- 1
- Te ingoa pai, pai atu i te hinu pai; te ra o te matenga pai atu i te ra o tona whanautanga.
- 2
- Te haere ki te whare tangihanga, pai atu i te haere ki te whare hakari; ko te mutunga hoki ia o nga tangata katoa; a ka rongoatia ano e te tangata ora ki roto ki tona ngakau.
- 3
- Te ngakau mamae pai atu i te kata; ma te pouri hoki o te mata ka pai ai te ngakau.
- 4
- Kei te whare tangihanga te ngakau o te hunga whakaaro nui; kei te whare ia o te kata te ngakau o nga wairangi.
- 5
- Te whakarongo ina riria te he e te tangata whakaaro nui, pai atu tera i ta te tangata e whakarongo ana ki te waiata a nga wairangi.
- 6
- Rite tonu hoki ki te papātanga o nga tataramoa i raro i te kohua te kata o te wairangi. He mea horihori ano hoki tenei.
- 7
- He pono ma te tukino ka haurangi ai te tangata, ma te mea homai noa ano hoki ka kore ai te ngakau.
- 8
- Te mutunga o te mea, pai atu i tona timatanga: pai atu te wairua manawanui i te wairua whakakake.
- 9
- Kei oho tou wairua, kei riri, kei roto hoki i te uma o nga wairangi te riri e noho ana.
- 10
- Kaua e mea, He aha nga rangi o mua i pai ai i enei? Kahore hoki he whakaaro nui ou i ui ai koe ki tena.
- 11
- Pai tonu te whakaaro nui, ano he kāinga tupu, he taonga ano ia ki te hunga e kite ana i te ra.
- 12
- Hei whakamarumaru iho te whakaaro nui, hei whakamarumaru te moni: te pai ia o te matauranga koia tenei, ka ora i te whakaaro nui nga tangata nana.
- 13
- Whakaaroa ta te Atua mahi: ko wai hoki hei mea kia tika, tana i mea ai kia hapa?
- 14
- I te ra pai kia koa, a, i te ra kino, whakaaro: kua meinga ano hoki e te Atua tetahi kia rite ki tetahi, he mea kei kitea e te tangata tetahi mea i muri i a ia.
- 15
- I kitea e ahau nga mea katoa i nga ra oku i te horihori; he tangata tika tetahi, ngaro iho ia i tona tika; he tangata kino tetahi, roa noa iho ia i te ao i runga i tona kino.
- 16
- Kaua e whakanuia rawatia tou tika; kaua ano hoki e whakanuia rawatia ou whakaaro: he aha koe e whakangaro ai i a koe?
- 17
- Kaua e whakanuia rawatia tou kino, kaua ano hoki e wairangi: kia mate koe hei aha, i te mea kahore ano tou wa kia rite noa?
- 18
- He pai ki te puritia tenei kupu e koe; kaua hoki tou ringa e puhoi ki tera; te tangata hoki e wehi ana i te Atua ka puta mai i roto i era katoa.
- 19
- Te whakaaro nui, rahi atu tona kaha mo te tangata whakaaro i to nga rangatira kotahi tekau i roto i te pa.
- 20
- Kahore hoki he tangata tika i te whenua e mahi ana i te pai, a kahore ona hara.
- 21
- Kaua ano hoki e whakarongo atu ki nga mea katoa e korerotia ana; kei rongo koe ki to pononga e kanga ana i a koe.
- 22
- He maha hoki nga wa i mohio ai tou ngakau i kanga ano koe i etahi atu.
- 23
- I whakamatauria e ahau tenei katoa, he mea whakaaro marie; i mea ahau ka whakanuia e ahau aku whakaaro; heoi matara noa atu tenei i a au.
- 24
- Te mea i tawhiti, a e hohonu rawa ana, ko wai e kite?
- 25
- I anga toku ngakau, i mea kia mohio, kia kimihia, kia rapua nga whakaaro nui me nga tikanga, kia mohio ano hoki ki te kino o te wairangi, o te poauau, o te haurangi:
- 26
- A ka kite ahau kawa atu i te mate te wahine, he rore nei he kupenga tona ngakau, a he rahiri ona ringaringa; te tangata e paingia ana e te Atua ka mawhiti mai i a ia; te tangata hara ia ka mau i a ia.
- 27
- Nana, kua kitea tenei e ahau, e ai ta te kai-kauwhau, he mea whakarite tetahi ki tetahi, kia kitea ai te tikanga:
- 28
- He mea e rapua nei ano e toku wairua, a kahore ano i kitea e ahau: kotahi te tangata i kitea e ahau i roto i te mano; na, i roto i enei katoa kahore ahau i kite i tetahi wahine.
- 29
- Nana, ko tenei anake i kitea e ahau, ara, i tika te tangata i ta te Atua hanganga ai, heoi he maha nga tikanga i rapua e ratou.
Address: 
Phone: 
Email: