- 1
- A i puta mai ano te kupu a Ihowa ki a au, i mea,
- 2
- E te tama a te tangata, poropititia he hē mo nga poropiti a Iharaira e poropiti nei, mea atu hoki ki te hunga no o ratou ngakau ta ratou e poropiti nei, Whakarongo ki te kupu a Ihowa.
- 3
- Ko te kupu tenei a te Ariki a Ihowa; Aue te mate mo nga poropiti wairangi, e whai nei i o ratou wairua ake, i te mea kihai i kitea e ratou!
- 4
- Rite tonu o poropiti, e Iharaira, ki nga pokiha i nga koraha.
- 5
- Kihai koutou i haere ki nga wahi pakaru, kihai ano i hanga i te taiepa mo te whare o Iharaira, hei turanga i te tatauranga i te ra o Ihowa.
- 6
- He kitenga teka to ratou, he tuāhu horihori, i a ratou e mea nei, E ki ana a Ihowa, i te mea kihai nei a Ihowa i unga i a ratou: heoi kua meinga nei e ratou etahi atu kia tumanako atu ki ta ratou whakamananga i te kupu.
- 7
- He teka ianei he kitenga teka ta koutou kitenga, he horihori te tuāhu i korero ai koutou, i a koutou e ki ra, E ki ana a Ihowa; a kihai nei ahau i korero?
- 8
- Mo reira ko te kupu tenei a te Ariki a Ihowa; Kua korero na koutou i te teka, kua kite i te horihori, mo reira, he hoa riri tenei ahau mo koutou, e ai ta te Ariki, ta Ihowa.
- 9
- Ka pa ano toku ringa ki nga poropiti he teka nei to ratou kitenga, ki nga tohunga tuāhu horihori ano hoki; e kore ratou e noho i te whakaminenga o toku iwi, e kore ratou e tuhituhia ki te tuhituhinga o te whare o Iharaira, e kore ano ratou e tae ki te oneone o Iharaira, a ka mohio koutou ko ahau te Ariki a Ihowa.
- 10
- Mo ratou, ae ra, mo ratou i whakapohehe i toku iwi, i mea, Ka mau te rongo; i te mea kahore he maunga rongo: na, ko tetahi kei te hanga i te pakitara, a ko etahi atu hei pani ki te paru kihai i konatunatua.
- 11
- Mea atu ki nga kai pani o te paru kihai i konatunatua, Tera e hinga; ka puta te ua, he waipuke; ka taka iho ano koutou, e nga nganga o te whatu; ka wahia ano hoki e te hau, e te paroro.
- 12
- Nana, ka hinga te pakitara, e kore ranei tetahi e mea mai ki a koutou, Kei hea te paninga i pania ra e koutou?
- 13
- Mo reira ko te kupu tenei a te Ariki a Ihowa; Ina, ka wahia e ahau ki te hau, ki te paroro, i a au e weriweri ana, ka puta ano te ua, te waipuke, i a au e riri ana, me nga nganga ano o te whatu i a au e weriweri ana hei whakapoto rawa.
- 14
- Ka pakaru ano i a au te pakitara i pania ra e koutou ki te paru kihai i konatunatua; pa tonu iho ki te whenua, ka whakakitea ano hoki ona turanga, a ka hinga, ka poto ano koutou ki waenganui o taua pakitara, a ka mohio koutou ko ahau a Ihowa.
- 15
- Ka whakapaua atu ano e ahau taku weriweri ki te pakitara, ki te hunga ano hoki nana i pani ki te paru kihai i konatunatua, ka mea atu hoki ahau ki a koutou, Kua kore te pakitara, kua kore ano hoki te hunga nana i pani;
- 16
- Ara, nga poropiti a Iharaira e poropiti nei i te mea mo Hiruharama, a e kite ana i te kitenga mona, i te rongo mau, i te mea nei kahore he rongo mau, e ai ta te Ariki ta Ihowa.
- 17
- Na, ko koe, e te tama a te tangata, anga atu to mata ki nga tamahine a to iwi e poropiti nei, he mea no o ratou ngakau ake; poropititia ano hoki te he mo ratou.
- 18
- Me ki atu ano e koe, Ko te kupu tenei a te Ariki a Ihowa; Aue te mate mo nga wahine e tuitui ana i nga urunga ki nga tuke katoa, e hanga ana hoki i nga arai mo nga māhunga o te roa, o te poto, hei hopu wairua. E whaia ranei e koutou nga wairua o toku iwi? e whakaorangia ano ranei e koutou nga wairua e haere mai ana ki a koutou?
- 19
- E whakapoke ranei koutou i a au i roto i toku iwi hei utu mo nga kutanga parei, mo nga kongakonga taro, e whakamate ranei i nga wairua e kore e tika kia whakamatea, e whakaora i nga wairua e kore e tika kia ora, i a koutou ka korero teka na ki toku iwi e whakarongo nei ki ā koutou korero teka?
- 20
- Mo reira ko te kupu tenei a te Ariki a Ihowa; Nana, e he ana ahau ki ā koutou urunga i hopukia ai nga wairua e koutou, i meinga ai kia rere, ka haea atu ano hoki e ahau i o koutou ringaringa, ka tukua ano nga wairua kia haere, a koutou wairua e whai ra, e mea ra kia rere.
- 21
- Ka haea atu ano e ahau a koutou arai, ka whakaorangia ano hoki toku iwi i roto i o koutou ringaringa, e kore ano e waiho i o koutou ringaringa hei whainga atu; a ka mohio koutou ko Ihowa ahau.
- 22
- Na, e whakapouritia ana e koutou ki te kupu teka te ngakau o te tangata tika, taku kihai nei i whakapouri; a whakaungia ana nga ringaringa o te tangata kino, i kore ai ia e tahuri mai i tana ara kino, kia ora ai ia:
- 23
- Mo reira e kore koutou e kite i aua tekateka noa i muri ake nei, e kore ano e kite tikanga ki ā koutou tuāhu; ka whakaorangia hoki e ahau toku iwi i roto i o koutou ringa; a ka mohio koutou ko Ihowa ahau.
Address: 
Phone: 
Email: