- 1
- I hangā ano e ia he aata mo nga tahunga tinana, he hitimi te rakau: e rima nga whatianga tona roa, e rima hoki whatianga tona whanui; he tapawha, e toru hoki nga whatianga tona teitei.
- 2
- I hangā ano hoki e ia ona haona ki ona koki e wha; kotahi te rakau o taua mea o ona haona: a whakakikoruatia iho e ia ki te parahi.
- 3
- I hangā ano e ia nga oko katoa o te aata, nga pāta, me nga koko pungarehu, me nga peihana, me nga marau, me nga takotoranga-ahi: i hangā e ia ona mea katoa ki te parahi.
- 4
- A i hangā ano e ia ki te parahi he kaanga-ahi mo te aata, he mea ripekapeka mo raro i tona awhi, ki raro iho, kia takapu ai ki waenga.
- 5
- A e wha nga mowhiti parahi i whakarewaina e ia mo nga koki e wha o te kaanga parahi, hei kuhunga mo nga amo.
- 6
- I hangā ano e ia nga amo, he hitimi te rakau, a whakakikoruatia iho ki te parahi.
- 7
- Na, kuhua ana e ia nga amo ki nga mowhiti i nga taha o te aata, hei amo; i hangā e ia te aata ki nga papa, he mea tuwhera kau a roto.
- 8
- I hangā ano e ia te takotoranga wai ki te parahi, me tona turanga hoki ki te parahi, ki nga whakaata o nga wahine i huihui mai, i huihui mai nei ki te whatitoka o te tapenakara o te whakaminenga.
- 9
- I hangā ano e ia te marae: he rinena miro pai nga pa o te marae o te taha ki te tonga whaka-te-tonga, kotahi rau nga whatianga:
- 10
- E rua tekau nga pou o aua mea, e rua tekau ano hoki nga turanga parahi; he hiriwa nga matau o nga pou me nga awhi.
- 11
- Me nga pa mo te taha ki te nota, kotahi rau nga whatianga, e rua tekau nga pou, e rua tekau hoki nga turanga parahi; he hiriwa nga matau o nga pou me nga awhi.
- 12
- He pa ano hoki mo te taha ki te hauauru, e rima tekau nga whatianga, kotahi tekau nga pou, kotahi tekau ano hoki nga turanga; he hiriwa nga matau o nga pou me nga awhi.
- 13
- E rima tekau hoki nga whatianga o te taha ki te rawhiti whaka-te-rawhiti.
- 14
- Kotahi tekau ma rima nga whatianga o nga pa o tetahi taha o te kuwaha; e toru nga pou, e toru hoki nga turanga.
- 15
- A kotahi tekau ma rima nga whatianga o nga pa o tera taha o te kuwaha o te marae, o tenei, o tera; e toru nga pou, e toru hoki nga turanga.
- 16
- He rinena miro pai nga pa katoa o te marae, a tawhio noa.
- 17
- He parahi nga turanga mo nga pou, he hiriwa nga matau o nga pou me nga awhi; i whakakikoruatia ano hoki ki te hiriwa nga pito ki runga: i whakawhaiawhitia ano hoki nga pou katoa o te marae ki te hiriwa.
- 18
- He mea hanga hoki ki te ngira te pa mo te kuwaha o te marae, he puuru, he papura, he ngangana, he rinena miro pai: e rua tekau hoki nga whatianga te roa, a e rima nga whatianga te teitei, ara, te whanui, rite tonu ano ki nga pa o te marae.
- 19
- A e wha nga pou o aua mea, e wha ano hoki nga turanga parahi; he hiriwa nga matau; i whakakikoruatia ano hoki nga pito o aua pou me nga awhi ki te hiriwa.
- 20
- He parahi ano hoki nga titi katoa o te tapenakara, me te marae, a tawhio noa.
- 21
- Ko nga mea tenei o te tapenakara, ara, o te tapenakara o te whakaaturanga, ko nga mea i whakaritea e Mohi i tana korerotanga, hei mahi ma nga Riwaiti i raro i te ringa o Itamara tama a Arona a te tohunga.
- 22
- Na, hangā ana e Petareere tama a Uri, ko ia nei te tama a Huru no te iwi o Hura, nga mea katoa i whakahaua mai e Ihowa ki a Mohi.
- 23
- A ko tona hoa ko Ahoriapa tama a Ahihamaka, no te iwi o Rana, he kai mahi, he mea mohio, he kai whakairo hoki i te puuru, i te papura, i te ngangana, i te rinena pai.
- 24
- A te koura katoa i mahia mo nga mea, mo nga mea katoa o te wahi tapu, te koura o te whakahere, e rua tekau ma iwa taranata, e whitu rau e toru tekau nga hekere he hekere wahi tapu.
- 25
- A ko te hiriwa o te hunga i taua o te whakaminenga kotahi rau taranata, kotahi mano e whitu rau e whitu tekau ma rima hekere, he hekere wahi tapu.
- 26
- Kotahi te pekaha, a te tangata, ara, kotahi te hawhe hekere, te hekere hoki o te wahi tapu, na te hunga hoki i haere kia taua, na nga mea e rua tekau, me nga mea i maha atu, o ratou tau, e ono rau hoki o ratou mano, e toru mano, e rima rau e rima hoki tekau.
- 27
- A i whakarewaina nga taranata hiriwa kotahi rau hei turanga pou mo te wahi tapu, hei turanga pou hoki mo te arai; kotahi rau taranata, kotahi rau nga turanga, kotahi te taranata kotahi te turanga.
- 28
- A i hangā e ia nga hekere kotahi mano e whitu rau e whitu tekau ma rima hei matau mo nga pou, a whakakikoruatia iho e ia nga pito ki runga, whakawhaiawhitia hoki.
- 29
- A e whitu tekau nga taranata o te parahi o te whakahere, e rua hoki nga mano e wha rau nga hekere.
- 30
- A i hangā taua mea e ia hei turanga pou mo te whatitoka o te tapenakara o te whakaminenga, hei aata parahi, hei kaanga parahi mo te ahi o taua mea; no reira ano hoki nga mea katoa o te aata;
- 31
- Hei turanga pou ano hoki mo te marae, a tawhio noa, hei turanga pou ano hoki mo te kuwaha o te marae, no reira ano hoki nga titi katoa o te tapenakara, me nga titi katoa o te marae, a tawhio noa.
Address: 
Phone: 
Email: