- 1
- Na, i te whitu o nga tau, i te rima o nga marama, i te tekau o nga ra o te marama, ka haere mai etahi o nga kaumatua o Iharaira ki te rapu tikanga i a Ihowa, a noho ana i toku aroaro.
- 2
- Na, ko te putanga mai o te kupu a Ihowa ki a au; i mea ia,
- 3
- E te tama a te tangata, korero atu ki nga kaumatua o Iharaira, mea atu ki a ratou, Ko te kupu tenei a te Ariki a Ihowa; I haere mai ranei koutou ki te rapu tikanga i a au? E ora ana ahau, e kore au e pai kia rapua e koutou he tikanga i a au, e ai ta te Ariki ta Ihowa.
- 4
- E whakawa ranei koe i a ratou, e te tama a te tangata, e whakawa ranei koe i a ratou? kia mohio ratou ki nga mea whakarihariha a o ratou mātua:
- 5
- Mea atu hoki ki a ratou, Ko te kupu tenei a te Ariki a Ihowa, I te rangi i whiriwhiria ai e ahau a Iharaira, i toku ringaringa ra i ara ki nga uri o te whare o Hakopa, a whakakite atu ana ahau i a au ki a ratou i te whenua o Ihipa, i toku ringa i ara atu ra ki a ratou, i a au ra i mea, Ko Ihowa ahau ko to koutou Atua;
- 6
- I taua rangi ano i ara ai toku ringa ki a ratou ki te tango mai i a ratou i te whenua o Ihipa ki te whenua i tirohia e ahau mo ratou, e rerengia ana e te waiu, e te honi, ki te wahi ataahua rawa o nga whenua katoa;
- 7
- I mea atu ahau ki a ratou, Makā e tera e tera nga mea whakarihariha o ona kanohi; kaua hoki koutou e whakapokea ki nga whakapakoko o Ihipa; ko Ihowa ahau, ko to koutou Atua.
- 8
- Na, kei te whakakeke ratou ki a au, kihai hoki i pai ki te whakarongo ki a au, kihai i makā atu e ratou nga mea whakarihariha o nga kanohi o ia tangata, o ia tangata, kihai i whakarerea e ratou nga whakapakoko o Ihipa: na, ko taku meatanga ake kia ringitia atu taku weriweri ki a ratou, kia whakapaua atu taku riri ki a ratou i waenganui o te whenua o Ihipa.
- 9
- Heoi mahi ana ahau, he whakaaro ki toku ingoa, kei whakapokea i te tirohanga mai a nga iwi i noho tahi nei ratou, i meinga nei e ahau kia mohio ki a au, i a ratou ra i kite, i a ratou e tangohia mai ana i te whenua o Ihipa.
- 10
- Na, tangohia mai ana ratou e ahau i te whenua o Ihipa, kawea mai ana ratou ki te koraha.
- 11
- I hoatu ano e ahau aku tikanga ki a ratou, i whakakitea atu ano ki a ratou aku whakariteritenga e ora ai te tangata ki te mahia e ia;
- 12
- I hoatu ano e ahau aku hapati ki a ratou hei tohu ki a au, ki a ratou, kia mohio ai ratou ko ahau ko Ihowa to ratou kai whakatapu.
- 13
- Heoi kei te whakakeke te whare o Iharaira ki a au i te koraha; kihai ratou i haere i runga i aku tikanga, whakaparahako ana ratou ki aku whakaritenga e ora ai te tangata ki te mahia e ia; whakapokea rawatia ana e ratou aku hapati: na, ko taku meatanga ake kia ringitia atu taku weriweri ki runga ki a ratou i te koraha, kia moti ra ano ratou.
- 14
- Heoi mahi ana ahau, he whakaaro ki toku ingoa, kei whakapokea i te tirohanga mai a nga iwi i kite nei i taku tangohanga mai i a ratou.
- 15
- I ara ano ia toku ringa ki a ratou i te koraha, mo ratou e kore e kawea ki te whenua i hoatu e ahau, ki te wahi e rerengia ana e te waiu, e te honi, e ataahua rawa ana i nga whenua katoa;
- 16
- Mo ratou i whakaparahako ki aku whakaritenga, a kihai i haere i runga i aku tikanga, aku hapati ano hoki whakapokea iho e ratou; he whai hoki no o ratou ngakau i ā ratou whakapakoko.
- 17
- Heoi i tohungia ano ratou e toku kanohi, kihai i whakangaromia, kihai ano ahau i whakamoti i a ratou ki te koraha.
- 18
- Engari i mea atu ahau ki ā ratou tamariki i te koraha, Kaua e haere i runga i nga tikanga a o koutou mātua, kaua ano e puritia a ratou whakaritenga, kei poke ano hoki koutou i ā ratou whakapakoko.
- 19
- Ko Ihowa ahau, ko to koutou Atua: haere i runga i aku tikanga, puritia ano hoki aku whakaritenga, mahia;
- 20
- Whakatapua ano hoki aku hapati, waiho hei tohu ki a au, ki a koutou, kia mohio ai koutou ko Ihowa ahau, ko to koutou Atua.
- 21
- Na, kei te whakakeke nga tamariki ki a au, kihai ratou i haere i runga i aku tikanga, kihai hoki i pupuri i aku whakaritenga hei mahi ma ratou; (ki te mahia hoki ena e te tangata, ka ai hei oranga mona,) aku hapati ano hoki, whakapokea iho e ratou: na, ko taku kianga ake, kia ringitia atu taku weriweri ki runga ki a ratou, kia whakapaua atu ano hoki taku riri ki a ratou i te koraha.
- 22
- Heoi whakahokia iho ana e ahau toku ringaringa, a mahi ana ahau me te whakaaro ano ki toku ingoa, kei poke i te tirohanga mai a nga iwi i kite nei i taku tangohanga mai i a ratou.
- 23
- I ara ano toku ringa ki a ratou i te koraha, he mea hoki ka whakamararatia atu ratou ki roto ki nga tauiwi, ka titaritaria atu ki nga whenua;
- 24
- Mo ratou kihai i mahi i aku whakaritenga; mo ratou ano i whakaparahako ki aku tikanga, na, whakapokea iho e ratou aku hapati, anga tonu ana o ratou kanohi ki nga whakapakoko o o ratou mātua.
- 25
- Na, hoatu ana e ahau ki a ratou nga tikanga kahore i pai, me nga whakaritenga e kore ai ratou e ora.
- 26
- I whakapokea ano ratou e ahau ki ā ratou mea homai noa, a meinga ana e ratou nga tamariki katoa e orokoputa mai ana i te kopu kia tika i roto i te ahi, he mea e meinga ai ratou e ahau kia noho kau noa iho, kia mohio ai ratou ko Ihowa ahau.
- 27
- Mo reira korero atu ki te whare o Iharaira, e te tama a te tangata, mea atu ki a ratou, Ko te kupu tenei a te Ariki a Ihowa, Tenei ano tetahi kohukohu a o koutou mātua ki a au, i a ratou i mahi nei i te he ki a au.
- 28
- Ka oti ratou te kawe e ahau ki te whenua i ara ai toku ringa kia hoatu a reira ki a ratou, na, ta ratou kitenga i tetahi pukepuke tiketike, i tetahi rakau rau maha, na patua ana e ratou ki reira a ratou patunga tapu, tapaea ana e ratou ki reira te mea whakapataritari, ta ratou whakahere: mahia ana e ratou ta ratou whakakakara reka ki reira, ringitia ana e ratou ki reira a ratou ringihanga.
- 29
- Na, ko taku meatanga atu ki a ratou, Ko tehea ta koutou pukepuke e haereere nei koutou? Na, ko Pama te ingoa i karangatia ki reira, a taea noatia tenei ra.
- 30
- Mo reira mea atu ki te whare o Iharaira, Ko te kupu tenei a te Ariki a Ihowa; Ka whakapokea ranei koutou i runga ano i nga ara o o koutou mātua? ka whai ranei koutou i ā ratou mea whakarihariha puremu ai?
- 31
- I te mea hoki ka tapaea atu e koutou a koutou mea hoatu noa, a ka meinga a koutou tamariki kia tika na roto i te ahi, e whakapoke ana koutou i a koutou ano ki ā koutou whakapakoko katoa, a taea noatia tenei ra: a me rapu tikanga mai ranei i a au ma koutou, e te whare o Iharaira? E ora ana ahau, e ai ta te Ariki ta Ihowa, e kore ahau e pai kia uia e koutou.
- 32
- Na, te mea i puta ake ki roto ki o koutou wairua e kore rawa e taea, ta koutou e ki ra, Ka rite tatou ki nga tauiwi, ki nga hapu o nga whenua, ka mahi ki te rakau, ki te kohatu.
- 33
- E ora ana ahau, e ai ta te Ariki ta Ihowa, ina, he ringa kaha toku, he tākakau kua oti te whakamaro, he weriweri kua oti te riringi atu, i a au ka kawana nei i a koutou.
- 34
- Ka tangohia mai ano koutou e ahau i roto i nga iwi, ka huihuia mai ano hoki koutou i nga whenua i whakamararatia atu ai koutou, he meatanga na te ringa kaha, na te tākakau kua oti te whakamaro, na te weriweri kua oti te riringi atu.
- 35
- Ka kawea atu ano koutou e ahau ki te koraha o nga iwi, ka whakawakia ano hoki koutou ki reira titiro atu, titiro mai.
- 36
- Ka rite ki taku whakawakanga i o koutou mātua i te koraha o te whenua o Ihipa; ka pena ano taku whakawakanga i a koutou, e ai ta te Ariki ta Ihowa.
- 37
- Ka meinga ano koutou e ahau kia tika i raro i te tokotoko, kia uru ano hoki ki roto ki te here o te kawenata.
- 38
- Ka tahia atu ano hoki e ahau i roto i a koutou te hunga whakakeke, te hunga hoki e tutu ana ki a au: ka tangohia mai ratou i te whenua e noho nei ratou, e kore ano ratou e tae ki te oneone o Iharaira: a ka mohio koutou ko Ihowa ahau.
- 39
- Na,—koutou, e te whare o Iharaira, —ko te kupu tenei a te Ariki a Ihowa; Haere, e mahi ki tana whakapakoko, ki tana whakapakoko, i nga wa e takoto ake nei, ki te kore nei koutou e rongo ki a au: kaua ia toku ingoa tapu e whakapokea i muri ki ā koutou mea homai noa, ki ā koutou whakapakoko.
- 40
- Taku maunga tapu hoki, te maunga purero rawa o Iharaira, e ai ta te Ariki ta Ihowa, ko te wahi tera e mahi ai te whare katoa o Iharaira, ratou katoa i te whenua, ki a au: ko te wahi tera e manako atu ai ahau ki a ratou, ko te wahi ano tera e mea ake ai ahau ki ā koutou whakahere maku, ki nga matamua o a koutou mea e tapae mai ai, ki ā koutou mea tapu katoa.
- 41
- Ka manako ahau ki a koutou, ki ta koutou whakakakara reka ano, ina tangohia mai koutou e ahau i roto i nga iwi, ina huihuia mai koutou i nga whenua i whakamararatia atu ai koutou, a ka ai koutou hei whakatapu moku i te tirohanga mai a nga iwi.
- 42
- Na, ka mohio koutou ko Ihowa ahau, ina kawea koutou e ahau ki te oneone o Iharaira, ki te whenua i ara ai toku ringa kia hoatu a reira ki o koutou mātua.
- 43
- Ka mahara ano koutou i reira ki ā koutou ara, ki ā koutou mahi katoa i poke ai koutou; a ki ta koutou whakaaro iho he mea whakarihariha koutou i ā koutou kino katoa i mahia e koutou.
- 44
- A ka mohio koutou ko Ihowa ahau, i a au ka mahara nei ki toku ingoa, ina mahi ahau ki a koutou, a kahore taku e rite ki ā koutou ara kino, ki ā koutou mahi he, e te whare o Iharaira, e ai ta te Ariki ta Ihowa.
- 45
- I puta mai ano te kupu a Ihowa ki a au, i mea,
- 46
- E te tama a te tangata, anga atu to mata whaka-te-ara ki te tonga, kia maturuturu atu ano to kupu ki te taha ki te tonga, poropititia he hē mo te ngahere o te parae ki te tonga.
- 47
- Mea atu hoki ki te ngahere i te tonga, Whakarongo mai ki te kupu a Ihowa, Ko te kupu tenei a te Ariki a Ihowa, Tenei au te whakau nei i te ahi i roto i a koe, a ka pau nga rakau matomato katoa i roto i a koe, me nga rakau maroke katoa ano hoki, e kore te mura e tineia, ka mura tonu, ka wera ano nga kanohi katoa i reira, i te tonga, tae noa ki te nota.
- 48
- A ka kite nga kikokiko katoa naku na Ihowa i whakau: e kore e tineia.
- 49
- Ano ra atu ko au, Aue, e te Ariki e Ihowa! e mea ana ratou ki a au, He teka ianei he korero whakatauki āna e korero nei?
Address: 
Phone: 
Email: