- 1
- Na, ko koe, e te tama a te tangata, tikina tetahi pereki mau, whakatakotoria ki tou aroaro, ka tuhituhi ai i te pa, i Hiruharama, ki runga.
- 2
- Whakapaea atu ano hoki taua mea e koe, hangā he taumaihi hei whakapae mona, haupuria ake he pukepuke hei whakapae mona, hangā he nohoanga taua, hei whawhai ki reira, hangā hoki nga mea wawahi mona, a taka noa.
- 3
- Tikina atu ano hoki tetahi rino paraharaha mau, whakaturia ake hei taiepa rino ki waenganui ou, o te pa, kia anga atu ano to mata ki reira, a ka whakapaea, me whakapae atu hoki e koe. Hei tohu tenei ki te whare o Iharaira.
- 4
- Me takoto ano hoki koe ki to taha ki maui, ka uta ai i te kino o te whare o Iharaira ki runga ki taua taha: to wahanga i to ratou kino ka rite ki te maha o nga ra e takoto ai koe ki taua taha.
- 5
- Kua oti hoki i a au nga tau o to ratou kino te uta atu ki runga ki a koe, kei te maha o nga ra te ritenga, e toru rau e iwa tekau nga ra, na, ka wahā e koe te he o te whare o Iharaira.
- 6
- A ka poto enei i a koe, me takoto ano koe ki to taha ki matau, a e wha tekau nga ra e wahā ai e koe te he o te whare o Hura: taku i whakarite ai ki a koe, he ra mo te tau, he ra mo te tau.
- 7
- Anga atu ano to kanohi ki te whakapae i Hiruharama, me huhu ano to ringa, ka poropiti i te he mo reira.
- 8
- Ka meatia ano koe e ahau ki nga here, a e kore koe e huri atu i tetahi taha ou ki tetahi taha ou, kia poto ra ano i a koe o ra whakapae.
- 9
- Tikina atu hoki tetahi witi mau, tetahi parei, etahi pīni, etahi mirete, etahi rai, ka maka atu ki roto ki te oko kotahi, ka hanga i tetahi taro mau, me whakaaro ki te maha o nga ra e takoto ai koe ki tou taha, e toru rau e iwa tekau nga ra e kainga ai taua mea e koe.
- 10
- Me pauna ano to kai e kainga e koe, kia rua tekau nga hekere i te ra kotahi; me kai e koe i tenei wa, i tenei wa.
- 11
- Me mehua ano te wai e inumia e koe; ko te wahi whakaono o te hini, me inu e koe i tenei wa, i tenei wa.
- 12
- Na, to kainga i taua mea, whakaritea ki te kainga i nga keke parei, me tunu ano e koe ki te paru e puta mai ana i roto i te tangata ki to ratou aroaro.
- 13
- I ki mai ano a Ihowa, Ka pena ano te kai a nga tamariki a Iharaira i ta ratou taro poke i roto i nga Tauiwi e peia atu ai ratou e ahau.
- 14
- Na, ko taku kianga ake, Aue, e te Ariki, e Ihowa! nana, kihai toku wairua i poke, kihai ano ahau i kai i te mea mate maori, i te mea i haea, o taku tamarikitanga ano a mohoa noa nei, kihai ano tetahi kikokiko whakarihariha i tapoko ki roto ki toku mangai.
- 15
- Na, ko tana meatanga mai ki a au, Titiro mai, kua hoatu e ahau te paru kau hei whakarite mo te paru tangata, a mau e tunu to taro ki aua mea.
- 16
- Na, ko tana meatanga mai ki a au, E te tama a te tangata, kua oti te whawhati e ahau te tokotoko, ara, te taro i Hiruharama; a ta ratou taro e kai ai he mea pauna, i runga ano i te manukanuka; he mea mehua ano te wai, ka inumia e ratou i runga i te ketekete:
- 17
- He mea kia kore ai he taro, he wai, ma ratou, ketekete iho tetahi ki tetahi, memeha noa iho i runga i to ratou he.
Address: 
Phone: 
Email: