- 1
- A i turia mai e ratou i Erimi, a ka tae mai te huihuinga katoa o nga tamariki a Iharaira ki te koraha o Hini, ki te takiwa o Erimi o Hinai, i te tahi tekau ma rima o nga ra o te rua o nga marama o ta ratou haerenga mai i te whenua o Ihipa.
- 2
- Na, ka amuamu te huihui katoa o nga tamariki a Iharaira ki a Mohi raua ko Arona i te koraha:
- 3
- A ka mea nga tamariki a Iharaira ki a raua, E, tē mate matou i te ringaringa o Ihowa i te whenua o Ihipa, i a matou e noho ana i te taha o nga kohua kikokiko, e kai ana i te taro, a makona noa! na korua nei hoki matou i kawe mai ki tenei koraha kia kohurutia ai tenei whakaminenga katoa ki te matekai.
- 4
- Na, ka mea a Ihowa ki a Mohi, Nana, ka uaina iho e ahau he taro i te rangi ma koutou; a ma te iwi e haere, e kohikohi i to tenei rangi i to tenei rangi, kia whakamatau ai ahau i a ratou, e haere ranei ratou i taku ture, kahore ranei.
- 5
- A i te ono o nga ra, na ka takā e ratou ta ratou e mau mai ai; kia takiruatia ta ratou i kohikohi ai i etahi rangi ake ka rite ki to tenei.
- 6
- Na, ka mea a Mohi raua ko Arona ki nga tamariki katoa a Iharaira, Ka ahiahi, na, ka mohio koutou na Ihowa koutou i arahi mai i te whenua o Ihipa;
- 7
- A i te ata, na, ka kite koutou i te kororia o Ihowa; e whakarongo mai ana hoki ia ki a koutou amuamutanga ki a Ihowa: tena ko maua, he aha maua, i amuamu ai koutou ki a maua?
- 8
- I mea ano a Mohi, Ka mohio koutou, ua hoatu e Ihowa ki a koutou he kikokiko hei kai i te ahiahi, a i te ata he taro, a makona noa; no te mea kua rongo a Ihowa ki a koutou amuamutanga e amuamu na koutou ki a ia: ko maua ia, hei aha? kihai koutou i amuamu ki a maua; engari ki a Ihowa.
- 9
- Na, ka mea a Mohi ki a Arona, Mea atu ki te huihui katoa o nga tamariki a Iharaira, Whakatata mai ki te aroaro o Ihowa; kua rongo hoki ia ki a koutou amuamutanga.
- 10
- A i te mea ka korero atu a Arona ki te huihui katoa o nga tamariki a Iharaira, na, ka tahuri atu ratou whaka te koraha, na, ko te kororia o Ihowa e puta mai ana i roto i te kapua.
- 11
- Na, ka korero atu a Ihowa ki a Mohi, ka mea,
- 12
- Kua rongo ahau ki nga amuamutanga a nga tamariki a Iharaira: korero atu ki a ratou, mea atu, Kia ahiahi ka kai koutou i te kikokiko, a i te ata ka makona i te taro; a ka mohio koutou ko Ihowa ahau, ko to koutou Atua,
- 13
- A i te ahiahi, na, ka puta mai te koitareke, a kapi ana te puni: a i te ata kua takoto te tomairangi i te nohoanga, tawhio noa tawhio noa.
- 14
- A ka mimiti ake te papanga romairangi, na, he mea ririki, potakataka nei kei te mata o te koraha, ririki, me te haupapa, i runga i te whenua.
- 15
- A te kitenga o nga tamariki a Iharaira, ka mea ratou ki tetahi ki tetahi, He aha tena? kihai hoki ratou i mohio he aha ranei. Na, ka mea a Mohi ki a ratou, Ko te taro ra tena ka homai nei e Ihowa ki a koutou hei kai.
- 16
- Ko te mea tena i akona mai ra e Ihowa, Kohikohia mai i reira e ia tangata e ia tangata, kia rite ki tana e kai ai: he mea tatau a tangata te homa, kia rite tonu ki a koutou: kohikohia e ia tangata e ia tangata ma te hunga i roto i ona teneti.
- 17
- A pera ana nga tamariki a Iharaira, na, kohikohia ana, he wahi nui e etahi, he wahi nohinohi e etahi.
- 18
- A ka mehuatia e ratou ki te homa, kihai i hira ta te tangata i te wahi nui, kihai hoki i peke tana i te wahi nohinohi: i kohia e ia tangata e ia tangata, rite tonu ki tana e kai ai.
- 19
- Na, ka mea a Mohi, Kaua e whakatoea tetahi wahi o tena mea ki te ata.
- 20
- Heoi, kihai ratou i whakarongo ki a Mohi; a whakatoea ana e etahi tetahi wahi o taua mea mo te ata, a muia ana e te kutukutu, a piro ake: a riri ana a Mohi ki a ratou.
- 21
- A kohikohia ana taua mea e ratou i tenei ata i tenei ata, rite tonu ki ta tenei tangata ki ta tenei tangata e kai ai; a ka mahana te ra, na, kua rewa.
- 22
- A i te ono o nga ra ka takiruatia te taro i kohikohia e ratou, e rua hoki nga homa ma te tangata kotahi; a ka haere mai nga rangatira katoa o te huihui, ka korero ki a Mohi.
- 23
- Na, ka mea ia ki a ratou, Ko ia tenei ta Ihowa i korero mai ra, Ko apopo te okiokinga o te hapati tapu o Ihowa: tunua ta koutou e tunu ai, kohuatia hoki ta koutou e kohua ai; a te toenga iho, waiho ma koutou, rongoatia atu mo te ata.
- 24
- A rongoatia atu ana e ratou mo te ata, i pera ano me ta Mohi i ki ai; kihai hoki i piro, kahore hoki i whai kutukutu.
- 25
- Na, ka mea a Mohi, Kainga tena i tenei ra; he hapati hoki tenei ra no Ihowa: e kore tena mea e kitea e koutou ki te parae i tenei ra.
- 26
- E ono nga ra e kohikohi ai koutou i tena mea; a kei te whitu o nga ra, kei te hapati, kei reira te kore ai.
- 27
- A i te whitu o nga ra ka haere atu etahi o te iwi ki te kohikohi, a kihai i kitea.
- 28
- Na, ka mea a Ihowa ki a Mohi, Kia pehea te roa o koutou e kore nei e pupuri i aku whakahaunga, i aku ture.
- 29
- Titiro, no te mea kua hoatu e Ihowa te hapati ki a koutou, koia i hoatu ai e ia, i te ra ono, he taro mo nga rangi e rua; e noho koutou e tenei tangata e tenei tangata ki tona wahi ano; kaua tetahi e haere atu i tona nohoanga i te ra whitu.
- 30
- Na, ka noho te iwi i te ra whitu.
- 31
- A huaina iho ana e te whare o Iharaira te ingoa o taua mea, He Mana: a ko tona rite kei te purapura korianara, ma tonu; ko tona reka hoki kei te taro honi nei.
- 32
- A i mea ano a Mohi, Ko te mea tenei i akona mai nei e Ihowa, Whakakiia tetahi homa ki taua mea, ka rongoa atu ai ma o koutou whakapaparanga; kia kite ai ratou i te taro i whangaia ai koutou e ahau i te koraha i taku whakaputanga mai i a koutou i te whenua o Ihipa.
- 33
- A ka mea a Mohi ki a Arona, Tangohia tetahi oko, whaowhina hoki he mana ki roto, ki a kotahi whakakiinga o te homa, ka whakatakoto ki te aroaro o Ihowa, rongoa ai, ma o koutou whakatupuranga.
- 34
- A whakatakotoria ana taua mea e Arona ki mua i te Whakaaturanga, rongoa ai, pera tonu ia me ta Ihowa i ako ai ki a Mohi.
- 35
- A e wha tekau nga tau i kai ai nga tamariki a Iharaira i te mana, a tae noa ratou ki te whenua e nohoia ana e te tangata; he mana ta ratou i kai ai, a to ratou taenga atu ra ano ki nga rohe o te whenua o Kanaana.
- 36
- Na, te homa, ko te wahi whakatekau ia o te epa.
Address: 
Phone: 
Email: