- 1
- Ko wai hei rite mo te tangata whakaaro nui? Ko wai hoki e mohio ana ki te tikanga o tetahi mea? Ka ai te whakaaro nui o te tangata hei whakamārama mo tona mata, ka puta ke ano hoki te taikaha o tona mata.
- 2
- Ko taku tenei, Puritia te kupu a te kingi, me whakaaro ano hoki ki ta te Atua oati.
- 3
- Kei mea wawa ake koe ki te haere atu i tona aroaro; kaua ano hoki e tu ki te mea kino; ka oti hoki i a ia nga mea katoa e pai ai ia.
- 4
- Te wahi i te kupu a te kingi, kei reira te kaha. Ko wai hoki hei mea ki a ia, E aha ana koe?
- 5
- Te kai pupuri o te whakahau, e kore ia e mohio ki te mea he. E mohio ana te ngakau o te whakaaro nui ki te wa, ki te tikanga.
- 6
- No te mea he wa to nga meatanga katoa, he tikanga ano; koia te he o te tangata i nui ai ki runga ki a ia.
- 7
- E kore hoki ia e mohio, ko te aha e puta mai amua: ma wai hoki e whakaatu ki a ia te peheatanga o te putanga mai?
- 8
- Kahore he tangata e whai mana ana ki te wairua ki te pupuri i te wairua; kahore hoki he mana i te ra o te mate: i taua pakanga ano hoki e kore tetahi e tukua atu; e kore ano te kino e whakaora i ona ariki.
- 9
- I kite ahau i tenei katoa, i anga ano toku ngakau ki nga meatanga katoa e meatia ana i raro i te ra; he wa ano ka kingi tetahi tangata ki tetahi tangata hei he ano mona.
- 10
- I kite ano ahau i reira i te hunga kino e tanumia ana, he hunga i haere mai i haere atu i te wahi o te tapu; heoi kua warewaretia ratou e te pa i pera ai ratou, He mea horihori ano hoki tenei:
- 11
- He kore no te hohoro o te whakaoti o te kupu whiu mo te mahi he, koia i ki tonu ai te ngakau o nga tamariki a te tangata i te mahi he.
- 12
- Ahakoa he rau nga mahi he a te tangata hara, a ka roa ona ra; heoi e mohio ana ano ahau, ka pai te tukunga iho ki te hunga e wehi ana i te Atua, e wehi nei i tona aroaro.
- 13
- E kore ano e pai te tukunga iho ki te tangata kino, e kore ano e roa ona ra, he atarangi nei te rite; mona kihai i wehi i te aroaro o te Atua.
- 14
- He mea horihori tenei e mahia nei i runga i te whenua, ara, he hunga tika enei, a, te mea e pa ana ki a ratou, rite tonu ki to te mahi a te hunga kino: he hunga kino ano enei, a, te mea e pa ana ki a ratou, rite tonu ki to te mahi a te hunga tika. I ki ahau he mea horihori ano hoki tenei.
- 15
- Katahi ahau ka whakamoemiti atu ki te koa; no te mea kahore he mea pai ake ma te tangata i raro i te ra ko te kai anake, ko te inu, ko te koa: ko tera hoki e mau ki a ia i roto i tona mauiui i nga ra e ora ai ia, i homai nei e te Atua ki a ia i raro i te ra.
- 16
- I taku tukunga atu i toku ngakau kia mohio i te whakaaro nui, kia kite i te raruraru e mahia nei i runga i te whenua: (i te ao nei hoki, i te po kahore ona kanohi e kite i te moe,)
- 17
- I kite ano ahau i te mahi katoa a te Atua, ara, e kore e ahei i te tangata te rapu te mahi e mahia ana i raro i te ra: ahakoa mauiui noa te tangata i te rapunga, e kore e kitea e ia: ae ra ahakoa mea noa te tangata whakaaro nui kia mohiotia e ia, e kore e taea e ia te rapu.
Address: 
Phone: 
Email: