- 1
- Kua takoto te taima mo nga mea katoa, me te wa ano mo nga meatanga katoa i raro i te rangi.
- 2
- He wa e whanau ai, he wa e mate ai; he wa e whakato ai, he wa e hutia atu ai te mea i whakatokia;
- 3
- He wa e patu ai, he wa e rongoa ai; he wa e wawahi iho ai, he wa e hanga ai;
- 4
- He wa e tangi ai, he wa e kata ai, he wa e aue ai, he wa e kanikani ai;
- 5
- He wa e akiritia atu ai nga kohatu, he wa e kohikohia ai nga kohatu; he wa e awhi ai, he wa e kore ai e awhi;
- 6
- He wa e rapu ai, he wa e ngaro ai; he wa e tiaki ai, he wa e akiri atu ai;
- 7
- He wa e haehae ai, he wa e tuitui ai; he wa e whakarongo puku ai, he wa e korero ai;
- 8
- He wa e aroha ai, he wa e mauahara ai; he wa e whawhai ai, he wa e mau ai te rongo.
- 9
- He aha te painga ki te kai mahi i tana mea i mauiui ai ia?
- 10
- Kua kite ahau i te raruraru e homai ana e te Atua ki nga tamariki a te tangata hei whakararu i a ratou.
- 11
- Ana katoa i hanga ai, ataahua tonu i tona wa ano: i tukua mai ano hoki e ia te ao ki o ratou ngakau, tē kitea e tetahi tangata te mahi e mahia nei e Atua i te timatanga, a taea noatia te mutunga.
- 12
- E mohio ana tenei ahau kahore o aua mea pai, ko te ngakau anake kia koa, kia mahia ano hoki he pai e ia i a ia i te ora.
- 13
- Na, ko nga tangata katoa kia kai, kia inu, kia kite ano hoki i te pai o to ratou mauiui katoa, he mea homai tenei na te Atua.
- 14
- E mohio ana ahau ko nga mea katoa e hānga ana e te Atua, ka mau tonu a ake ake: e kore tetahi mea e honoa mai, e kore ano hoki tetahi wahi e riro: e meatia ana hoki tenei e te Atua kia wehi ai nga tangata i a ia.
- 15
- To mua mea koia ano tenei inaianei; na, nga mea e puta mai amua kua puta noa ake, a e rapua ana e te Atua te mea onamata.
- 16
- I kitea ano e ahau i raro i te ra te wahi whakarite whakawa, kei reira ano te kino; te wahi hoki o te tika, kei reira ano te kino.
- 17
- I ki ake ahau i roto i toku ngakau, Tera e whakawakia e te Atua te tangata tika raua ko te tangata kino: no te mea kua takoto te wa i reira mo nga meatanga katoa, mo nga mahi katoa.
- 18
- I mea ahau i roto i toku ngakau ki nga mea a nga tamariki a te tangata, he mea na te Atua hei whakaatu i a ratou, kia kite ai ratou he kararehe ano hoki ratou.
- 19
- Te mea hoki e pa ana ki nga tamariki a te tangata e pa ana ano ki nga kararehe; kotahi tonu te mea e pa ana ki a ratou; te matenga o tetahi rite tonu ki te matenga o tetahi; kotahi tonu ano manawa o ratou katoa; kihai ano te tangata i hipa ake i te kararehe; he mea horihori hoki te katoa.
- 20
- E haere ana te katoa ki te wahi kotahi; no te puehu nei te katoa; ka hoki ano te katoa ki te puehu.
- 21
- Ko wai e matau ana ki te wairua o nga tamariki a te tangata e haere nei ki runga, ki te wairua ano hoki o te kararehe e heke iho nei ki raro ki te whenua?
- 22
- Na ka kite ahau kahore he pai e nui atu ana i tenei, ara, kia koa te tangata ki ana mahi; ko te wahi hoki ia mana: ma wai hoki ia e mea kia kite i nga mea e puta mai i muri i a ia?
Address: 
Phone: 
Email: