- 1
- Na, ko koe, e te tama a te tangata, tikina he maripi koi mau, tikina tetahi heu a te kai heu mau, ka whakahaere ai ki runga ki to māhunga, ki to pahau ano hoki: katahi ka tikina atu e koe etahi pauna hei pauna mau, a ka wehewehea e koe nga makawe.
- 2
- Te whakatoru o nga wahi me tahu e koe ki te ahi ki waenganui o te pa, ina rite nga ra o te whakapaenga: na, ka mau koe ki te whakatoru o nga wahi, ka hahau atu ki te maripi i tetahi taha ona, i tetahi taha: a te whakatoru o nga wahi me titaritari atu e koe ki te hau: ka maunu atu ano i a au te hoari hei whai i a ratou.
- 3
- Me tango mai ano e koe etahi o aua makawe kia torutoru, ka takai ki roto ki nga pito o tou.
- 4
- Me tango ano hoki e koe etahi o aua makawe ano, ka maka ki waenganui o te ahi, ka tahu ai ki te ahi; no te mea ka puta mai i reira he ahi ki te whare katoa o Iharaira.
- 5
- Ko te kupu tenei a te Ariki, a Ihowa, Ko Hiruharama tenei: he mea whakatu ia naku ki waenga o nga iwi, o nga whenua ano hoki i tetahi taha ona, i tetahi taha.
- 6
- A whakangaua ketia ake e ia aku whakaritenga whakawa hei kino; nui atu tana i ta nga iwi; tana hoki ki aku tikanga, nui atu i ta nga whenua i tetahi taha ona, i tetahi taha: kua paopao nei hoki ratou ki aku whakaritenga whakawa, ki aku tikanga; kihai i waiho hei huarahi ma ratou.
- 7
- Mo reira ko te kupu tenei a te Ariki a Ihowa, Na, kua maha noa ake nei ta koutou i ta nga iwi i tetahi taha o koutou, i tetahi taha, kihai koutou i haere i runga i aku tikanga, kihai i mahi i aku whakaritenga whakawa, kihai ano i rite ta koutou mahi ki nga whakaritenga whakawa a nga iwi i tetahi taha o koutou, i tetahi taha;
- 8
- Mo reira ko te kupu tenei a te Ariki a Ihowa, Nana, ahau nei, hei hoa riri ano hoki ahau mou, a ka mahia e ahau he whakaritenga whakawa i waenganui ou i te tirohanga ano a nga iwi.
- 9
- Ka mahia ano hoki e ahau i roto i a koe nga mea kihai i mahia e ahau i mua, e kore he mea pena e mahia e ahau a mua; mo o mea whakarihariha katoa hoki,
- 10
- A ka kai nga mātua i nga tamariki i roto i a koe, ka kai ano nga tamariki i o ratou mātua, ka mahia ano e ahau he whakaritenga whakawa i roto i a koe, ka titaritaria atu ano e ahau o morehu katoa ki nga hau katoa.
- 11
- Na, e ora ana ahau, e ai ta te Ariki ta Ihowa, kua whakapokea nei e koe toku wahi tapu ki o mea whakarihariha katoa, ki o mea anuanu katoa, mo reira ka whakaititia koe e ahau; e kore toku kanohi e manawapa, e kore ano ahau e tohu.
- 12
- Ka mate te whakatoru o nga wahi ou i te mate uruta, ka poto atu hoki i te hemo-kai i roto i a koe; a ka hinga te whakatoru o nga wahi ou i te hoari i tetahi taha ou, i tetahi taha: na, te whakatoru o nga wahi, ka titaritaria atu e ahau ki nga hau katoa, ka maunu atu ano i a au te hoari hei whai i a ratou.
- 13
- Na, ka whakapaua atu taku riri, ka meinga ano e ahau kia tau iho taku weriweri ki runga ki a ratou, ka whai whakamarietanga ano hoki ahau; a ka mohio ratou ko ahau a Ihowa te korero atu nei i runga i toku hae, ina whakapaua atu e ahau taku weriweri ki runga ki a ratou.
- 14
- Ka meinga ano koe e ahau hei ururua, hei ingoa kino i roto i nga iwi i tetahi taha ou, i tetahi taha, i te tirohanga ano o nga tangata katoa e haere atu ana.
- 15
- A ka waiho a kona hei ingoa kino, hei tawainga, hei mea e ako ai, e miharo ai nga iwi i tetahi taha ou, i tetahi taha, ina mahia e ahau nga whakaritenga whakawa ki a koe i runga i te riri, i runga i te weriweri, i runga i nga whakatupehupehunga e whakatakariri rawa ana. Naku na Ihowa te kupu.
- 16
- Ina ungā atu e ahau ki a ratou nga pere kino, ara, te hemo-kai, hei whakamoti i a ratou, aku ra e tukua atu e ahau hei whakamoti i a koutou; ka whakanuia ano hoki e ahau to koutou hemo-kai, ka whati ano i a au to koutou tokotoko, ara, te taro.
- 17
- Ka ungā atu ano e ahau te hemo-kai ki a koutou, me nga kirehe kino, a ka poto i a ratou o tamariki; ka tika atu ano hoki te mate uruta me te whakaheke toto i waenganui i a koe; ka kawea atu ano hoki e ahau te hoari ki a koe. Naku na Ihowa te kupu.
Address: 
Phone: 
Email: