- 1
- Tiakina tou waewae, ina haere koe ki te whare o te Atua, kia kakama ano ki te whakarongo, engari tera i te hoatu i te patunga tapu a nga wairangi: kahore hoki ratou e mohio he mahi kino ta ratou.
- 2
- Kei porahurahu tou mangai, kei hohoro hoki te puaki o tetahi kupu a tou ngakau i te aroaro o te Atua; no te mea kei te rangi te Atua, a ko koe kei runga i te whenua: mo reira kia torutoru o kupu.
- 3
- Ka puta mai hoki te rekanga kanohi ina nui te raruraru; a e mohiotia ana te reo o te wairangi ki te maha o nga kupu.
- 4
- Ki te kiia taurangitia e koe tetahi mea ma te Atua, kei whakaroa koe ki te whakamana; e kore hoki ia e pai ki nga wairangi: whakamanā e koe tau i ki taurangi ai.
- 5
- Ki te mea kahore o ki taurangi, pai atu tera i to kupu taurangi kihai nei i whakamanā e koe.
- 6
- Kei tukua e koe to mangai kia mea hara mo ou kikokiko; kaua hoki e ki ki te aroaro o te anahera, He pohehetanga; kia riri te Atua ki tou reo hei aha, a he iho i a ia te mahi a ou ringaringa?
- 7
- He maha hoki nga horihori i roto i nga rekanga kanohi maha, i roto ano i nga korero maha; na, tau ra, ko te wehi i te Atua.
- 8
- Ki te kite koe i te rawa-kore e tukinotia ana, a e kahakina ketia ana te whakarite whakawa raua ko te tika i te kawanatanga, kaua e miharo ki taua mea: no te mea e maharatia atu ana e tetahi e tiketike ake ana i nga mea tiketike; tenei ano hoki tetahi e tiketike ake ana i a ratou.
- 9
- Ma te katoa ano hoki nga hua o te whenua; e mahia ana ano e te mara he mea ma te kingi.
- 10
- Te tangata e aroha ana ki te hiriwa e kore e makona i te hiriwa, me te tangata ano hoki e whai ana ki nga mea maha, ki nga hua. He mea horihori ano tenei.
- 11
- Ki te maha nga mea pai, ka tokomaha ano nga tangata hei kai: he aha hoki te pai ki nga tangata nana aua mea? Ko te matakitaki kau atu a ona kanohi.
- 12
- Ahakoa iti, ahakoa nui te kai a te kai mahi, ka reka ano tana moe; te tangata taonga ia, e kore ia e tukua e ana mea maha kia moe.
- 13
- He hē ngau kino tenei i kitea nei e ahau i raro i te ra, he taonga e puritia ana e nga tangata nana, hei he ano mo ratou.
- 14
- Ka pau hoki aua taonga i te raruraru kino: ka whanau ano tana tamaiti, a kahore he mea i tona ringaringa.
- 15
- Ka rite ki tona haerenga mai i te kopu o tona whaea, ka hoki tahanga ano ia; tona haerenga atu ka rite ki tona haerenga mai, e kore ano e riro i a ia tetahi wahi o tana mahi hei maunga atu ma tona ringaringa.
- 16
- He hē ngau kino ano hoki tenei, ara, ko tona haerenga atu ka rite i nga mea katoa ki tona haerenga mai: he aha hoki te pai ki a ia? tana hoki i mahi ai hei hau.
- 17
- I ona ra katoa ano hoki e kai pouri ana ia, he nui hoki te mamae ngakau, me te riri, ina mate ia.
- 18
- Nana, taku i kite ai, He mea pai, he mea ataahua te kai, te inu, kia kite ano i te pai o tona mauiui katoa i mauiui ai ia i raro i te ra i nga ra katoa e ora ai ia, e homai nei e te Atua ki a ia; nana hoki tena wahi.
- 19
- Nga tangata katoa ano hoki kua homai nei e te Atua ki a ratou nga taonga, nga rawa, kua tukua mai ano hoki ki a ratou te tikanga mo te kai i tetahi wahi o aua mea, mo te tango i te wahi ma ratou, kia koa ano hoki ki to ratou mauiui; he mea homai tenei na te Atua.
- 20
- E kore hoki e nui tana maharatanga ki nga ra i ora ai ia; no te mea he koa mo tona ngakau ta te Atua i whakahoki mai ai ki tana.
Address: 
Phone: 
Email: