- 1
- Na, tenei katoa he mea whakaaro na toku ngakau; me whakaatu tenei katoa, ara, ko te hunga tika, ko te hunga whakaaro nui, me a ratou mahi, kei roto i te ringa o te Atua: e kore tetahi tangata e mohio he aroha ranei, he kino ranei kei roto i nga mea katoa i to ratou aroaro.
- 2
- Nga mea katoa ki nga tangata katoa rite tonu; kotahi tonu te mea e pa ana ki te tangata tika, ki te tangata kino; ki te pai, ki te ma, ki te poke; ki te tangata i te patunga tapu, ki te tangata kahore nei ana patunga tapu: te tangata pai rite tonu ki te tangata hara, te tangata e oati ana, ki te tangata e wehi ana i te oati.
- 3
- He hē tenei i roto i nga mea katoa e meatia ana i raro i te ra, kotahi tonu te mea e pa ana ki te katoa; te ngakau ano hoki o nga tamariki a te tangata ki tonu i te kino; kei roto hoki te haurangi i o ratou ngakau i a ratou nei i te ora; a, muri iho ka riro ratou ki nga tupapaku.
- 4
- Te tangata hoki kei roto nei ia i te hunga ora katoa, ka ai he tumanakohana mana; pai atu hoki te kuri ora i te raiona mate.
- 5
- E mohio ana hoki te hunga ora tera ratou e mate: nga tupapaku ia, kahore o ratou mohiotanga ki tetahi mea, kahore ake hoki he utu i a ratou; ka warewaretia hoki te maharatanga ki a ratou.
- 6
- To ratou aroha ano hoki, ta ratou riri, ta ratou hae, kua kore noa ake; kahore hoki he wahi i a ratou, a ake, ake, ake, o nga mea katoa e meatia ana i raro i te ra.
- 7
- Haere, kainga to kai i runga i te hari, inumia hoki to waina, kia koa te ngakau; no te mea kua manako te Atua inaianei ki to mahi.
- 8
- I nga wa katoa kia ma ou kakahu: kaua hoki e whakakahoretia te hinu mo tou mahunga.
- 9
- Kia ora tou ngakau ki to hoa wahine e aroha na koe i nga ra katoa o tou oranga horihori, i homai nei ki a koe i raro i te ra, i nga ra katoa o tou horihori: ko te wahi hoki ia mau i tenei ao, i tou mauiui ano hoki e mauiui na koe i raro i te ra.
- 10
- Nga mea katoa e kitea e tou ringaringa kia mahia, kia puta tou uaua ki te mahi, kahore hoki he mahi, kahore he tikanga, kahore he matauranga, kahore he whakaaro nui i te rua tupapaku, i te wahi ka haere atu na koe ki reira.
- 11
- I tahuri ano ahau, a i kite i raro i te ra, te hunga tere, kahore ratou e tae ki te oma; te hunga marohirohi, kahore e riro i a ratou te tahuna; e kore ano e riro te taro i te hunga whakaaro nui, te taonga i te hunga mohio, te manako i te hunga matau; engari no te katoa nga wa tika me nga mea tupono noa mai.
- 12
- E kore ano hoki te tangata e mohio ki te wa mona: ko nga ika e haoa ana ki te kupenga nanakia, ko nga manu ka mau i te mahanga; rite tonu ki a ratou nga tamariki a te tangata e mahangatia nei i te wa o te he e puta whakarere mai ana ki a ratou.
- 13
- I kitea ano e ahau tenei whakaaro nui i raro i te ra, a he mea nui ano ia ki a au:
- 14
- He pa iti, he torutoru ano nga tangata i roto; heoi, te haerenga mai o tetahi kingi nui ki reira whakapaea ana e ia, hangā ana e ia tetahi pourewa nui hei tatau atu ki reira.
- 15
- Na, kua kitea tetahi tangata rawa-kore i roto, he nui nei ana whakaaro, a nana, na ana whakaaro nui i ora ai te pa; heoi kihai tetahi tangata i mahara ki taua tangata rawa-kore.
- 16
- Na, ko taku kianga ake, Engari rawa te whakaaro nui i te kaha: heoi whakahaweatia iho nga whakaaro nui o te rawa-kore, kihai hoki ana kupu i whakarangona.
- 17
- Nga kupu a te hunga whakaaro nui, engari era i te hamamatanga a te rangatira o nga wairangi, ka ata whakarangona hoki.
- 18
- Pai atu te whakaaro nui i nga mea mo te whawhai: a kotahi te tangata hara, he nui te pai e he ana i a ia.
Address: 
Phone: 
Email: