- 1
- I puta mai ano te kupu a Ihowa ki a au, i mea,
- 2
- E te tama a te tangata, anga atu to mata ki Hiruhararna, kia maturuturu iho ano hoki to kupu ki nga wahi tapu, poropititia he hē mo te oneone o Iharaira.
- 3
- Mea atu hoki ki te oneone o Iharaira, Ko te kupu tenei a Ihowa, Nana, hei hoa riri ahau mou, ka maunu ano i a au taku hoari i roto i tona takotoranga, ka hatepea atu ano hoki e ahau te tangata tika raua ko te tangata he i roto i a koe.
- 4
- Na, ka hatepea atu e ahau i roto i a koe te tangata tika raua ko te tangata he, ka maunu mai ano taku hoari i roto i tona takotoranga ki nga kikokiko katoa i te taha ki te tonga, tae noa ki te nota.
- 5
- A ka mohio nga kikokiko katoa, naku na Ihowa i unu mai taku hoari i roto i tona takotoranga: e kore ano e hoki i muri iho.
- 6
- Na, ko koe, e te tama a te tangata, e aue, me te mea kua whati te hope; kia nui noa atu to aue ki to ratou aroaro.
- 7
- A ki te mea ratou ki a koe, He aha koe i aue ai? katahi koe ka mea atu, Mo te rongo; kei te haere mai hoki: a ngohengohe noa iho nga ngakau katoa, ngoikore katoa nga ringaringa, ka he ano hoki nga wairua katoa, nga turi katoa ano hoki kei te wai te rite: nana, te haere mai nei, ka puta mai ano hoki, e ai ta te Ariki ta Ihowa.
- 8
- I puta mai ano te kupu a Ihowa ki a au, i mea,
- 9
- E te tama a te tangata, poropiti atu, ki atu, Ko te kupu tenei a Ihowa, Ki atu, He hoari, he hoari, whakakoi rawa, oro rawa.
- 10
- I whakakoia ai kia nui ai te parekura; i orohia ai kia kanapa ai. Kia koa koia tatou? te tokotoko o taku tamaiti whakahaweatia iho, me nga rakau katoa.
- 11
- I hoatu ano e ia kia orohia, hei mea e maua e te ringa: he hoari ia kua oti te whakakoi, kua oti te oro, ka hoatu ano ki te ringaringa o te kai patu.
- 12
- E tangi, e aue, e te tama a te tangata: no te mea tera e pa mai ki toku iwi, ki nga rangatira katoa o Iharaira: he wehi, he mea na te hoari, ka pa ki toku iwi: mo reira pakia iho to huha.
- 13
- Hei whakamatau hoki ia, a ka pehea ra ki te whakahaweatia ano hoki te tokotoko? ka kore kau noa iho, e ai ta te Ariki ta Ihowa.
- 14
- Na, e te tama a te tangata, poropiti atu, pakia hoki o ringaringa, Tena ano hoki, kia tuatorutia te hoari, te hoari nana nga tupapaku; ko te hoari ia nana nga tupapaku rarahi, tae tonu atu ki o ratou ruma o roto rawa.
- 15
- Kua oti te mata o te hoari te whakatika atu e ahau ki o ratou kuwaha katoa, kia ngohengohe ai o ratou ngakau, kia maha ai o ratou whakatakanga: aue! kua oti te whakakanapa, koi tonu, hei mea mo te patu.
- 16
- Anga atu ki tetahi taha ranei, ki tetahi taha ranei, ki matau ranei, ki maui ranei, ki te wahi e u atu ai to mata.
- 17
- Ka papaki ano oku ringaringa, ka meinga ano hoki toku weriweri kia tau iho: naku na Ihowa te kupu.
- 18
- I puta mai ano hoki te kupu a Ihowa ki a au, i mea,
- 19
- Na, whakaritea e koe, e te tama a te tangata, etahi ara mau kia rua, hei haerenga mai mo te hoari a te kingi o Papurona: ka puta mai raua e rua i te whenua kotahi: whiriwhiria hoki tetahi wahi, whiriwhiria i te ahunga mai o te huarahi ki te pa.
- 20
- Whakaritea he ara e haere mai ai te hoari ki Rapata o nga Amoni, ki Hura ano hoki, ki era i Hiruharama, i te pa taiepa.
- 21
- I tu hoki te kingi o Papurona ki te pekanga o te ara, te ahunga mai o nga ara e rua, ki te ui ki nga tuāhu: i whakakoia ano e ia ana pere, i uia he tikanga ki nga whakapakoko, i titiro atu ia ki te ate.
- 22
- I tona taha ki matau ko te tuāhu mo Hiruharama, hei whakarite i nga mea wawahi, hei mea e hamama ai te mangai i te parekura, e whakarahia ai te reo i te hamamatanga, hei whakarite i nga mea wawahi mo nga kuwaha, kia haupuria ake ano he pukepuke, kia hangā he taumaihi.
- 23
- A ki ta ratou, ano he tuāhu teka tena ki ta ratou titiro iho, ki ta te hunga ra i oati i nga oati: otiia ka maharatia e ia te kino, a ka mau ratou.
- 24
- No reira ko te kupu tenei a te Ariki a Ihowa, Na, kua meinga na e koutou to koutou kino kia maharatia, i to koutou he ka hurahia, i o koutou hara ka kitea i roto i ā koutou mahi katoa; na, e maharatia ana koutou, mo reira ka mau koutou i te ringaringa.
- 25
- Na, ko koe, e te mea poke, e te mea kino, e te kingi o Iharaira nou nei te ra kua tae mai, te wa e mutu ai te he,
- 26
- Ko te kupu tenei a te Ariki a Ihowa, Whakarerea atu te potae, waiho atu i te karauna: e kore tenei e mau: te iti whakanuia ake, te nui whakaititia iho.
- 27
- Ka porohurihia e ahau, ka porohurihia, ka porohurihia, ka kore noa iho ano hoki kia tae mai ra ano te tangata māna, a maku e hoatu ki a ia.
- 28
- Na, e te tama a te tangata, poropiti atu, mea atu, Ko te kupu tenei a te Ariki a Ihowa mo nga Amoni, mo ta ratou tawai; mea atu ano, Te hoari, te hoari, kua oti te unu: oro rawa mo te patu, kia kai ai, koia i kanapa ai:
- 29
- I a ratou ka kite nei i te mea horihori mau, i ā ratou tuāhu ka teka nei ki a koe, kia hoatu ai koe ki runga ki nga kaki o te hunga i patua, o te hunga kino kua tae mai nei to ratou ra, te wa e mutu ai te kino.
- 30
- Kia whakahokia koia e ahau ki tona takotoranga? ka whakawakia koe e ahau ki te wahi i hangā ai koe, ki te whenua i tupu mai ai koe.
- 31
- Ka ringitia ano e ahau taku whakatakariri ki runga ki a koe, ka pupuhi ano ahau ki a koe i runga i te ahi, ara, i taku riri; ka hoatu ano koe e ahau ki te ringaringa o nga tangata whakaaro-kore, e mohio ana ki te whakangaro.
- 32
- Ka waiho koe hei wahie mo te ahi; ka heke ou toto ki waenganui o te whenua; heoi ano maharatanga atu ki a koe; naku hoki na Ihowa te kupu.
Address: 
Phone: 
Email: