- 1
- Na ka tahuri ahau, a ka titiro atu ki nga tukinotanga katoa e mahia nei i raro i te ra: na ko nga roimata o te hunga i tukinotia, kahore hoki o ratou kai whakamarie; he kaha ano hoki kei te ringaringa o o ratou kai tukino; heoi kahore o ratou kai whakamarie.
- 2
- Na, taku whakamoemiti ki te hunga mate, kua mate noa ake, nui atu i taku ki te hunga ora e ora tonu nei.
- 3
- Pai atu ia i a raua te tangata kahore ano i whanau noa, kahore ano i kite noa i te mahi hē e mahia nei i raro i te ra.
- 4
- I kite ano ahau i te mauiui katoa, i nga mahi tika katoa, he mea hoki tenei e hae mai ai te tangata ki tona hoa. He mea horihori ano hoki tenei, he pouritanga wairua.
- 5
- Te wairangi, kei te awhi ona ringaringa i a ia, a kainga ana e ia ona kikokiko ake.
- 6
- I ki te ringa i runga i te ata noho, pai atu i nga ringa e rua e ki ana, ki te mea he ruha, he pouritanga wairua.
- 7
- Katahi ahau ka tahuri, a ka titiro ki te horihori i raro i te ra.
- 8
- He tangata kotahi tera, kahore hoki he tokorua, kahore ano hoki ana tama, ona tuakana, teina ranei, heoi kahore he mutunga o tana mahi katoa; e kore ano tona kanohi e makona i nga taonga, kahore hoki ana ki ake, Ki a wai taku whakaaro i a au ka mahi nei, ka whakatiki nei i toku wairua ki te pai? He mea horihori ano tenei, he raruraru kino.
- 9
- Erangi te tokorua i te kotahi; no te mea ka whiwhi raua ki te utu pai i ta raua mahi.
- 10
- Ki te mea hoki ka hinga tetahi, ma tona hoa ia e whakaara ake: aue te mate mo te kotahi, ina hinga, ki te kahore te whakatokorua hei whakaara ake i a ia!
- 11
- Ki te takoto tahi ano nga tokorua, ka mahana raua; he tangata kotahi ia, ma te aha ka mahana ai?
- 12
- Ki te kaha rawa tetahi i a ia, ka maia te tokorua ki a ia, e kore ano hoki te aho tuatoru e motu wawe.
- 13
- Te tamaiti rawa-kore, he nui nei ana whakaaro, pai atu ia i te kingi kua koroheketia, a e wairangi ana ano, kua kore nei tona mohiotanga ina whakatupatoria.
- 14
- I puta mai hoki tera i roto i te whare herehere, a whakakingitia ake; tenei ia i whanau i tona kingitanga ka rawakoretia.
- 15
- I kite ahau i te hunga ora e haere nei i raro i te ra, hei hoa mo taua tamaiti mo te tuarua ka whakatika nei i muri i tera.
- 16
- Kahore he mutunga o te hunga katoa, ae ra, o te hunga i mua i a ratou; e kore ano hoki o muri iho e koa ki a ia. He mea horihori ano hoki tenei, he pouritanga wairua.
Address: 
Phone: 
Email: