- 1
- I hangā ano hoki e ratou te puuru, te papura, me te ngangana, hei kakahu minita mo te minitatanga i te wahi tapu, i hangā ano hoki nga kakahu tapu mo Arona; i pera ano me ta Ihowa i whakahau ai ki a Mohi.
- 2
- I hangā ano e ia te epora ki te koura, ki te puuru, ki te papura, ki te ngangana, ki te rinena miro pai.
- 3
- I patua ano hoki e ratou te koura hei paraharaha, a ripiripia ana hei mangemange, a mahia ana e ratou ki roto ki te puuru, ki te papura, ki te ngangana, ki te rinena pai, he mahi whakapaipai rawa.
- 4
- I hangā ano e ratou nga pokohiwi o taua mea hei hononga: he mea hono ki a raua i nga pito e rua.
- 5
- Me te whitiki whakairo o tona epora, e mau ana ki taua mea, kotahi ano te mea i hangā ai raua, rite tonu ano tona hanganga; he koura, he puuru, he papura, he ngangana, he rinena miro pai; he pera ano me ta Ihowa i whakahau ai ki a Mohi.
- 6
- I mahia ano e ratou nga kohatu onika, he mea whakanoho ki nga nohoanga koura, tuhituhi rawa ki nga ingoa o nga tamariki a Iharaira, i peratia me te tuhinga o te hiri.
- 7
- A whakanohoia iho e ia ki nga pokohiwi o te epora hei kohatu whakamaharatanga mo nga tamariki a Iharaira; hei pera me ta Ihowa i whakahau ai ki a Mohi.
- 8
- He tohunga rawa te mahi i hangā ai e ia te kouma, he pera ano me te mahinga o te epora; he koura, he puuru, he papura, he ngangana, he rinena miro pai.
- 9
- He tapawha, he rererua te kouma i hangā e ratou: kotahi whanganga a te ringa tona roa, kotahi hoki whanganga tona whanui, he mea rererua.
- 10
- E wha hoki nga rarangi kohatu i whakanohoia e ratou ki taua mea: te rarangi tuatahi, he harariu, he topaha, he kapakara: ko te rarangi tuatahi tenei.
- 11
- Te rarangi tuarua, he emerara, he hapaira, he raimona.
- 12
- Te rarangi tuatoru, he rikuri, he akete, he ametehita.
- 13
- Te rarangi tuawha, he perira, he onika, he hahapa; he mea whakapiri ki te nohoanga koura puta noa i o ratou nohoanga.
- 14
- A rite tonu nga kohatu ki nga ingoa o nga tamariki a Iharaira, kotahi tekau ma rua, rite tonu ki o ratou ingoa, i rite te tuhi ki to te hiri, tenei tangata me tona ingoa, tenei tangata me tona ingoa; rite tonu ki nga iwi kotahi tekau ma rua.
- 15
- I hangā ano e ratou ki te koura para-kore nga mekameka, he mea whiri, mo te kouma, mo nga pito.
- 16
- I hangā ano e ratou nga nohoanga koura e rua, me nga mowhiti koura e rua; a whakanohoia iho e ratou nga mowhiti e rua ki nga pito e rua o te kouma.
- 17
- A i whakanohoia ano e ratou nga mekameka koura e rua, nga mea whiri, ki nga mowhiti e rua i nga pito o te kouma.
- 18
- I whakaukia ano hoki e ratou nga pito e rua o nga mekameka whiri e rua ki nga nohoanga e rua, a whakanohoia atu ana ki nga pokohiwi e rua o te epora, ki te taha ki mua.
- 19
- I hangā ano hoki e ratou nga mowhiti koura e rua, a whakanohoia atu ana ki nga pito e rua o te kouma, ki tona remu ki te taha ki roto whaka-te-epora.
- 20
- I hangā ano hoki e ratou etahi atu mowhiti koura e rua, a whakanohoia ana ki nga pokohiwi e rua o te epora, ki te taha ki raro, ki te taha ki mua, ki te ritenga mai o tona hononga ake, ki runga ake o te whitiki whakapaipai o te epora.
- 21
- A herea iho e ratou te kouma, ona mowhiti ki nga mowhiti o te epora ki te miro puuru, kia mau ai ki runga ake o te whitiki whakapaipai o te epora, kei takoto ke te kouma i te epora; i pera tonu me ta Ihowa i whakahau ai ki a Mohi.
- 22
- I hangā ano hoki e ia te koroka o te epora, he mea whatu, he puuru katoa.
- 23
- A he wahi tuwhera ano to waenganui o te koroka, he pera ano me te wahi tuwhera o te pukupuku, me te whiri ano i te tuwheratanga, a, puta noa puta noa; kei pakaru.
- 24
- A i hangā ano e ratou etahi pamekaranete ki te remu o te koroka ki te puuru, ki te papura, ki te ngangana, ki te rinena i mirohia.
- 25
- I hangā ano e ratou etahi pere ki te koura para-kore, a whakanohoia ana nga pere ki te takiwa o nga pamekaranete, ki te remu o te koroka, a, puta noa puta noa, ki te takiwa o nga pamekaranete;
- 26
- He pere me tetahi pamekaranete, he pere me tetahi pamekaranete ki te remu o te koroka, a, puta noa puta noa, hei mea minita; he pera ano me ta Ihowa i whakahau ai ki a Mohi.
- 27
- I hangā ano e ratou etahi koti ki te rinena pai, ki te mea i whatua, mo Arona ratou ko ana tama;
- 28
- Me te potae tohunga hoki ki te rinena pai, me etahi potae pai ano hoki ki te rinena pai, me nga tarautete rinena ki te rinena miro pai.
- 29
- Me te whitiki ki te rinena miro pai, ki te puuru, ki te papura, ki te ngangana, ki nga mea i hangā ki te ngira; he pera ano me ta Ihowa i whakahau ai ki a Mohi.
- 30
- I hangā ano hoki e ratou te paraharaha o te karauna tapu ki te koura para-kore, a tuhia iho tetahi tuhi, he mea e rite ana ki nga tuhinga o te hiri, TAPU KI A IHOWA.
- 31
- A whakanohoia ana e ratou he miro puuru ki taua mea, kia mau ai ki te potae tohunga, ki te taha ki runga; kia pera ai me ta Ihowa i whakahau ai ki a Mohi.
- 32
- Na, ka oti katoa te mahi o te tapenakara o te teneti o te whakaminenga: rite tonu hoki ta nga tamariki a Iharaira i mea ai ki nga mea katoa i whakahaua mai e Ihowa ki a Mohi, i pera ano ratou.
- 33
- Na, ka kawea mai e ratou te tapenakara ki a Mohi, te teneti me ona mea katoa, ona toromoka, ona papa, ona kaho, ona pou, me ona turanga pou,
- 34
- Me te uhi iho, nga hiako hipi kua oti te whakawhero, me tetahi uhi, ara, nga hiako pateri, me te arai hipoki,
- 35
- Me te aaka o te whakaaturanga, me ona amo, me te taupoki whakamarietanga,
- 36
- Te tepara, me ona oko katoa, me te taro aroaro,
- 37
- Te turanga-rama para-kore hoki me ona rama, ara, nga rama hei whakararangitanga me nga oko katoa o aua mea, me te hinu mo te whakamārama,
- 38
- Te aata koura hoki, me te hinu whakawahi, me te whakakakara reka, me te pa mo te whatitoka o te tapenakara,
- 39
- Te aata parahi, me tona kaanga-ahi parahi, ona amo me ona oko katoa, te takotoranga wai me tona turanga,
- 40
- Nga pa o te marae, ona pou, me ona turanga pou, me te pa mo te kuwaha o te marae, ona aho, me ona titi, me nga oko katoa mo nga mahi o te tapenakara, mo te teneti o te whakaminenga,
- 41
- Nga kakahu minita mo nga minitatanga ki te wahi tapu, me nga kakahu tapu mo Arona mo te tohunga, me nga kakahu mo ana tama, ina minita.
- 42
- Rite tonu ki nga mea katoa i whakahaua mai e Ihowa ki a Mohi ta nga tamariki a Iharaira mahinga i nga mahi katoa.
- 43
- Na, ka tirohia iho e Mohi te mahi katoa, na, rite tonu ta ratou mahi ki ta Ihowa i whakahau ai, i pera ano ratou: a manaakitia ana ratou e Mohi.
Address: 
Phone: 
Email: