- 1
- I hapainga ake ano ahau e te Wairua, a kawea ana e ia ki te keti o te whare o Ihowa ki te taha ki te rawhiti, ki tera e anga ra ki te rawhiti. Na, i te kuwaha o te keti e rua tekau ma rima nga tangata; i kitea ano e ahau i roto i a ratou a Taatania tama a Aturu raua ko Peratia tama a Penaia, he rangatira no te iwi.
- 2
- Na, ko tana meatanga mai ki a au, E te tama a te tangata, ko nga tangata enei e whakaaro ana i te kino, e whakatakoto ana i te tikanga he i roto i tenei pa.
- 3
- Ko ta ratou ki tenei, Kahore i tata: kia hanga whare tatou, ko tenei pa te kohua, ko tatou te kikokiko.
- 4
- Mo reira poropititia te he mo ratou; poropititia, e te tama a te tangata.
- 5
- Katahi ka tau iho te wairua o Ihowa ki runga ki a au, a ka mea ki a au, Ki atu, Ko te kupu tenei a Ihowa, Ko ta koutou korero tenei, e te whare o Iharaira: na, nga mea e puta ake ana i roto i o koutou wairua, mohio tonu ahau.
- 6
- Kua whakatokomahatia e koutou o koutou tupapaku ki tenei pa, kua whakakīa ano hoki e koutou ona huarahi ki nga tupapaku.
- 7
- Na, ko te kupu tenei a te Ariki a Ihowa, A koutou tupapaku kua hinga nei i a koutou ki waenganui o tenei pa, ko ratou te kikokiko, ko tenei pa hei kohua: ko koutou ia ka whakaputaina atu e ahau i waenganui o konei.
- 8
- I wehi koutou i te hoari, ka kawea mai ano hoki e ahau te hoari ki runga ki a koutou, e ai ta te Ariki ta Ihowa.
- 9
- Ka whakaputaina atu ano hoki koutou e ahau i waenganui o konei, ka hoatu ano koutou e ahau ki te ringaringa o nga tangata ke, ka mahia ano e ahau nga whakawakanga i waenganui i a koutou.
- 10
- Ka hinga koutou i te hoari, ka whakawakia koutou e ahau ki te rohe a Iharaira, a ka mohio koutou ko Ihowa ahau.
- 11
- Ehara a konei i te kohua mo koutou; ehara ano hoki koutou i te kikokiko mo roto; ka whakawakia koutou e ahau ki te rohe a Iharaira.
- 12
- A ka mohio koutou ko ahau a Ihowa, nāna nei nga tikanga kihai nei i haerea e koutou, nana ano nga whakariteritenga kihai nei i mahia e koutou; heoi rite tonu a koutou mahi ki nga whakariteritenga a nga iwi i tetahi taha o koutou, i tetahi taha o koutou.
- 13
- Na, i a au e poropiti atu ana, ka mate a Peratia tama a Penaia. Na, tapapa tonu atu ahau, he nui toku reo ki te karanga atu, i mea ahau, Aue, e te Ariki, e Ihowa! ka poto rawa ranei i a koe nga morehu o Iharaira?
- 14
- Katahi ka puta mai te kupu a Ihowa ki a au; i mea ia,
- 15
- E te tama a te tangata, O tuakana, o teina, o whanaunga, te whare katoa ano hoki o Iharaira rupeke rupeke, kua ki mai nga tangata o Hiruharama ki a ratou, Kia matara atu koutou i a Ihowa: kua homai tenei whenua ki a matou hei kāinga tupu.
- 16
- Mo reira me ki atu e koe, Ko te kupu tenei a te Ariki a Ihowa, Ahakoa i makā atu ratou e ahau ki tawhiti ki roto ki nga iwi, ahakoa i whakamararatia atu ratou e ahau ki nga whenua, ka ai ano ia ahau hei wahi tapu nohinohi mo ratou i nga whenua e tae atu ai ratou.
- 17
- Mo reira me ki atu e koe, Ko te kupu tenei a te Ariki a Ihowa, Ka kohikohia mai ano koutou e ahau i roto i nga iwi, ka huihuia mai ano hoki koutou i nga whenua i whakamararatia atu ai koutou, ka hoatu ano e ahau te oneone o Iharaira ki a koutou.
- 18
- Ka tae atu ano hoki ratou ki reira, ka whakakahoretia atu ano e ratou nga mea whakarihariha katoa o reira, me nga mea whakaanuanu ano o reira.
- 19
- Ka hoatu ano e ahau he ngakau kotahi ki a ratou, ka hoatu ano he wairua hou ki roto ki a koutou, ka maunu atu ano i a au te ngakau kohatu i roto i o ratou kikokiko, a ka hoatu he ngakau kikokiko ki a ratou:
- 20
- Kia haere ai ratou i runga i aku tikanga, kia puritia ai aku whakariteritenga, mahia iho; a waiho tonu iho ratou hei iwi moku, ko ahau ano hoki hei Atua mo ratou.
- 21
- Na, te hunga kei te whai nei o ratou ngakau i te ngakau o a ratou mea whakarihariha, o a ratou mea anuanu, ka utua e ahau o ratou ara ki runga ki o ratou māhunga, e ai ta te Ariki ta Ihowa.
- 22
- Katahi ka ara ake nga parirau o nga kerupima, me nga wīra ano i to ratou taha; i runga ano hoki te kororia o te Atua o Iharaira i a ratou, i te taha ki runga.
- 23
- Na, ka kake atu te kororia o Ihowa i roto i te pa, tu rawa atu ki runga ki te maunga ki te taha ki te rawhiti o te pa.
- 24
- Muri iho ka hapainga atu ahau e te Wairua, a kawea atu ana ahau e ia ki Karari ki nga whakarau, he mea whakakitenga, he mea na te Wairua o te Atua. Katahi ka kake atu i a au te whakakitenga i kitea e ahau.
- 25
- Na, korerotia atu ana e ahau ki nga whakarau nga mea katoa i whakakitea mai ki a au e Ihowa.
Address: 
Phone: 
Email: