- 1
- I puta mai ano te kupu a Ihowa ki a au, i mea,
- 2
- E te tama a te tangata, poropititia he hē mo nga hepara o Iharaira, poropiti, mea atu ki a ratou, Ko te kupu tenei a te Ariki a Ihowa mo nga hepara; Aue, te mate mo nga hepara o Iharaira, e whangai nei i a ratou ano! He teka ianei me whangai te kahui e nga hepara?
- 3
- E kainga ana te ngako e koutou, e kakahuria ana e koutou te huruhuru, e patua ana e koutou nga mea whangai; nga hipi, kahore ratou e whangaia e koutou.
- 4
- Kihai i whakakahangia e koutou nga turoro, kihai nga mea mate i rongoatia, te mea i whati kihai i takaia, kihai ano i whakahokia mai e koutou te mea i aia atu, kihai i rapua te mea i ngaro; heoi he taikaha, he nanakia, ta koutou whakahaere tikanga ki a ratou.
- 5
- Na, marara noa atu ratou i te kore hepara: riro ana hei kai ma nga kirehe katoa o te parae, i a ratou i marara ra.
- 6
- Atiutiu noa atu ana aku hipi i runga i nga maunga katoa, i runga i nga pukepuke tiketike katoa: marara noa atu aku hipi i runga i te mata katoa o te whenua, kahore hoki he tangata hei rapu, hei whakataki.
- 7
- Mo reira whakarongo mai, e nga hepara, ki te kupu a Ihowa;
- 8
- E ora ana ahau, e ai ta te Ariki a Ihowa, na, kua waiho nei aku hipi hei taonga pārau, kua waiho ano aku hipi hei kai ma nga kirehe katoa o te parae, i te kore hepara, kihai nei hoki aku hepara i rapu i aku hipi, heoi whangaia ano ko ratou ano e nga hepara, kihai ano i whangai i aku hipi;
- 9
- Mo reira whakarongo, e nga hepara, ki te kupu a Ihowa;
- 10
- Ko te kupu tenei a te Ariki a Ihowa; Hei hoa riri tenei ahau mo nga hepara; a ka rapu utu ahau mo aku hipi i o ratou ringa, ka whakamutua ano e ahau ta ratou whangai hipi; e kore ano nga hepara e whangai i a ratou ano i muri nei; ka whakaorangia mai ano e ahau aku hipi i roto i o ratou mangai, kei waiho hei kai ma ratou.
- 11
- Ko te kupu hoki tenei a te Ariki a Ihowa; Nana, ka rapu tenei ahau i aku hipi, ka kimihia marietia.
- 12
- Ka rite ki te kimihanga a te hepara i tana kahui i te ra e tae ai ia ki roto ki ana hipi kua tohatoha noa atu; ka pena ano taku kimi i aku hipi, ka whakaorangia mai ano ratou e ahau i nga wahi katoa i marara atu ai ratou i te ra tuku pu, i te ra pouri.
- 13
- Ka whakaputaina mai ano ratou e ahau i roto i nga iwi, ka whakaminea mai i nga whenua, ka kawea atu ano ratou e ahau ki to ratou oneone, a ka whangaia ratou e ahau ki runga ki nga maunga o Iharaira, ki te taha o nga awa, ki nga wahi katoa o te whenua e nohoia ana.
- 14
- Ka whangaia ratou e ahau i te haerenga pai, a i runga i nga maunga tiketike o Iharaira he puninga mo ratou: ka takoto ratou ki reira ki te puninga pai, ka kai ano hoki ratou i runga i nga maunga o Iharaira i te haerenga momona.
- 15
- Ko ahau hei whangai i aku hipi, ko ahau ano hei mea i a ratou kia takoto, e ai ta te Ariki ta Ihowa.
- 16
- Maku e rapu te mea i ngaro, maku ano e whakahoki mai te mea i aia atu, maku e takai te mea i whati, maku ano e whakakaha te mea mate: na, te mea momona, te mea kaha, ka ngaro i a au; ka whangaia ratou e ahau i runga i te whakarite whakawa.
- 17
- Na, e koutou, e aku hipi, ko te kupu tenei a te Ariki a Ihowa; Nana ka whakaritea e ahau te whakawa a tetahi hipi ki tetahi hipi, a nga hipi toa ano hoki ratou ko nga koati toa.
- 18
- He mea iti ianei ki a koutou ta koutou kainga i nga haerenga pai, i takahia ai e koutou te toenga o ta koutou kai ki o koutou waewae? na, nga wai hohonu, inumia ana e koutou, a whakaparua ana e koutou te toenga ki o koutou waewae.
- 19
- Na, aku hipi, ta ratou kai ko nga takahanga o o koutou waewae; ta ratou e inu ai ko te mea i whakaparua e o koutou waewae.
- 20
- Mo reira ko te kupu tenei a te Ariki a Ihowa ki a ratou; Tenei ahau, maku ano e whakarite te whakawa a te hipi momona raua ko te hipi hiroki.
- 21
- Na, kua turaki nei o koutou kaokao, o koutou peke, akina ana e koutou nga mea mate ki o koutou haona, a marara ake ratou i a koutou ki waho noa atu;
- 22
- Na, ka whakaora ahau i aku hipi, e kore ano ratou e waiho i muri nei hei pahuatanga; ka whakaritea ano e ahau te whakawakanga a tetahi hipi ki tetahi hipi.
- 23
- Kotahi tonu ano te hepara e whakaritea e ahau mo ratou, a māna ratou e whangai; ara, taku pononga a Rawiri; māna ratou e whangai, a hei hepara ia mo ratou.
- 24
- Ko ahau ko Ihowa hei Atua mo ratou, ko taku pononga ano hoki ko Rawiri hei rangatira i roto i a ratou; naku na Ihowa te kupu.
- 25
- Ka whakaritea ano e ahau he kawenata mo te rongo mau ki a ratou, ka whakamutua ano hoki te noho o nga kirehe kino ki te whenua; a ka noho ratou ki te koraha, tē ai he wehi, ka moe ano hoki ki nga ngahere,
- 26
- Ka meinga ano ratou e ahau, me nga wahi ano i toku pukepuke, a karapoi noa, hei manaakitanga, ka heke ano hoki te ua i te wa i tika ai; ka uaina iho nga manaakitanga.
- 27
- Ka hua ano hoki nga hua o te rakau o te parae, ka tukua mai ano ona mau e te whenua, ka noho humarie hoki ratou ki to ratou whenua, ka mohio ano hoki ko ahau a Ihowa, ina motu i a au nga here o to ratou ioka, a ka riro mai ratou i a au i roto i te ringa o o ratou kai whakamahi.
- 28
- E kore ano ratou e waiho i muri nei hei pahuatanga ma nga iwi, e kore ano ratou e kainga e te kirehe o te whenua; engari ka noho humarie ratou, tē ai he kai whakawehi.
- 29
- A ka whakaarahia e ahau he mahuri whai ingoa ma ratou, e kore ano ratou e riro i te hemo-kai i runga i te whenua, e kore ano te whakama o nga tauiwi e wahā e ratou a muri ake nei.
- 30
- Na, ka mohio ratou ko ahau, ko Ihowa, ko to ratou Atua, kei a ratou, ko ratou ano hoki ko te whare o Iharaira he iwi noku, e ai ta te Ariki ta Ihowa.
- 31
- Na, e koutou e aku hipi, e nga hipi e whangaia ana e ahau, he tangata koutou, ko ahau hoki to koutou Atua, e ai ta te Ariki ta Ihowa.
Address: 
Phone: 
Email: