- 1
- I puta mai ano te kupu a Ihowa ki a au, i mea,
- 2
- He aha ra tenei whakatauki i whakataukitia ai e koutou mo te oneone o Iharaira? e ki ra hoki koutou, I kai nga mātua i nga karepe kaiota, a, maniania ana nga niho o nga tamariki,
- 3
- E ora ana ahau, e ai ta te Ariki ta Ihowa, e kore tenei whakatauki e whakataukitia e koutou a muri ake i roto i a Iharaira.
- 4
- Nana, nga wairua katoa naku, te wairua o te pāpā, pera tonu te wairua o te tamaiti, naku: te wairua e hara ana, ko tera e mate.
- 5
- Na, ki te mea e tika ana tetahi tangata, a ka mahia e ia te mea e rite ana, e tika ana,
- 6
- Ki te mea kihai ia i kai ki runga ki nga maunga a kihai ona kanohi i anga ake ki nga whakapakoko o te whare o Iharaira, ki te mea kihai i poke i a ia te wahine a tona hoa, a kihai ia i whakatata atu ki te wahine e paheke ana,
- 7
- Ki te mea kihai tetahi tangata i tukinotia e ia, ki te mea i whakahokia atu e ia tona taunaha ki te tangata i a ia nei ana moni, ki te mea kihai ia i pahua, ki te mea i homai e ia tana taro ma te tangata e hemo-kai ana, a i hipokina e ia ki te kakahu te tangata e noho tahanga ana;
- 8
- Ki te mea kahore ana mea i hoatu hei moni whakatuputupu, a kihai etahi hua i riro mai i a ia, ki te mea i whakahokia iho e ia tona ringa i te kino, a he pono tana whakarite i te whakawakanga a tetahi tangata ki tetahi tangata,
- 9
- Ki te mea i haere ia i runga i aku tikanga, pupuri tonu i aku whakariteritenga, pono tonu te mahi, tika tonu tana, ka ora ia, e ai ta te Ariki ta Ihowa.
- 10
- Ki te whanau tetahi tamaiti āna, he tahae, he kai whakaheke toto, a ka mahia e ia tetahi o enei mea,
- 11
- Ka kore ano hoki e mahia e ia tetahi o enei mea pai, engari e kai ana ki runga ki nga maunga, e whakapoke ana i te wahine a tona hoa,
- 12
- E tukinotia ana e ia te ware raua ko te rawa-kore, e pahua noa ana, a kahore e whakahokia e ia te taunaha, engari e anga ana ona kanohi ki nga whakapakoko, e mahi ana i te mea whakarihariha,
- 13
- E hoatu ana i te moni whakatuputupu, e tango ana i nga hua, e ora ranei ia? e kore ia e ora, kua mahia e ia enei mea whakarihariha katoa; ko te mate kau mona, ki runga ano i a ia ona toto.
- 14
- Na, ki te whanau tetahi tamaiti a tenei, a ka kite ia i nga hara katoa i mahia e tona pāpā, a ka mahara, ka kore e mahi i te pena,
- 15
- Kahore ia e kai ki runga ki nga maunga, kahore hoki ona kanohi e anga ki nga whakapakoko o te whare o Iharaira, kahore e whakapokea e ia te wahine a tona hoa,
- 16
- Kahore ana tukino i te tangata, kahore e pupuri i te taunaha, kahore hoki ana pahua, e hoatu ana e ia tana taro ma te tangata e hemo-kai ana, e hipokina ana hoki e ia ki te kakahu te tangata e noho tahanga ana.
- 17
- E whakakohia atu ana e ia tona ringa i te ware, kahore hoki e tangohia e ia te moni whakatuputupu, me nga hua, e mahia ana e ia aku whakariteritenga, e haere ana i runga i aku tikanga, e kore tera e mate mo te he o tona pāpā; ka ora ia.
- 18
- Tona pāpā, he tukino noa iho tana, he pahua noa iho i tona teina, kihai hoki i pai nga mea i mahia e ia i roto i tona iwi, na, ka mate ia i runga i tona kino.
- 19
- Heoi e mea na koutou, He aha ra te tamaiti tē waha ai i te kino o te papa? Ki te mahia e te tamaiti te mea e rite ana, e tika ana, a ka puritia e ia aku tikanga, ka mahia ano e ia, ina, ka ora ia.
- 20
- Te wairua e hara ana, ka mate tera. E kore te tamaiti e waha i te kino o te pāpā, e kore ano te pāpā e waha i te kino o te tamaiti: ko runga ano i a ia te tika o te tangata tika, te tangata kino ano hoki ko runga ano i a ia tana kino.
- 21
- Ki te tahuri ia te tangata kino i ona hara katoa i mahia e ia, a ka puritia e ia aku tikanga katoa, ka mahia ano e ia te mea e rite ana, e tika ana, ina, ka ora ano ia, e kore ia e mate.
- 22
- E kore tetahi o ona he i mahia e ia e maharatia mai ki a ia; ka ora ia i tana tika i mahia e ia.
- 23
- Ko taku koanga ngakau ranei tena ko te matenga o te tangata kino? e ai ta te Ariki ta Ihowa; he teka ranei ko ia kia tahuri mai i ona ara, kia ora?
- 24
- Ki te tahuri atu ia te tangata tika i tana tika, ki te mahia e ia te he, a ka rite tana mahi ki nga mea whakarihariha katoa i mahia e te tangata kino, e ora ranei ia? e kore ana tikanga katoa i mahia e ia e maharatia; ka mate ia i runga i tana kino i kino ai ia, i runga ano i tona hara i hara ai ia.
- 25
- Heoi kei te mea na koutou, Kahore e rite te ara a te Ariki. Tena ra, whakarongo mai, e te whare o Iharaira, Kahore ranei taku ara e rite? he teka ianei no koutou nga ara kahore e rite?
- 26
- Ki te tahuri atu te tangata tika i tana tika i mahia e ia, a ka mahi i te kino, mate iho i runga i aua mea, e mate ano ia mo tana kino i mahia e ia.
- 27
- Ki te tahuri mai ano hoki te tangata kino i tana kino i mahia e ia, a ka mahia e ia te mea e rite ana, e tika ana, ka ora ano i a ia tona wairua.
- 28
- Nana hoki i whakaaro, a tahuri mai ana i ona he katoa i mahia e ia; ina, ka ora ia, e kore ia e mate.
- 29
- Heoi kei te mea te whare o Iharaira, Kahore e rite te ara a te Ariki. Kahore ranei aku ara e rite, e te whare o Iharaira? he teka ianei no koutou nga ara kahore e rite?
- 30
- Ae ra, ka rite ki tona ara, ki tona ara, taku whakawakanga i a koutou, e te whare o Iharaira, e ai ta te Ariki ta Ihowa. Ripeneta, tahuri mai hoki i o koutou he katoa, a e kore te he e waiho hei whakataka mo koutou.
- 31
- Makā atu, kia matara atu i a koutou a koutou he katoa i he ai koutou; mahia hoki he ngakau hou, he wairua hou mo koutou: kia mate hoki koutou hei aha, e te whare o Iharaira?
- 32
- Kahore hoki au e ahuareka atu ki te matenga o te tangata e mate ana, e ai ta te Ariki ta Ihowa: na, tahuri mai, e ora.
Address: 
Phone: 
Email: