- 1
- Ko nga kupu enei a Kingi Remuere, ko te poropititanga i whakaakona ai ia e tona whaea.
- 2
- He aha, e taku tamaiti? He aha, e te tamaiti a toku kopu? He aha, e te tamaiti a aku kupu taurangi?
- 3
- Kaua e hoatu tou kaha ki nga wahine, ou ara ki te mea whakangaro o nga kingi.
- 4
- E kore nga kingi, e Remuere, e kore nga kingi e pai hei inu waina; ehara ano hoki te hiahia ki te wai kaha i te mahi rangatira.
- 5
- Kei inu, kei wareware ki nga tikanga, a puta ke ana te whakarite i te whakawa o te tangata e tukinotia ana.
- 6
- Hoatu te wai kaha ma te tangata e tata ana te marere, te waina ki nga wairua pouri.
- 7
- Kia inu ai ia, kia wareware ki tona rawa-kore, a kore ake ona maharatanga ki ona mate.
- 8
- Kia puaki to mangai mo te wahangu i te whakawakanga o te hunga katoa e kiia ana mo te mate.
- 9
- Kia puaki to mangai, whakaritea te whakawa i runga i te tika, tohea te tohe a te ware, a te rawa-kore.
- 10
- Ko wai e kite i te wahine e u ana tona pai? ona utu kei tawhiti atu i to nga rupi.
- 11
- Ka whakawhirinaki atu te ngakau o tona tahu ki a ia, kahore hoki ana meatanga ake ki nga taonga pahua.
- 12
- He pai tana e mea ai ki a ia, kahore hoki he kino, i nga ra katoa e ora ai ia.
- 13
- Tana, he rapu huruhuru hipi, he rapu muka, a ko tona ngakau, ko ona ringa, kei te mahi.
- 14
- Tona rite kei nga kaipuke o nga kai hokohoko; e kawea mai ana e ia tana kai i tawhiti.
- 15
- I te mea e po ana ano ka maranga ia, a hoatu ana e ia he kai ma tona whare, he wahi e rite ana ma ana kotiro.
- 16
- E whakaaroa ana e ia he mara, a hokona ana e ia, whakatokia ana e ia he mara waina, he mea mea ki nga hua a ona ringa.
- 17
- Ko te kaha tana whitiki mo tona hope, ka puta te kaha o ona tākakau.
- 18
- Ka kite ia he pai tana i hokohoko ai: e kore tona rama e mate i te po.
- 19
- Ka totoro atu ona ringa ki te huri miro, ka puritia te pou muka e ona ringa.
- 20
- Ka wherahia atu tona ringa ki te ware, ka totoro atu ona ringa ki te rawa-kore.
- 21
- E kore ia e wehi kei mate tona whare i te hukarere; no te mea takirua tonu nga kakahu o nga tangata katoa o tona whare.
- 22
- Oti ake i a ia he kaitaka mona; he rinena pai, he papura ona kakahu.
- 23
- E mohiotia ana tona tahu i nga kuwaha, ina noho tahi ia ki nga kaumatua o te whenua.
- 24
- E hangā ana e ia he rinena pai, a hokona atu ana; e hoatu ana e ia he whitiki ki nga kai hoko.
- 25
- He kaha, he honore ona kakahu, ka koa ano ia i nga wa i muri.
- 26
- He nui ana whakaaro ina puaki tona mangai; kei tona arero te ture o te atawhai.
- 27
- Ka ata tirohia iho e ia nga ara o tona whare, e kore ano hoki ia e kai i te taro o te mangere.
- 28
- Ka whakatika ana tamariki he kupu manaaki ano ta ratou mona, tona tahu, ka whakamoemiti ano ia ki a ia.
- 29
- He tokomaha nga kotiro i u te pai o ta ratou mahi; hira ake ia tau i ā ratou katoa.
- 30
- He mea teka noa te manako, he mea horihori te ataahua: tena ko te wahine e wehi ana i a Ihowa ko ia e whakamoemititia.
- 31
- Hoatu ki a ia nga hua o ona ringa, ko ana mahi ano hei whakamoemiti ki a ia i nga kuwaha.
Address: 
Phone: 
Email: