- 1
- I puta mai ano te kupu a Ihowa ki a au, i mea,
- 2
- E te tama a te tangata, korero atu ki nga tamariki a to iwi, mea atu ki a ratou, Ki te kawea atu e ahau te hoari ki tetahi whenua, a ka mau nga tangata o te whenua ki tetahi tangata o o ratou rohe, ka whakaritea e ratou hei tutei.
- 3
- Na, tona kitenga i te hoari e puta mai ana ki te whenua, whakatangihia ana e ia te tētere, hei whakatupato i te iwi;
- 4
- A, te rongonga o tetahi tangata i te tangi o te tētere, na, kahore ia e tupato; a kua tae mai te hoari, kua riro ia, hei runga ano i tona māhunga ona toto.
- 5
- I rongo ia i te tangi o te tētere, a kihai i tupato; ki runga ano i a ia ona toto. Te tangata ia i tupato, ka mawhiti mai i a ia tona wairua.
- 6
- Na, te tutei i kite i te hoari e puta mai ana, a kihai i whakatangi i te tētere, kihai i whakatupato i te iwi; a ka tae mai te hoari, ka riro tetahi o ratou, ka riro ia i runga i tona kino, otiia ka rapua e ahau ona toto i te ringaringa o te tutei.
- 7
- Na, ko koe, e te tama a te tangata, kua waiho koe e ahau hei tutei mo te whare o Iharaira; a me whakarongo koe ki te kupu a toku mangai, ko koe ano taku hei whakatupato i a ratou.
- 8
- Ki te mea atu ahau ki te tangata kino, E te tangata kino, ko te mate kau mou; ki te kore koe e korero, e whakatupato i te tangata kino ki tana ara, ka mate taua tangata kino i runga i tona he; ka rapua ia e ahau ona toto i tou ringa.
- 9
- Tena ko tenei ka whakatupato koe i te tangata kino ki tona ara, kia tahuri mai ia i reira, a e kore ia e tahuri mai i tona ara, ka mate ia i runga i tona kino, ka ora mai ia i a koe tou wairua.
- 10
- Na, e te tama a te tangata, korero atu ki te whare o Iharaira, Ko ta koutou kī tenei, e mea ana koutou, Ki te mea kei runga i a matou o matou he, o matou hara, a ka memeha atu matou i runga i aua he, ma te aha ra matou ka ora ai?
- 11
- Mea atu ki a ratou, E ora ana ahau, e ai ta te Ariki ta Ihowa, kahore oku ngakau koa ki te matenga o te tangata kino; engari kia tahuri te tangata kino i tona ara, kia ora: tahuri mai, tahuri mai koutou i ā koutou ara kino; kia mate hoki koutou hei aha, e te whare o Iharaira?
- 12
- Na, me ki atu e koe, e te tama a te tangata, ki nga tamariki a tou iwi, E kore te tika o te tangata tika e whakaora i a ia i te ra e poka ke ai ia: me te kino ano o te tangata kino e kore tera e whakahinga i a ia i te ra e tahuri mai ai ia i tana kino; e kore ano te tangata tika e ora i tona tika i te ra e hara ai ia.
- 13
- Ki te mea atu ahau ki te tangata tika, ka ora ia, a ka whakawhirinaki atu ia ki tona tika, ka mahi hoki i te he, e kore hoki ana mahi tika katoa e maharatia; engari ka mate ia i runga i tana he i mahia e ia.
- 14
- Ki te mea atu ano ahau ki te tangata kino, Ko te mate kau mou, a ka tahuri mai ia i tona hara, ka mahi i te mea e tika ana, e rite ana;
- 15
- Ki te whakahokia mai te taunaha e te tangata kino, ki te utua mai e ia te mea i pahuatia e ia, ki te haere ia i runga i nga tikanga o te ora; a ka kore e mahi i te he, ka ora ano ia, e kore ia e mate.
- 16
- E kore tetahi o ona hara i hara ai ia e maharatia mai ki a ia: kua mahia e ia te mea e tika ana, e rite ana, ka ora ano ia.
- 17
- Heoi kei te mea nga tamariki a tou iwi, Kahore e rite te ara a te Ariki: na, ratou nei, kahore to ratou ara e rite.
- 18
- Ki te tahuri atu te tangata tika i tana tika, a ka mahia e ia te he, ka mate ano ia i aua he.
- 19
- Ki te tahuri mai ano te tangata kino i tana kino, a ka mahia e ia te mea e tika ana, e rite ana, ka ai ena hei whakaora i a ia.
- 20
- Heoi kei te mea na koutou, Kahore e rite te ara a te Ariki. E te whare o Iharaira, ka rite ki tona ara, ki tona ara, taku whakarite whakawa mo koutou.
- 21
- Na, i te tekau ma rua o nga tau o to matou whakaraunga, i te tekau o nga marama, i te rima o nga ra o te marama, ka tae mai ki a au tetahi o nga oranga o Hiruharama, a ka mea, Kua patua te pa.
- 22
- Na, i pa mai ano te ringaringa o Ihowa ki a au i te ahiahi i mua ake o te taenga mai o taua oranga; meinga ana e ia kia kuihi toku mangai, a tae noa mai ia ki a au i te ata; na, kua meinga e ia kia kuihi toku mangai, a kore ake toku wahangu.
- 23
- Na, ko te putanga o te kupu a Ihowa ki a au; i ki ia,
- 24
- E te tama a te tangata, te hunga e noho ana i enei ururua i te whenua o Iharaira, e korero ana ratou, e mea ana, He kotahi a Aperahama, a riro ana i a ia te whenua; tatou ia he tokomaha; kua homai te whenua ki a tatou hei kāinga tupu.
- 25
- Mo reira ki atu ki a ratou, Ko te kupu tenei a te Ariki a Ihowa; Ta koutou kai, he mea kinaki ki te toto, e anga ana hoki o koutou kanohi ki ā koutou whakapakoko, e whakaheke toto ana hoki koutou: a e mau ranei te whenua i a koutou?
- 26
- To koutou turanga ko a koutou hoari, e mahia ana e koutou te mea whakarihariha, e whakapokea ana e koutou te wahine a tona hoa, a tona hoa: a e mau ranei te whenua i a koutou?
- 27
- Kia penei to ki atu ki a ratou, Ko te kupu tenei a te Ariki a Ihowa; E ora ana ahau, ina, ka hinga i te hoari te hunga i nga ururua; na, te tangata i te mata o te parae, ka hoatu ia e ahau hei kai ma nga kirehe; a, te hunga i nga taumaihi, i nga ana, ka mate ratou i te mate uruta.
- 28
- Ka meinga ano e ahau te whenua kia ururuatia rawatia, a ka mutu te whakapehapeha o tona kaha; ka ururuatia ano hoki nga maunga o Iharaira, e kore e haerea e te tangata.
- 29
- A ka mohio ratou ko ahau a Ihowa, ina meinga e ahau te whenua kia ururuatia rawatia mo a ratou mea whakarihariha katoa i mea ai ratou.
- 30
- Na, e te tama a te tangata, e korerotia hetia ana koe e nga tamariki a tou iwi i te taha o nga pakitara, i nga tatau ano o nga whare, e korerorero ana tetahi ki tetahi, ki tona hoa, ki tona hoa, e mea ana, Tena, kia haere tatou, kia rongo ai tatou i te kupu e puta mai ana i a Ihowa.
- 31
- To ratou haere mai ki a koe rite tonu ki te haerenga mai o te iwi; to ratou noho i tou aroaro rite tonu ano ki to toku iwi; e whakarongo ana hoki ratou ki o kupu, heoi kahore e mahia e ratou: ko o ratou mangai hoki hei whakaahuareka mai, ko o ratou ngakau kei te whai i ta ratou apo taonga.
- 32
- Nana, ki a ratou, e rite ana koe ki te waiata ahuareka a te reo pai, a te tangata he pai te rangi o tana mea whakatangi: e whakarongo ana hoki ratou ki o kupu, heoi kahore e mahia e ratou.
- 33
- Na, ka puta tenei, (ina, ka puta ano,) ka mohio ratou, na, i roto i a ratou te poropiti e noho ana.
Address: 
Phone: 
Email: