- 1
- Ko nga kupu enei a Akuru tama a Iakehe, ko te poropititanga: i korero taua tangata ki a Itiere, ki a Itiere raua ko Ukara,
- 2
- He pono ko ahau te mea poauau rawa o nga tangata, kahore hoki he matauranga tangata i roto i a au.
- 3
- Kihai hoki ahau i whakaakona ki te whakaaro nui, kihai ano i mohio ki nga mea tapu.
- 4
- Ko wai i piki atu ki te rangi, a heke mai ana ano? Na wai i kohi te hau ki roto ki ona ringa? Na wai i takai nga wai ki roto ki te kakahu? Na wai i whakapumau nga pito katoa o te whenua? Ko wai tona ingoa? Ko wai ano hoki te ingoa o tana tamaiti, ki te mea e mohiotia ana e koe?
- 5
- Nga kupu katoa a te Atua kahore he para: he whakangungu rakau ia ki te hunga katoa e whakawhirinaki ana ki a ia.
- 6
- Kaua e tapiritia atu e koe etahi kupu ki ana, kei riria e ia to he, a ka mau koe e korero teka ana.
- 7
- E rua enei mea ka inoia nei e ahau i a koe; kaua enei e kaiponuhia ki a au i te mea kahore nei ahau kia mate noa:
- 8
- Whakamataratia atu i a au te horihori me te korero teka; kaua e homai te rawa-kore ki a au, kaua te taonga; hei te mea e rite ana he kai maku:
- 9
- Kei makona ahau, a ka whakakahore ki a koe, ka mea, Ko wai a Ihowa? kei rawa-kore, a ka tahae, ka whakahua noa hoki i te ingoa o toku Atua.
- 10
- Kaua e korerotia e koe te pononga ki tona ariki, kei kanga ia i a koe, a ko koe e he.
- 11
- Tetahi o nga whakatupuranga, he kanga ta ratou ki to ratou pāpā, kahore hoki e manaaki i to ratou whaea.
- 12
- Tetahi whakatupuranga, e ma ana ki ta ratou whakaaro iho; heoi kahore o ratou paru kia horoia atu.
- 13
- Tetahi whakatupuranga, ano te whakakake o o ratou kanohi! Kua ara o ratou kamo.
- 14
- Tetahi whakatupuranga, ano he hoari o ratou niho, o ratou niho pūrakau, ano he maripi, hei kai i te hunga iti i runga i te whenua, i te hunga rawa-kore i roto nga tangata.
- 15
- E rua nga tamahine a te ngata, ta raua karanga, Homai, homai. E toru enei mea e kore e makona; e wha ano nga mea e kore e ki ake, Kati ano.
- 16
- Ko te rua tupapaku, ko te kopu pakoko, ko te whenua kihai i pukuwaitia, ko te ahi e kore nei e ki ake, Kati ano.
- 17
- Te kanohi e whakahi ana ki tona pāpā, a hei whakahaweatanga mana te rongo ki tona whaea, ka tikarohia e nga raweni o te awaawa, ka kainga e nga pi ekara.
- 18
- E toru enei mea whakamiharo e ngaro ana i a au, e wha hoki kahore e mohiotia e ahau:
- 19
- Ko te huarahi o te ekara i te rangi; ko te huarahi o te nakahi i runga i te kamaka; ko te huarahi o te kaipuke waenga moana; ko te huarahi o te tangata ki te kotiro.
- 20
- He pera ano te ara o te wahine puremu; kai ana ia, horoia ana e ia tona mangai, ki tonu ake ia, Kahore aku mahi he.
- 21
- E toru enei mea e raruraru nei te whenua, e wha ano hoki, he mea e kore e manawanuitia.
- 22
- Ko te pononga ina whakakingitia? ko te kuare ina makona i te taro;
- 23
- Ko te wahine kino ina whai hoa; ko te pononga wahine ina ka whakarerea iho mana nga mea a tona rangatira wahine.
- 24
- E wha enei mea iti o te whenua, he nui noa atu ia nga whakaaro.
- 25
- Ko nga popokorua ehara nei i te iwi kaha, heoi e mea ana i te kai ma ratou i te raumati;
- 26
- Ko nga hawhana, he iwi kaha-kore, heoi e hanga ana i o ratou whare ki te kamaka;
- 27
- Kahore he kingi o nga mawhitiwhiti, heoi haere ropu ana ratou katoa;
- 28
- Te pungawerewere, ko ona peke hei pupuri mana, kei roto ano ia i nga whare kingi.
- 29
- E toru enei mea e pai ana te hikoi, e wha ano hoki e pai ana te haere:
- 30
- Ko te raiona, ko te mea kaha rawa ia o nga kararehe, e kore ano hoki e tahuri mai i te aroaro o tetahi;
- 31
- Ko te hoiho, ko te koati toa, ko te kingi e kore nei tetahi e whakatika mai ki a ia.
- 32
- Ki te mea he mahi kuare tau i a koe i whakaneke ake i a koe, ki te mea ranei i whakaaro kino koe, kopania atu tou ringa ki tou mangai.
- 33
- He pono ki te akina te waiu, ka puta mai he pata; ki te akina te ihu ka puta mai he toto; ki te akina ano te riri, ka puta mai he whawhai.
Address: 
Phone: 
Email: