- 1
- I puta mai ano te kupu a Ihowa ki a au, i mea ia,
- 2
- E te tama a te tangata, kei te noho koe i waenganui i te whare whakakeke, he kanohi nei o ratou hei titiro atu, heoi kahore ratou e titiro, he taringa o ratou hei whakarongo, heoi kahore ratou e rongo; no te mea he whare whakakeke ratou.
- 3
- Na, whakapaingia etahi mea mau, e te tama a te tangata, mo te heke, ka heke i te awatea i ta ratou tirohanga mai ano; me heke atu i to wahi ki tetahi atu wahi i ta ratou tirohanga mai ano; tera pea ratou e mahara iho, he whare whakakeke ia ratou.
- 4
- Whakaputaina mai ano au mea ki waho i te awatea i ta ratou tirohanga mai ano, kia rite ki nga mea a te heke: me haere atu koe i te ahiahi i ta ratou tirohanga mai ano, kia rite ki te haerenga atu o te heke,
- 5
- Pokaia e koe te taiepa i ta ratou tirohanga mai ano: na reiratia ano to kawenga.
- 6
- I a ratou e titiro mai ana, amohia atu i runga i to pokohiwi, me mau atu i te kakarauritanga; to mata, hipoki rawa, kei kite koe i te whenua; no te mea ka hoatu nei koe e ahau hei tohu ki te whare o Iharaira.
- 7
- Na, mahia ana e ahau nga mea i whakahaua mai ai ahau; whakaputaina atu ana e ahau aku mea i te awatea, nga mea a te heke, a i te ahiahi ka pokaia e ahau te taiepa he mea mea na toku ringaringa; i te kakarauritanga ka whakaputaina atu e ahau aua mea, he mea amo i runga i te pokohiwi i ta ratou tirohanga mai ano.
- 8
- Na, i te ata ka puta mai te kupu a Ihowa ki a au; i mea ia,
- 9
- E te tama a te tangata, kihai ianei te whare o Iharaira, te whare whakakeke, i mea ki a koe, E aha ana koe?
- 10
- Ki atu ki a ratou, Ko te kupu tenei a te Ariki a Ihowa; Mo te rangatira i Hiruharama tenei pikaunga, mo te whare katoa ano hoki i Iharaira i roto i a ratou.
- 11
- Ki atu, Hei tohu ahau ki a koutou, Taku i mea nei ka meatia ki a ratou; ka heke atu ratou, ka riro i te whakaraunga.
- 12
- Te rangatira i roto i a ratou ka amo mea ano ia i runga i tona pokohiwi i te kakarauritanga, ka haere atu; ka pokaia e ratou te taiepa hei whakaputanga atu mo nga mea, tona mata hipoki rawa, kei kite ona kanohi i te whenua.
- 13
- Ka taupokina ano ia e ahau ki taku kupenga, ka mau i taku rore, ka kawea ano ia e ahau ki Papurona ki te whenua o nga Karari, e kore ano ia e kite i reira, otiia ka mate ia ki reira.
- 14
- Na, te hunga i tetahi taha ona, i tetahi taha, hei awhina mai, ratou ko ona ropu katoa, ka ruiruia atu e ahau ki nga hau katoa; ka maunu ano i a au te hoari hei whai i a ratou.
- 15
- A ka mohio ratou ko Ihowa ahau, ina whakamararatia atu ratou e ahau ki roto ki nga tauiwi, ina ruiruia atu ratou e ahau ki nga whenua.
- 16
- Ka whakatoea ano ia etahi o ratou e ahau, he hunga torutoru, kei mate i te hoari, i te hemo-kai, i te mate uruta, hei korero i ā ratou mea whakarihariha katoa i roto i nga iwi ka haere atu nei ratou ki reira, a ka mohio ratou ko Ihowa ahau.
- 17
- I puta mai ano te kupu a Ihowa ki a au, i mea,
- 18
- E te tama a te tangata, e wiri koe ina kai i to taro, inumia hoki te wai i runga i te ohooho, i te manukanuka.
- 19
- Ki atu hoki ki te iwi o te whenua, Ko te kupu tenei a te Ariki a Ihowa mo nga tangata o Hiruharama, mo te oneone o Iharaira; Ka kainga e ratou ta ratou taro i runga i te manukanuka, ka inumia hoki ta ratou wai i runga i te miharo, he mea kia kore rawa ai tona whenua, me ona mea maha, mo te mahi nanakia hoki a nga tangata katoa e noho ana i reira.
- 20
- Nga pa ano hoki e nohoia ana ka waiho hei koraha, ka ururuatia ano te whenua; a ka mohio koutou ko Ihowa ahau.
- 21
- A i puta mai ano te kupu a Ihowa ki a au, i mea;
- 22
- E te tama a te tangata, he aha tena whakatauki a koutou i te oneone o Iharaira, te kupu ra, Ka roa nei nga ra, kua kore ano hoki he whakakitenga mai?
- 23
- Mo reira ki atu e koe ki a ratou, Ko te kupu tenei a te Ariki a Ihowa; Ka whakamutua e ahau tenei whakatauki, e kore ano e whakataukitia e ratou i muri ake nei i roto i a Iharaira; mea atu ano ia ki a ratou, Ka tata nga ra, me te meatanga ano o nga whakakitenga katoa.
- 24
- No te mea i muri nei kahore he whakakitenga horihori, kahore he kupu tinihanga a te tohunga maori i waenganui i te whare o Iharaira.
- 25
- No te mea ko Ihowa ahau; ka korero ahau, a te kupu e korerotia e ahau ka oti; e kore e kumea kia roa a muri ake nei: no te mea i o koutou rangi nei, e te whare whakakeke, ka korerotia e ahau, ka mahia ano hoki te kupu, e ai ta te Ariki ta Ihowa.
- 26
- A i puta mai ano te kupu a Ihowa ki a au, i mea,
- 27
- E te tama a te tangata, nana, e ki ana te whare o Iharaira, Mo nga rangi maha te whakakitenga e kitea nei e ia, ko nga wa i tawhiti tana e poropiti nei.
- 28
- Mo reira ki atu ki a ratou, Ko te kupu tenei a te Ariki a Ihowa; E kore tetahi o aku kupu e kumea kia roa a muri nei; no te mea te kupu i korerotia e ahau ka oti, e ai ta te Ariki ta Ihowa.
Address: 
Phone: 
Email: