- 1
- Na, whakahuatia he tangi mo nga rangatira o Iharaira,
- 2
- Mea atu hoki, He aha to whaea? He raiona uha: i roto i nga raiona ia e takoto ana, ana kuao he mea whakatupu nana i roto i nga raiona,
- 3
- Na, atawhaitia ake ana e ia tetahi o ana kuao, kua rahi, kua ako ki te hopu tupapaku mana; kua kai i te tangata.
- 4
- I rongo ano nga iwi ki a ia; i mau ia ki roto ki ta ratou poka, na, kawea ana ia e ratou, mekameka rawa, ki te whenua o Ihipa.
- 5
- A ka kite tera kua tatari ia, a kua kore tana i tumanako atu ai, na, ka mau ia ki tetahi atu o ana kuao, meinga ana ia e ia hei kuao rahi.
- 6
- Na, kei te haereere tera i roto i nga raiona, kua rahi, kua ako ki te hopu tupapaku mana; kua kai i te tangata.
- 7
- I mohio ano ia ki o ratou whare kingi, whakaururuatia ana e ia o ratou pa, moti iho te whenua me ona tini mea i te haruru o tona hamamatanga.
- 8
- Katahi ia ka whakaekea e nga iwi o nga kawanatanga i tetahi taha, i tetahi taha, horahia ana e ratou he kupenga ki runga ki a ia, kua mau ki roto ki ta ratou poka.
- 9
- Katahi ia ka tutakina atu, mea rawa ki nga mekameka, a kawea ana ia ki te kingi o Papurona, i kawea atu ia e ratou ki nga pa kaha, kia kore ai tona reo e rangona i muri ki runga ki nga maunga o Iharaira.
- 10
- I rite to whaea ki te waina, i te mea he toto kei a koe, he mea whakato ano ia ki te taha o nga wai: he mea whai hua ia, he mea whai manga, he maha hoki no nga wai.
- 11
- He peka kaha ano hoki ana hei hepeta mo nga kingi; purero tonu ia, roa tonu, i roto i nga manga pururu, i kitea atu ia e purero ana, me ona manga maha ano hoki.
- 12
- Heoi kua hutia atu ia i runga i te weriweri, kua makā ki te whenua, maroke ake i te hau, i te marangai, one hua: whatiwhatīa ake ona peka kaha, maroke ake, kainga ake e te ahi.
- 13
- Na, inaianei kua oti ia te whakato ki te koraha, ki te whenua maroke e mate ana i te wai.
- 14
- I puta mai ano he ahi i roto i tetahi peka i roto i ona manga, pau ake ona hua; kore ake ona peka kaha hei hepeta kingi. He tangi tenei, ka waiho ano hei tangi.
Address: 
Phone: 
Email: