- 1
- I puta mai ano te kupu a Ihowa ki a au, i mea ia,
- 2
- E te tama a te tangata, anga atu to mata ki nga maunga o Iharaira, ka poropiti ai i te he mo ratou.
- 3
- Me ki atu e koe, E nga maunga o Iharaira, whakarongo ki te kupu a te Ariki a Ihowa; Ko te kupu tenei a te Ariki a Ihowa ki nga maunga, ki nga pukepuke, ki nga awa, ki nga raorao; Tenei au te kawe atu nei i te hoari ki runga ki a koutou, a ka kore i a au a koutou wahi tiketike.
- 4
- Ka ururuatia ano hoki a koutou aata, ka pākarua a koutou whakapakoko, ka hinga ano i a au o koutou tupapaku, he mea patu ki mua i ā koutou whakapakoko.
- 5
- Ka takoto ano i a au nga tinana o nga tamariki a Iharaira ki mua i ā ratou whakapakoko; ka titaritaria ano hoki e ahau o koutou wheua ki ā koutou aata, a taka noa, taka noa.
- 6
- I o koutou nohoanga katoa ka ururuatia nga pa, ka mokemoke ano hoki nga wahi tiketike, he mea kia ururuatia ai a koutou aata, kia mokemoke ai; ka pākarua ano hoki a koutou whakapakoko, mutu ake ta ratou; ka poutoa ano a koutou whakapakoko, ka kore noa iho ano hoki a koutou mahi.
- 7
- Ka hinga ano te tupapaku i roto i a koutou; a ka mohio koutou ko ahau a Ihowa.
- 8
- Ka toe ano ia i a au etahi, kia mawhiti mai ai etahi o koutou i te hoari i roto i nga iwi, ina titaritaria atu koutou ki nga whenua.
- 9
- Na, te hunga o koutou e mawhiti mai, ka mahara ratou ki a au i roto i nga iwi e whakaraua atu ai ratou, ina whati i a au o ratou ngakau puremu i whakarere nei i a au, me o ratou kanohi puremu ano hoki e whai nei i ā ratou whakapakoko; a anuanu iho ratou ki a ratou ano mo nga kino i mahia nei e ratou, mo o ratou mea whakarihariha katoa.
- 10
- Ka mohio ano hoki ratou ko ahau a Ihowa; ehara ano hoki taku i te mea noa iho i taku kianga atu ka mahia tenei kino ki a ratou.
- 11
- Ko te kupu tenei a te Ariki a Ihowa, Pakia tou ringa, takahi iho to waewae, me te ki ake ano, Aue te mate mo nga kino whakarihariha katoa a te whare o Iharaira! ka hinga hoki ratou i te hoari, i te hemo-kai, i te mate uruta.
- 12
- Te tangata i tawhiti ka mate i te mate uruta; te tangata e tata ana ka hinga i te hoari; te tangata e toe ana, a e whakapaea ana, ka mate i te hemo-kai: ka whakapaua hoki e ahau taku riri ki a ratou.
- 13
- A, ka mohio koutou ko ahau a Ihowa, ina patua ratou i waenganui o a ratou whakapakoko i tetahi taha o a ratou aata, i tetahi taha, i runga i nga pukepuke tiketike katoa, i runga i nga tihi katoa o nga maunga, i raro ano i nga rakau kouru nui katoa, i raro i nga oki katoa e maha ana nga rau, i te wahi i tukua atu ai e ratou te kakara reka ki o ratou whakapakoko katoa.
- 14
- Ka whakamarokia atu ano e ahau toku ringaringa ki a ratou, a ka meinga te whenua kia ururuatia, ae ra, ururua rawa i te koraha e anga ana ki Ripirata, puta noa i o ratou nohoanga: a ka mohio ratou ko Ihowa ahau.
Address: 
Phone: 
Email: