whakaaro ka nui ai te pouri: te tangata hoki e whakaneke ake ana i te matauranga e whakaneke ake ana i te mamae.
Address: 
Phone: 
Email: